Hansı amillər və əməllər savabın qat-qat artmasına səbəb olur? -1 l Adil Rəcəbov

Описание: Müəllif: Şeyx Abdurrahmən əs-Səadi (Allah ona rəhmət etsin)
Kitabın adı: Savabların artmasına səbəb olan əməllər
Şərh edən: Şeyx Abdurrazzaq əl-Bədr (Allah onu qorusun)
Kitabı tərcümə və şərh edən: Adil Rəcəbov

Bismilləhir-Rahmənir-Rahim. Həmd olsun aləmlərin Rəbbi olan Allaha. Şəhadət edirəm ki, Allahdan başqa ibadətə layiq haqq məbud yoxdur, O, təkdir, Onun şəriki yoxdur. Şəhadət edirəm ki, Muhəmməd Onun qulu və elçisidir. Allahın salavatı və salamı ona, onun ailəsinə və bütün səhabələrinə olsun.

Ey Allah! Bizim heç bir elmimiz yoxdur, ancaq Sənin bizə öyrətdiyin elm var. Ey Allah! Bizə faydalı elm öyrət, elmimizi artır və öyrəndiklərimizi bizim üçün lehimizə dəlil et, əleyhimizə yox, ey əbədi Yaşayan, ey Qəyyum, ey əzəmət və kərəm sahibi!

Sonra, ey dəyərli qardaşlar! Bu məclisdə və Allahın izni ilə ardınca gələcək məclislərdə söhbətimiz böyük bir mövzudan – imam, alim Əbdürrəhman bin Nasir əs-Səadinin (Allah ona rəhmət etsin) dəyərli risaləsindən olacaq. Bu risalə onun fətvalarının toplandığı əsərin içində yer almışdır və savabın və mükafatın artmasına səbəb olan əməllər və vasitələr haqqındadır.

Bu, fiqhin çox önəmli, yüksək məqamlı və ali dərəcədə olan bir mövzusudur. Hər bir müsəlman kişi və qadının onu bilməyə ehtiyacı vardır. Bu məsələyə – savabın və mükafatın artmasına səbəb olan əməllər və vasitələrə olan ehtiyacımız olduqca böyükdür. Bu şərəfli və uca mövzu haqqında danışacağıq. Çünki bir əməlin zahiri forması hər iki şəxs üçün eyni olsa da, birinci şəxs Allah Təalənin yanında o biri şəxsə nisbətən daha çox savab və böyük mükafat əldə edə bilir.

Savabın və mükafatın artmasına səbəb olan bu amilləri həyata keçirmək üçün əməlin zahiri forması eyni olsa da, əməl sahibləri arasında savab baxımından çox böyük fərqlər olur. Bu isə həmin səbəblərə nail olub-olmamaqdan asılıdır. Şeyx (Allah ona rəhmət etsin) bu mövzu ilə bağlı bir sual irəli sürmüşdür: Savabın və mükafatın artmasına səbəb olan amillər və əməllər hansılardır? O, bu suala cavab vermişdir. Mümkündür ki, bu sualı ona kimsə vermişdir və yaxud o, özü bu sualı ortaya qoyub cavablandırmışdır.

Hər halda, onun (Allah ona rəhmət etsin) verdiyi cavab qısa və yığcam olmasına baxmayaraq, bu şərəfli mövzunun əsas və vacib məsələlərini əhatə etmişdir. O, (Allah ona rəhmət etsin) bu mövzunun əsaslarını və qaydalarını böyük diqqətlə açıqlamışdır. Lakin geniş izaha və təfərrüata varmamışdır, çünki bu məsələ daha geniş və əhatəli bir müzakirə tələb edir. O (Allah ona rəhmət etsin) əsasların qoyulmasına və bu mövzuda ümumi qaydaların qeyd olunmasına xüsusi əhəmiyyət vermiş, məsələnin mahiyyətini izah edəcək bəzi nümunələrə işarə etmişdir. Beləliklə, o, çox faydalı və mükəmməl bir iş ortaya qoymuşdur. Allah ona rəhmət etsin.

Bu məqamda mən hər kəsə bu risalənin geniş şəkildə yayılmasının əhəmiyyətini xatırlatmaq istəyirəm, xüsusilə də biz böyük fəzilətə malik olan, savab və mükafatın qat-qat artdığı bərəkətli bir mövsümə və üstün bir aya yaxınlaşarkən. Həqiqətən, bu risalənin yayılmasına diqqət yetirmək çox mühümdür. Xüsusilə də bu dövrdə bu risalənin yayılması təkcə xatırlatma, maarifləndirmə, öyrətmə və xəbərdarlıq baxımından deyil, həm də mühüm bir vəzifə kimi dəyərləndirilməlidir. Onun yayılması həm çap olunmaqla, həm də xətiblərin onun məzmununu izah etməsinə xüsusi diqqət ayırması ilə həyata keçirilə bilər. Həmçinin bu risalə dərslərdə və digər vasitələrlə də insanlara çatdırılmalıdır ki, bu böyük və dəyərli faydalar yayılmış olsun.

Bütün bu əhəmiyyətinə və yüksək dəyərinə baxmayaraq, bu risalə, hətta elm tələbələri arasında belə, geniş yayılmamışdır, qalanları bir yana. Bu isə onun yayılmasına xüsusi diqqət yetirilməsinin vacibliyini bir daha vurğulayır.

Bu risaləyə dair ayrıca yazılmış və çap olunmuş bir şərh mövcuddur. Hörmətli alim Şeyx Məhəmməd bin İbrahim əl-Həməd onu şərh edərək məzmununu izah etmiş, dəlilləri və nümunələri qeyd etmişdir. Allah onu xeyirlə mükafatlandırsın, o, bu işdə mükəmməl iş görmüşdür. Bu şərh artıq çap olunmuşdur və çox böyük fayda və xeyir daşıyır.

Biz də Allaha təvəkkül edərək və Ondan yardım diləyərək başlayırıq. Uca Allahdan istəyirik ki, bizə ixlas, doğru yol, faydalı elm və saleh əməl nəsib etsin, bizi doğru düz yola yönəltsin. Həqiqətən, yalnız Ona təvəkkül edir və yalnız Ona güvənirik. O, bunu istəməyə ən layiqli və ümid bəsləniləcək yeganə varlıqdır.

Bəli.

Sosial şəbəkələrdə bizi izləməyi unutmayın:

Saytımız: https://ixlasla.com
Youtube:    / ixlasla  
Instagram:   / ixlaslacom  
Telegram: https://telegram.me/ixlasla
Twitter:   / ixlaslacom  
Facebook:   / ixlasla  
Facebook:   / ixlaslacom  

#ixlasla #islam #quran