SE JMORRU GĦAND IL-PRESIDENT B’ISEM GĦALL-KAP TAL-OPPOŻIZZJONI

Описание: ONE.COM.MT •Fis-satra tal-lejl, il-Kap Nazzjonalista Adrian Delia ġie sfiduċjat minn dsatax-il deputat fil-grupp parlamentari f’mozzjoni li preżenta Chris Said u sekondata minn Therese Comodini Cachia.

Adrian Delia indirizza konferenza tal-aħbarijiet u qal li hu se jibqa jmexxi l-Partit Nazzjonalista.

Intant fl-aħħar sigħat komplew jiżviluppaw l-affarijiet b’rabta mal-aħħar kriżi akuta fil-Partit Nazzjonalista.

Ftit tal-ħin ilu stqarrija ffirmata minn Chris Said, li ressaq il-mozzjoni ta’ sfiduċja u Therese Comodini Cachia li ssekondata f’isem dsatax-il deputat sar appell biex Adrian Delia jwarrab bil-kwiet.

Qalu l-vot tal-bieraħ kien għażla diffiċli.

Talbuh iservi f’irwol differenti fl-Oppożizzjoni.

Favorit għal kariga ta’ Kap tal-Oppożizzjoni hemm Claudio Grech u nifhmu li d-deputati Nazzjonalisti li sfiduċjaw lil Delia se jkunu qed imorru għand il-President ta’ Malta biex jagħrfuh li hemm deputat ġdid li jgawdi l-fiduċja tal-maġġoranza tal-membri fuq il-bank tal-Oppożizzjoni.

KITBA EDWARD MONTEBELLO
FILMAT CHRIST BORG

Fi stqarrija ffirmata mid-deputat Nazzjonalista Chris Said u d-deputat Nazzjonalista Therese Comodini Cachia, li ressqu l-mozzjoni ta’ sfiduċja f’Adrian Delia, sar tentattiv ieħor biex Adrian Delia jitlaq bil-kwiet.

L-istqarrija li ma ssemmi l-ebda isem flok Delia biex ikun Kap tal-Oppożizzjoni jingħad li l-Partit Nazzjonalista jixraqlu ċ-ċans li jerġa’ jikseb il-fiduċja tan-nies u jsir gvern alternattiv.

L-istqarrija tirrappreżenta lid-dsatax-il deputat li b’vot sigriet sfiduċjaw lil Adrian Delia tgħid li f’dawn l-aħħar xhur inżammu ħafna laqgħat tal-grupp parlamentari f’liema l-grupp ġie indikat t-tħassib tiegħu.

Adrian Delia ripetutament ġie mistieden sabiex ikompli jipparteċipa u jikkontribwixxi fl-Oppożizzjoni f’irwol differenti.

L-istqarrija appellat lil Adrian Delia, sabiex f’dawn iċ-ċirkostanzi mwegħra, iqiegħed lil partit u l-interessi tal-pajjiż l-ewwel.

Intant hekk kif kien ħiereġ mill-Parlament l-Erbgħa filgħaxija, Chris Said qal li mhux interessat li jidħol għall-kariga ta’ Kap tal-Oppożizzjoni

Said żied jgħid li fil-mument opportun ser ikunu qed imorru għand il-President ta’ Malta George Vella.

Dan l-istess messaġġ għaddih id-deputat Nazzjonalista Jason Azzopardi filwaqt li ma riedx jgħid min hu dak propost għall-Kap tal-Oppożizzjoni.

Skont artiklu disgħin tal-Kostituzzjoni, il-President ta’ Malta għandu s-setgħa li jneħħi Kap tal-Oppożizzjoni u jaħtar ieħor jekk jidhirlu li deputat fil-kamp tal-Oppożizzjoni għandu s-saħħa numerika ta’ fiduċja fuq deputat ieħor fost il-membri parlamentari tal-Oppożizzjoni.

Aktar kmieni llum ONE News irraporta li fost id-deputati li sfiduċjaw lil Delia għaddejja ġirja kontra l-ħin biex ikun hemm il-persuna li tidħol flok Adrian Delia fil-kariga ta’ Kap tal-Oppożizzjoni.

Dan għaliex il-Parlament dalwaqt jaġġorna għall-btajjel tas-sajf u b’hekk Delia jista’ jibqa’ Kap tal-Oppożizzjoni almenu sakemm il-Parlament jerġa’ jibda jiltaqa’ wara s-sajf.

Diversi rapporti qed isemmu lil Claudio Grech bħala l-favorit li jkun Kap tal-Oppożizzjoni flok Adrian Delia.

Ilbieraħ il-Kap Nazzjonalista Adrian Delia qal li ser ikun qed jibqa’ Kap tal-Oppożizzjoni anki jekk tilef vot ta’ fiduċja u aċċenna li d-deputati ma ressqu l-ebda isem floku.

ONE News għandu informazzjoni li dawn id-deputati se jmorru b’isem li huma għandhom fiduċja fih biex isir Kap tal-Oppożizzjoni.

Is-sorsi tagħna qalu li l-pjan huwa li lil Delia jaqtgħulu rasu u jneħħulu l-kariga kostituzzjonali li għandu u b’hekk anki jitlef mill-viżibilità li jkollu fix-xena politika hekk kif jibqa’ biss Kap tal-Partit Nazzjonalista.

Il-ħsieb huwa li fil-Parlament u anki f’dibattiti ta’ portata nazzjonali u parlamentari, Delia ma jkollux saħħa hekk kif id-diskussjoni tilħaq l-ogħla livelli bejn Prim Ministru u Kap tal-Oppożizzjoni.

Adrian Delia wera biċ-ċar li mhux se jitlaq minn Kap tal-partit u qal li se jibqa’ Kap tal-Oppożizzjoni għaliex id-deputati li sfiduċjawh ma tawx isem min jidħol floku fil-kariga ta’ Kap tal-Oppożizzjoni.

Osservaturi politiċi li tkellmu ma’ dan l-istazzjon qalu li dan huwa xenarju politiku ġdid f’Malta fejn se jkollok sitwazzjoni ta’ Gvern u Oppożizzjoni maqsuma f’ħafna biċċiet.

Dan hekk kif se jkollok Oppożizzjoni magħmula minn 19-il deputat u oħra ftit iżgħar bi 11-il deputat immexxija minn Adrian Delia.

Marlene Farrugia u Godfrey Farrugia, iż-żewġ deputati tal-Partit Demokratiku li fl-aħħar elezzjoni ġenerali ħadu siġġu bis-saħħa tal-Partit Nazzjonalista mmexxi minn Simon Busuttil, f’koalizzjoni mlaqqma dik tal-konfużjoni, mistennija wkoll jagħtu l-appoġġ lill-grupp ta’ Oppożizzjoni ta’ kontra Delia.

L-istess osservaturi kkummentaw li issa l-fazzjonijiet fil-Partit Nazzjonalista kibru fejn għandek qasma aktar evidenti u fil-beraħ ta’ Partit Nazzjonalista mmexxi minn Adrian Delia u Partit Nazzjonalista defacto li jkun mmexxi minn Kap tal-Oppożizzjoni li tagħżel il-maġġoranza tad-deputati fl-Oppożizzjoni.