အာရက္ခတပ်တော်၊ ရိုဟင်ဂျာလက်နက်ကိုင်အရေးနဲ့ ဘင်္ဂလားဒေ့ရှ်စစ်တပ် ရပ်တည်မှု - BBC News မြန်မာ

Описание: ရခိုင်ထဲက အခြေအနေတွေကို တရုတ်တင်မက အမေရိကန်ကပါ စိတ်ဝင်စား နေသလား ဆိုတဲ့ အပေါ် ဘီဘီစီ အနေနဲ့ အခု ကာလတွေမှာ ဆက်တိုက် ဆန်းစစ် သုံးသပ်နေခဲ့ပါတယ်။

ဒီသီတင်းပတ်တွေ အတွင်းမှာပဲ အမေရိကန်ရဲ့ ကုလသမဂ္ဂဆိုင်ရာ အဆင့်မြင့် ကိုယ်စားလှယ် တစ်ယောက် ဆီကနေ ကုလအစည်းအဝေး တစ်ခုအတွင်း ရိုဟင်ဂျာ ဒုက္ခသည် အရေးနဲ့ ပတ်သက်ပြီး ရခိုင်ထဲက အခြေအနေတွေနဲ့ အာရက္ခတပ်တော် အေအေ အကြောင်း တိုက်ရိုက် ထည့်သွင်း ပြောဆိုတာမျိုး ပြုလုပ်တာ တွေ့ရပါတယ်။

ပြောတဲ့သူက စီးပွားရေးနဲ့ လူမှုရေး ဆိုင်ရာ ကုလသမဂ္ဂ ကောင်စီမှာ အမေရိကန် ပြည်ထောင်စုရဲ့ ယာယီ ကိုယ်စားလှယ် အဖြစ် ပါဝင် နေတဲ့ ဂျွန်နသန် ရှရိုင်ယာ Jonathan Shrier ဖြစ်ပါတယ်။ သူပြောတာတွေမှာ အရေးကြီးပြီး စိတ်ဝင်စား စရာအကောင်းဆုံး အချက်ကတော့ ရခိုင်ထဲက နေရာအားလုံးနီးပါးကို လက်ရှိ ထိန်းချုပ်ထားတာ အာရက္ခတပ်တော် အေအေ ဖြစ်တယ် ဆိုတဲ့ အချက်ကို အသိအမှတ်ပြုပြီး ထည့်ပြောသွားပါတယ်။

ဘင်္ဂလားဒေ့ရှ်နိုင်ငံရောက် ရိုဟင်ဂျာ ဒုက္ခသည်တွေ နေရပ်ရင်း ပြန်နိုင်ရေး အတွက် ညှိနှိုင်း ဆွေးနွေးကြတဲ့ အခါ ရခိုင်ထဲက နေရာ အားလုံးကို ထိန်းချုပ်ထားတဲ့ အေအေ အပါအဝင် သက်ဆိုင်ရာ အဖွဲ့အစည်း အသီးသီး အနေနဲ့ ပါဝင်ပတ်သက်ပြီး၊ အကြံပြု ဆွေးနွေးတာတွေ ရှိနေဖို့ အင်မတန် အရေးကြီးလှတယ်လို့ အမေရိကန် အရာရှိက ပြောသွားပါတယ်။
ရိုဟင်ဂျာ ဒုက္ခသည်အရေး ဖြေရှင်းနိုင်ဖို့ ဆိုရင် အေအေနဲ့ကြား ထိတွေ့ဆက်ဆံဖို့ လိုတယ် ဆိုတဲ့ အမေရိကန်ရဲ့ ရပ်တည်မှုဟာ မိုဟာမက်ဒ် ယူနွတ်စ် ဦးဆောင်တဲ့ လက်ရှိ ဘင်္ဂလားဒေ့ရှ် အိမ်စောင့် အစိုးရနဲ့ ထပ်တူ ညီနေတာ တွေ့ရပါတယ်။

ယူနွတ်စ် အစိုးရဟာ အေအေနဲ့ ထိတွေ့ ဆက်ဆံမှုတွေ တည်ဆောက်ထားပြီး အခု နှစ် အစောပိုင်းတွေမှာ နှစ်ကြိမ်ထက် မနည်း တွေ့ဆုံထားတယ်လို့ ဘီဘီစီရဲ့ သတင်းရင်းမြစ်တွေက ပြောပါတယ်။ သိသာတဲ့ တိုးတက်မှုတွေတော့ ရှိမနေသေးပါဘူး။

တချိန်တည်းမှာပဲ ကုလ အတွင်းရေးမှူးချုပ် အန်တိုနီယို ဂူတားရက်စ် ကလည်း တိုက်တွန်းနေတဲ့ ဘင်္ဂလားဒေ့ရှ် ထဲကနေ ရခိုင်မြောက်ပိုင်းဆီကို သွားတဲ့ စာနာမှု လမ်းကြောင်း ဖော်ဆောင်ရေး ဆိုတဲ့ ကိစ္စလည်း ရှိနေပြန်ပါတယ်။ အဲဒါကို ယူနွတ်စ် အစိုးရကလည်း မူအရ သဘောတူထားပါတယ်။ အဲဒီလို လမ်းကြောင်းမျိုး ဖော်ဖို့ ဆိုရင်လည်း အေအေနဲ့ ကြား ထိတွေ့ဆက်ဆံဖို့ ဆိုတာ မဖြစ်မနေ လိုအပ်နေပါတယ်။

ဒါပေမယ့် အဲဒီမူဝါဒနဲ့ အစီအစဥ်အပေါ် ဘင်္ဂလားဒေ့ရှ် စစ်တပ်ကတော့ အပြင်းအထန် ဆန့်ကျင် ဝေဖန်ပါတယ်။ ဒါ့အပြင် အခု ကာလတွေမှာ ဘင်္ဂလားဒေ့ရှ်နိုင်ငံထဲက ရိုဟင်ဂျာ ဒုက္ခသည် စခန်းတွေထဲ လက်နက်ကိုင် အဖွဲ့တွေရဲ့ စစ်သားသစ် စုဆောင်းတဲ့ လှုပ်ရှားမှုတွေ အရှိန်အဟုန်နဲ့ ရှိလာနေပါတယ်။

ရိုဟင်ဂျာ လက်နက်ကိုင်တွေရဲ့ လှုပ်ရှားမှုတွေကို ဘင်္ဂလားဒေ့ရှ် စစ်တပ်က ဖြစ်စေ၊ စစ်ထောက်လှမ်းရေးက ဖြစ်စေ နောက်ကွယ်မှာ ကျောထောက်နောက်ခံ ပြုပေးထားသလား ဆိုတဲ့ အမြင်မျိုး အေအေဆီမှာ အတိုင်းအတာ တစ်ခု အထိ ရှိနေတယ် ဆိုတဲ့ ဆန်းစစ်ချက်တွေ ရှိနေပါတယ်။ ဒါ့ကြောင့်လည်း အေအေနဲ့ ဘင်္ဂလားဒေ့ရှ်ကြား ဆက်ဆံရေး ရှေ့မတိုးနိုင် ဖြစ်နေရတယ်လို့ ဆိုပါတယ်။

အဲဒီလို ပေါ်ပေါက်နေတဲ့ အခြေအနေတွေ အရပ်ရပ် အပေါ် မူတည်ပြီး ဘင်္ဂလားဒေ့ရှ် စစ်တပ်ရဲ့ ရပ်တည်မှု သဘောထားတွေနဲ့၊ ရိုဟင်ဂျာ လက်နက်ကိုင်တွေရဲ့ လှုပ်ရှားမှုတွေ အကြောင်း ဒီတစ်ပတ် သတင်းမြင်ကွင်း အစီအစဥ်မှာ ကျယ်ကျယ်ပြန့်ပြန့် ဆွေးနွေးထားပါတယ်။

ဒီတစ်ပတ် ပါဝင် ဆွေးနွေး ကြသူတွေကတော့ ... စစ်တွေမြို့ ဘင်္ဂလားဒေ့ရှ် ကောင်စစ်ဝန်ရုံးကို ဦးဆောင်ခဲ့သူလည်းဖြစ်၊ ကိုယ်တိုင် ဘင်္ဂလားဒေ့ရှ် စစ်တပ်ထဲမှာ တာဝန်ထမ်းဆောင်ခဲ့သူလည်း ဖြစ်တဲ့ ဗိုလ်မှူးဟောင်း အင်မ်ဒါဒွလ် အစ္စလာမ်နဲ့ နိုင်ငံတကာ ပဋိပက္ခတွေ ဖြေရှင်းရေး ICG ရဲ့ မြန်မာနဲ့ ဘင်္ဂလားဒေ့ရှ်အရေး ဆိုင်ရာ အကြီးတန်းအကြံပေး တွမ်ကီးန် တို့ ဖြစ်ပါတယ်။

ဘီဘီစီ သတင်းထောက် ကိုဝေဖြိုး စီစဥ် တင်ဆက်ထားတာကို ဇွန်လ ၂၁ ရက်၊ စနေည မြန်မာစံတော်ချိန် ည ၈ နာရီမှာ ဘီဘီစီမြန်မာပိုင်းရဲ့ ဖေ့စ်ဘုတ်စာမျက်နှာနဲ့ ည ၈ နာရီခွဲ အချိန် ဘီဘီစီမြန်မာပိုင်းရဲ့ ယူကျုချန်နယ် တို့ကနေ ထုတ်လွှင့်ပေးမှာမို့ စောင့်မျှော်ကြည့်ရှု နိုင်ကြပါတယ်။ #ဘီဘီစီမြန်မာပိုင်း #သတင်းမြင်ကွင်း