08/12/2016

Описание: დღეს რუსთავის მერიასთან მორიგი აქცია გაიმართა. ახალგაზრდები რუსთავი-თბილისის მიმართულებით სამარშრუტო ტაქსებზე სტუდენტური ტარიფის შემოღებას ითხოვდნენ. აქციაში ძირითადად ,,თავისუფალი ზონის“ რუსთავის ორგანიზაციისა და ,,ნაციონალური მოძრაობის“ ახალგაზრდული ფრთის წარმომადგენლები არიან ჩართულები. ახლგაზრდებთან დღეს რუსთავის მერის მოადგილე დავით ლობჟანიძე ჩავიდა, რომელმაც მათ შენობაში შესვლა და სოციალური ბიუჯეტის ერთობლივად განხილვა კიდევ ერთხელ შესთავაზა. აქციის მონაწილეები ამ წინადადებას დღეს უკვე დათანხმდნენ და ქალაქის მერს, დავით ჯიქიას შეხვდნენ. თუმცა, ქალაქის მერთან შეხვედრაზე მოსულ აქციის ორგანიზატორებს - ნაციონალური მოძრაობის წევრ გურამ ლაცაბიძესა და ჯუმბერ მგელაძეს, სტუდენტური ტარიფისა და რუსთავი-თბილისის სამარშრუტო ხაზზე ტრანსპორტით მგზავრობის საფასურის მომატების შესახებ არ უსაუბრიათ. მათი საუბრის ძირითადი თემა, მერიის წინ არსებული შადრევნის დაცვისთვის გაწეული ხარჯი და თვითმმართველობის თანამშრომლების პრემიები იყო, რაზეც ქალაქის მერმა განაცხადა, რომ 2017 წლის ბიუჯეტში პრემიებისთვის თანხა გათვალისწინებული არ არის. საბოლოოდ, აქციის მონაწილეებმა შეხვედრა ისე დატოვეს, რომ სტუდენტური ტარიფის დაწესების შესახებ არც კითხვა დაუსვამთ და შესაბამისად, არც პასუხით არ დაინტერესებულან. შეხვედრის შემდეგ, მედიასთან გაკეთებულ განცხადებაში, რუსთავის მერმა 2017 წლისთვის მერიის მიერ დაგეგმილ სოციალურ პროგრამებზე და მათ შორის პრიორიტეტულ პროექტებზე ისაუბრა. დავით ჯიქიამ დეტალურად განიხილა ის პროგრამაც, რომელიც უშუალოდ სტუდენტების დახმარებისკენ და მათი მგზავრობის ხარჯის დაფარვისკენ არის მიმართული და რომელიც სოციალურად დაუცველი, მრავალშვილიანი, იძულებით გადაადგილებული ოჯახების წევრ, ასევე შეზღუდული შესაძლებლობების მქონე სტუდენტებს ყოველთვიურად 50 ლარით აფინანსებს.