Oğuzda Xocalı soyqırımının otuz dördüncü ildönümü ilə əlaqədar tədbir keçirilib

Описание: 1992-ci il fevralın 26-da baş vermiş Xocalı soyqırımı faciəsinin 34-cü ildönümü ilə əlaqədar Oğuz rayonunda geniş silsilə anım tədbirləri keçirilmişdir.
Tədbirlər rayonun İƏD üzrə nümayəndəliklərində, Şəki-Zaqatala Regional Təhsil İdarəsinin Oğuz rayonu üzrə təhsil sektorunun tabeliyində fəaliyyət göstərən ümumtəhsil müəssisələrində, Heydər Əliyev Mərkəzində, rayon Uşaq-Gənclər İnkişaf Mərkəzində, Tarix-Diyarşünaslıq Muzeyində, Şəki-Zaqatala Regional Gənclər və İdman İdarəsinin Oğuz rayonu üzrə gənclər və idman sektorunda, həmçinin Mərkəzləşdirilmiş Kitabxana Sistemi və onun filiallarında birgə təşkil olunmuşdur.
Keçirilən tədbirlərdə Xocalı faciəsi qurbanlarının və Vətən uğrunda canlarını fəda etmiş bütün şəhidlərin əziz xatirəsi bir dəqiqəlik sükutla yad edilmişdir. Çıxışlarda faciənin tarixi-siyasi mahiyyəti, beynəlxalq hüquq baxımından qiymətləndirilməsi və şəhidlərin xatirəsinin daim uca tutulacağı xüsusi vurğulanmışdır.
Tədbirlər çərçivəsində faciəyə həsr olunmuş rəsm sərgiləri, anım yığıncaqları, bilik yarışları və videoçarx nümayişləri təşkil edilmiş, şagirdlərə Xocalı həqiqətləri haqqında ətraflı məlumat verilmişdir. Eyni zamanda, gənc nəslin vətənpərvərlik ruhunda tərbiyəsinin gücləndirilməsinin vacibliyi diqqətə çatdırılmışdır.
Keçirilən anım tədbirləri gənclərin tarixi həqiqətlər barədə maarifləndirilməsi, milli yaddaşın qorunması və Xocalı həqiqətlərinin geniş ictimaiyyətə çatdırılması baxımından xüsusi əhəmiyyət daşıyır. Xocalı şəhidlərinin xatirəsi daim qəlblərdə yaşayacaq və ehtiramla anılacaqdır.
#oguzrayonicrahakimiyyeti
#oguzda
#XocalıSoyqırımı
#XocalıyaƏdalət
#26Fevral1992