វិភាគអន្តរជាតិ៖ ឆ្នាំទី១នៃអាណត្តិទី២របស់លោក ត្រាំ សម្ព័ន្ធមិត្តរបស់អាមេរិកនាំគ្នាសម្រុកទៅចិន

Описание: 🔥វិភាគអន្តរជាតិ៖ ឆ្នាំទី១នៃអាណត្តិទី២របស់លោក ត្រាំ សម្ព័ន្ធមិត្តរបស់អាមេរិកនាំគ្នាសម្រុកទៅចិន

(ប៉េកាំង)៖ ក្នុងពេលដែលប្រធានាធិបតីអាមេរិក លោក ដូណាល់ ត្រាំ បានបង្កភាពរកាំរកូសជាមួយសម្ព័ន្ធមិត្តខ្លួនឯង ក្នុងនោះរួមមានទាំងការគំរាមគ្រប់គ្រងដែនដី Greenland និងការធ្វើសង្រ្គាមពាណិជ្ជកម្មជាមួយ កាណាដា ចិនឯណោះវិញបានចាប់យកឱកាសស្ដារទំនាក់ទំនងជាមួយសម្ព័ន្ធមិត្តសំខាន់ៗរបស់សហរដ្ឋអាមេរិក ដោយលោក ស៊ី ជីនពីង មមាញឹកយ៉ាងខ្លាំងកាលពីប៉ុន្មានសប្ដាហ៍ថ្មីៗនេះក្នុងការទទួលស្វាគមន៍ ដំណើរទស្សនកិច្ចរបស់មេដឹកនាំលោកខាងលិចទាំងនោះដែលកំពុងព្យាយាមស្ដារឡើងវិញដូចគ្នានូវទំនាក់ទំនង និងកិច្ចសហប្រតិបតិ្តឱ្យកាន់តែស៊ីជម្រៅជាមួយមហាអំណាចសេដ្ឋកិច្ចលេខ២ នៅលើពិភពលោក។
មេដឹកនាំនៃប្រទេសជាសម្ព័ន្ធមិត្តជិតស្និទ្ធមួយចំនួនរបស់សហរដ្ឋអាមេរិកដូចជានាយករដ្ឋមន្ត្រីអង់គ្លេស លោក Keir Starmer និងនាយករដ្ឋមន្ត្រីកាណាដា លោក Mark Carney ព្រមទាំងនាយករដ្ឋមន្ត្រីហ្វាំងឡង់ លោក Petteri Orpo បានបំពេញទស្សនកិច្ចទៅកាន់ទីក្រុងប៉េកាំង ជួបលោក ស៊ី ជីនពីងកាលពីខែមករា។ ប្រធានាធិបតីបារាំង លោក អេម៉ានុយអែល ម៉ាក្រុង ក៏បានបំពេញទស្សនកិច្ចទៅកាន់ប៉េកាំងផងដែរ កាលពី ខែធ្នូកន្លងទៅ ខណៈអធិការបតីអាល្លឺម៉ង់ លោក Friedrich Merz ត្រូវបានរំពឹងថានឹងធ្វើទស្សនកិច្ចទៅចិនឆាប់ៗ។ សម្រាប់ចិន ដំណើរទស្សនកិច្ចទាំងនេះជាសញ្ញាមួយបង្ហាញថាយុគសម័យមួយនៃការជជែកពី ការកាត់ផ្ដាច់ទំនាក់ទំនងសេដ្ឋកិច្ចចេញពីចិនកំពុងថមថយសន្ទុះ ហើយមេដឹកនាំលោកខាងលិចនៅចុងបញ្ចប់នៅតែសម្លឹងឃើញចិនជាដៃគូមួយគួរឱ្យទុកចិត្តបាន ផ្ទុយពីសហរដ្ឋអាមេរិកនៅក្រោមការដឹកនាំរបស់លោក ដូណាល់ ត្រាំ។
ដូច្នេះតើនេះជាទីបញ្ចប់នៃការប្រឈមមុខជាសមូហភាពមែនឬទេ?
ដំណើរទស្សនកិច្ចជាបន្តបន្ទាប់របស់បណ្ដាមេដឹកនាំលោកខាងលិចទៅកាន់ទីក្រុងប៉េកាំង ត្រូវបានក្រុមអ្នកវិភាគខ្លះមើលឃើញថាជាឱកាសមួយរបស់ចិនដើម្បីជួសជុលទំនាក់ទំនងឡើងវិញជាមួយមហាអំណាចសេដ្ឋកិច្ច លោកខាងលិចសំខាន់ៗ។ ក្នុងដំណើរទស្សនកិច្ចរបស់លោកដែលជាលើកដំបូងបំផុតរបស់នាយករដ្ឋមន្ត្រីកាណាដាម្នាក់ចាប់តាំងពីឆ្នាំ២០១៧មក លោក Carney បានបន្ធូរបន្ថយការរឹតបន្តឹងពន្ធគយលើរថយន្តអគ្គីសនី ផលិតដោយចិនដែលកាណាដាធ្លាប់បានដំឡើងជាថ្នូរឱ្យសហរដ្ឋអាមេរិកបន្ធូរបន្ថយពន្ធគយលើទំនិញកសិកម្មរបស់កាណាដា។ ដោយឡែក ចិន និងសហភាពអឺរ៉ុបកាលពីខែមករា បានឈានដល់កិច្ចព្រមព្រៀងមួយដើម្បី ជំនួសការដំឡើងពន្ធគយលើរថយន្ដអគ្គិសនីចិន ជាមួយការប្ដេជ្ញាចិត្តលក់ក្នុងតម្លៃសមរម្យ ដែលនេះបានបន្ធូរបន្ថយជម្លោះយូរអង្វែងមកហើយដោយសារតែការព្រួយបារម្ភរបស់សហភាពអឺរ៉ុបថារថយន្ដអគ្គិសនីចិនដែល មានតម្លៃថោកអាចនឹងបំផ្លាញឧស្សាហកម្មរថយន្តក្នុងស្រុករបស់ពួកគេ។
ចំណែក នាយករដ្ឋមន្ត្រីអង់គ្លេស លោក Starmer នៅក្នុងដំណើរទស្សនកិច្ចជាលើកដំបូងទៅកាន់ចិនក្នុងនាមជាមេដឹកនាំអង់គ្លេសម្នាក់ក្នុងពេល៨ឆ្នាំមកនេះ បានកោតសរសើរពីឱកាសពាណិជ្ជកម្មនៅក្នុងប្រទេសចិន សម្រាប់ចក្រភពអង់គ្លេស ប៉ុន្មានថ្ងៃបន្ទាប់ពីរដ្ឋាភិបាលរបស់លោកបើកភ្លើងបៃតងឱ្យចិនពង្រីកទីតាំងស្ថានទូតនៅក្បែរសង្កាត់ហិរញ្ញវត្ថនៃទីក្រុងឡុងដ៍។ តាមលោក Steve Tsang ជានាយកវិទ្យាស្ថាន SOAS China Institute មានមូលដ្ឋានក្នុងទីក្រុងឡុងដ៍ ដំណើរទស្សនកិច្ចរបស់បណ្ដាមេដឹកនាំអឺរ៉ុបទៅកាន់ប្រទេសចិនថ្មីៗនេះបានបង្ហាញពីភាពប្រាកដនិយមរបស់ពួកគេចំពោះចិន។ លោកយល់ឃើញថាការមិនជឿទុកចិត្តចំពោះចិន នៅតែមានភាពស៊ីជម្រៅ ជាពិសេសពាក់ព័ន្ធនឹងការគាំទ្ររបស់ចិនចំពោះសង្រ្គាមរបស់រុស្ស៉ីនៅអ៊ុយក្រែន។ ក៏ប៉ុន្តែមេដឹកនាំអឺរ៉ុបមិនអាចអើពើនឹងចិនបានឡើយក្នុងពេលពួកគេបាត់បង់ជំនឿចិត្តលើសហរដ្ឋអាមេរិករបស់ លោក ដូណាល់ ត្រាំ។
ជាការពិតណាស់ មេដឹកនាំអឺរ៉ុបតួយ៉ាងដូចជាលោក Starmer បានទទូចថាទំនាក់ទំនងពាណិជ្ជកម្មជាមួយចិន មិនមែនយកសន្តិសុខជាតិទៅដោះដូរនោះទេ។ តែទោះជាបែបនេះក្ដី វានៅតែមានសុទិដ្ឋិនិយម នៅក្នុង ប្រទេសចិន។ «មេដឹកនាំលោកខាងលិចមួយចំនួន នៅក្រោមការដឹកនាំរបស់សហរដ្ឋអាមេរិកបានព្យាយាមស្វែងរកការប្រឈមមុខជាសមូហភាពប្រឆាំងនឹងចិន និងកាត់ផ្ដាច់ទំនាក់ទំនងលែងពឹងផ្អែកគ្នាចេញពីចិន។ ប៉ុន្តែ ការពិតដែលបានកើតឡើងម្ដងហើយម្ដងទៀតបានបង្ហាញថាទ្រឹស្តីកាត់ផ្ដាច់ទំនាក់ទំនង និងសង្រ្គាមត្រជាក់ថ្មី មិនត្រឹមតែគ្មានប្រជាប្រិយភាពទេ តែថែមទាំងពិបាកនឹងកើតឡើងទៀតផង»។ នេះជាការយល់ឃើញរបស់ លោក Wang Wen ជាសាស្ត្រាចារ្យម្នាក់មកពីសាកលវិទ្យាល័យ Renmin ក្នុងទីក្រុងប៉េកាំង។
សណ្ដាប់ធ្នាប់ពិភពលោកថ្មីមួយ
ក្រុមអ្នកវិភាគចិនជាច្រើនបាននិយាយថាការដែលសហរដ្ឋអាមេរិកដើរចេញពីស្ថាប័នអន្តរជាតិ តួយ៉ាងទីភ្នាក់ងាររបស់អង្គការសហប្រជាជាតិ (UN) ជាច្រើន គួបផ្សំនឹងកិច្ចប្រឹងប្រែងរបស់លោក ត្រាំ ដើម្បីបង្កើត «ក្រុមប្រឹក្សាសន្តិភាព» ដែលហាក់ដូចជាលោកចង់ឱ្យដើរតួនាទីជំនួស UN នឹងជំរុញឱ្យអឺរ៉ុបកាន់តែត្រូវការចិនក្នុងការការពារប្រព័ន្ធពហុភាគីនិយម។ «ដើម្បីការពារប្រព័ន្ធពហុភាគីនិយម អឺរ៉ុបប្រហែលជានឹងចាំបាច់ ត្រូវការសម្រុះសម្រួលជាមួយចិនលើបញ្ហាសេដ្ឋកិច្ច និងពាណិជ្ជកម្ម»។ នេះជាការលើកឡើងរបស់លោក Ye Weimian ជាអ្នកស្រាវជ្រាវម្នាក់មកពីសាកលវិទ្យាល័យ Chinese University of Hong Kong។ តែយ៉ាងណាក៏ដោយ ចិនបានច្រានចោលនិទានកថាដែលថាខ្លួនមានគោលបំណងកេងចំណេញផលប្រយោជន៍ពីជម្លោះរវាងសហរដ្ឋអាមេរិក និងសម្ព័ន្ធមិត្តរបស់ខ្លួន។ ពោលទំនាក់ទំនងល្អនៅពេលនេះគឺជាភស្តុតាង បញ្ជាក់អំពីតម្រូវការលើទីផ្សារចិន និងចក្ខុវិស័យរបស់ចិនចំពោះពិភពលោក។ ក្រុមអ្នកវិភាគចិនក៏បានគូសបញ្ជាក់ដែរថាភាពធូរស្រាលនៃជម្លោះរបស់សហរដ្ឋអាមេរិកជាមួយចិនក៏ទទួលស្គាល់ពីការពិតនេះដែរ។ ចិន និងសហរដ្ឋអាមេរិកបានឈានដល់កិច្ចព្រមព្រៀងមួយដើម្បីបន្ធូរបន្ថយភាពតានតឹងពាណិជ្ជកម្មកាលពីឆ្នាំ២០២៥ បន្ទាប់ពីចិនបានយកសន្លឹកបៀរនៃការបញ្ឈប់ការនាំចេញរ៉ែកម្រ ក្នុងការដាក់សម្ពាធលើរដ្ឋបាលរបស់ លោក ត្រាំ។ កាន់តែសំខាន់ជាងនេះទៅទៀតសម្រាប់ប៉េកាំង នោះគឺសហរដ្ឋអាមេរិកបានដើរចេញពីការចាត់ទុកចិនជាសត្រូវមនោគមន៍វិជ្ជា ហើយងាកមកចាត់ទុកចិនជាគូប្រជែងធម្មតាមួយនៅក្នុងសេដ្ឋកិច្ច និងយុទ្ធសាស្ត្រ។