"စစ်ဖိနပ်အောက်မှာ ဘယ်တော့မှဒူးမထောက်နဲ့ "

Описание: "စစ်ဖိနပ်အောက်မှာ ဘယ်တော့မှဒူးမထောက်နဲ့ "
(တော်လှန်ရေးနှိုးဆော်သံ)

မနက်ဖြန်ဆိုရင် ကျောင်းသားခေါင်းဆောင် ဆလိုင်းတင်မောင်ဦးကို စစ်အာဏာရှင်တွေကြိုးပေးခဲ့တာ ၄၇နှစ်ရှိခဲ့ပြီဖြစ်တယ်။ ၁၉၆၂ အာဏာရှင်နေဝင်း အာဏာသိမ်းပြီးကတည်းက မျိုးဆက်တစ်ခုပြီးတစ်ခု အာဏာရှင်ကိုဆန့်ကျင်ခဲ့တာ ဒီကနေ့အထိတိုက်ပွဲဝင်နေရဆဲဖြစ်တယ်။ စစ်အာဏာရှင်တွေဟာလည်း အာဏာရှင်စနစ်ကို အမြစ်တွယ်နေအောင် မျိုးဆက်တစ်ဆက်ပြီး တစ်ဆက်ပြီးတစ်ဆက် ရိုက်သွင်းလာခဲ့တာလည်း ဒီအနေ့အထိဖြစ်တယ်။
ပြည်သူ့ဆီက လာရမယ့် အာဏာကို သေနတ်ပြောင်းဝဆီကလာရမယ်ဆိုတဲ့ စိတ်ကိုရိုက်သွင်းနေဆဲဖြစ်တယ်။

ပြည်သူတွေကိုလည်း အာဏာရှင်စနစ်အောက်မှာ ဝပ်ပြား နေအောင် စိတ်ဓါတ်တွေရိုက်ခြိုးပြီး အကြောက်တရားကိုဖော်ဆောင်နေဆဲဖြစ်တယ်။ အာဏာဆိုတာ တပ်ပိုင်ဆိုတဲ့ စိတ်ကို စစ်ကျွန်ပညာရေးစနစ်နဲ့ ရိုက်သွင်းလာတာ ဒီကနေ့အထိဖြစ်တယ်။ တပ်ဆိုရင် အုပ်ချုပ်သူဖြစ်တယ်ဆိုတဲ့ စိတ်ကို စစ်ကျွန်ပညာရေးနဲ့ ရိုက်သွင်းနေဆဲဖြစ်တယ်။

စစ်အာဏာရှင်စနစ်ကိုဆန့်ကျင်တော်လှန်တဲ့လူတွေကို ညှင်းပန်းနှိပ်စက်သတ်ဖြတ်ပြီး လူထုတစ်ရပ်လုံးကို အကြောက်တရားရိုက်သွင်းလာတာ ဆလိုင်တင်မောင်ဦးကနေ ဒီအချိန်ထိဖြစ်တယ်။

အာဏာရှင်လက်အောက်ပြန်ရောက်တိုင်း လူထုဘဝတွေဟာ လူမွှေးလူရောင်မပြောင်ပဲ အမြဲစုတ်ပြတ်သွားတာလည်း ဒီကနေ့အထိဖြစ်တယ်။ အညွန့်တလူလူတက်နေတဲ့ တိုင်းပြည်ဟာ အာဏာပြန်သိမ်းခံလိုက်ရတာနဲ့ အခုနှစ်နှစ်အတွင်းမှာ စီးပွားရေး လူမှုရေး အဘက်ဘက်က ဇောက်ထိုးနိမ့်ကျနေတာ ခင်ဗျားတို့ ကျွန်တော်တို့အားလုံးလက်တွေ့ခံစားနေရတာ သက်သေဖြစ်တယ်။

ခေတ်အဆက်ဆက် စိုးမိုးအနိုင်ကျင့်လာတဲ့ စစ်အာဏာရှင်စနစ်အပါအဝင် ဘယ်အာဏာရှင်စနစ်အောက်မှာမှ ကျွန်တော်တို့နေလို့မရဘူး။ သူတို့လိုချင်တဲ့အကြောက်တရားအောက်မှာ ခေါင်းငုံခံလို့မရဘူး။ အာဏာရှင်စနစ်ဆိုတာ အမြစ်ပြတ်အောင်ရှင်းရမယ်။ ဒီနိုင်ငံမှာ အာဏာရှင်စနစ်ဘယ်တော့မှ နလန်ပြန်မထအောင်လုပ်ရမယ်။

လွန်ခဲ့တဲ့ ၄၇ နှစ်က ဆလိုင်တင်မောင်ဦးပြောခဲ့သလိုပဲ “ မင်းတို့စစ်ဖိနပ်အောက်မှာ ငါတို့ ဘယ်တော့မှ ဒူးထောက်မှာမဟုတ်ဘူး” ဆိုတဲ့အတိုင်း ငါတို့တွေ အာဏာရှင်ရဲ့ စစ်ဖိနပ်တွေကို ဆက်ရိုက်ခြိုးရင်း ငါတို့အနာဂတ်ကို ငါတို့ တည်ဆောက်ကြပါစို့လို့ နှိုးဆော်လိုက်တယ်။

နွေဦးဈာန် (ဖက်ဒရယ် FM)

#RevolutionaryVoice #တော်လှန်ရေးနှိုးဆော်သံ
#ဆလိုင်းတင်မောင်ဦး