ევროპარლამენტი ნემცოვის მკვლელობის საერთაშორისო გამოძიებას ითხოვს

Описание: ევროპარლამენტი ბორის ნემცოვის მკვლელობის საერთაშორისო გამოძიებას ითხოვს. ევროკავშირის საკანონმდებლო ორგანომ შესაბამისი რეზოლუცია დღეს მიიღო.

ტექსტში ნათქვამია, რომ მიუკერძოებელი და ობიექტური გამოძიება გაერო-ს, ევროსაბჭოსა და ეუთო-ს დახმარებით უნდა ჩატარდეს.

რუსეთის თანამედროვე ისტორიაში ყველაზე გახმაურებული პოლიტიკური მკვლელობა, - ასე აფასებენ ევროპარლამენტარები რუს ოპოზიციონერზე მომხდარ თავდასხმას.

ევროპელი პოლიტიკოსები რუსეთს უკრაინელი მფრინავის, ნადეჟდა სავჩენკოს გათავისუფლებისაკენ და სამოქალაქო სექტორზე ზეწოლის შეწყვეტისაკენაც მოუწოდებენ.

„მოვუწოდებთ რუსეთის მთავრობას, შეწყვიტოს სამარცხვინო პროპაგანდა და საინფორმაციო ომი თავისი მეზობლების, დასავლეთისა და საკუთარი ხალხის წინააღმდეგ, რაც რუსეთს რეპრესიებისა და შიშის ქვეყნად აყალიბებს“, - ნათქვამია ევროპარლამენტის რეზოლუციაში.