លោក នេតាន់យ៉ាហ៊ូ ចាត់ទុកដីកាចាប់ខ្លួន របស់តុលាការព្រហ្មទណ្ឌអន្តរជាតិ ជារឿងដ៏គួរឲ្យស្អប់ខ្ពើម

Описание: នាយករដ្ឋមន្ត្រីអ៊ីស្រាអែល លោក នេតាន់ យ៉ាហ៊ូ បានថ្កោលទោស តុលាការព្រហ្មទណ្ឌអន្តរជាតិ (ICC) ជុំវិញដីកាចាប់ខ្លួនរបស់តុលាការនេះ និងបានចាត់ទុក ដីកានេះថា ជាបុរេវិនិច្ឆ័យប្រឆាំងនឹងជនជាតិជ្វីហ្វ។ នេះគឺបន្ទាប់ពី ICC បានចោទប្រកាន់ លោក និងអតីតរដ្ឋមន្ត្រីការពារជាតិ អ៊ីស្រាអែល ពីបទប្រព្រឹត្តឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។

ងាកទៅប្រតិកម្មរបស់សហរដ្ឋអាមេរិកវិញ, ភ្លាមៗ ក្រោយ ICC ចេញ ដីកាចាប់ខ្លួននេះ ប្រធានាធិបតីអាមេរិក លោក ចូ បៃដិន បានចាត់ទុកដីកានោះថា ជារឿងដ៏គួរឲ្យហួសចិត្ត។ តាមរយៈសេចក្តីថ្លែងការណ៍មួយ របស់ប្រធានាធិបតីជិតផុតអាណត្តិ លោក ចូ បៃដិន បានបញ្ជាក់ថា សហរដ្ឋអាមេរិក នឹងឈរជាមួយអ៊ីស្រាអែល ប្រឆាំងនឹងការគំរាមកំហែងសន្តិសុខជាតិអ៊ីស្រាអែល។ ដោយឡែក នៅពេលសំដៅដោយប្រយោលទៅលើការចេញដីកាចាប់ខ្លួនមេដឹកនាំហាម៉ាសវិញ, លោក ចូ បៃដិន ត្រូវបានដកស្រង់សម្ដីថា បើទោះបី ICC បញ្ជាក់ពីអ្វីក៏ដោយ វាមិនមានសមភាពទេ រវាងអ៊ីស្រាអែល និងហាម៉ាស។

ក្រៅពីនេះ អ្នកនាំពាក្យក្រុមប្រឹក្សាសន្តិសុខជាតិអាមេរិកម្នាក់ ក៏បានលើកឡើងថា សេតវិមាន «បដិសេធជាមូលដ្ឋាន» ចំពោះការអំពាវនាវចាប់ខ្លួននេះ។ លោកលើកឡើងថា «យើងនៅមានការព្រួយបារម្ភយ៉ាងខ្លាំង ចំពោះការប្រញ៉ាប់ប្រញាល់របស់រដ្ឋអាជ្ញានៅក្នុងការចេញដីកាចាប់ខ្លួននេះ ព្រមទាំងកំហុសនៅក្នុងដំណើរការផ្សេងទៀត ដែលនាំឱ្យមានការសម្រេចចិត្តនេះ។» លោកបន្ថែមដែរថា «សហរដ្ឋអាមេរិកច្បាស់ថា ICC មិនមានយុត្តាធិការលើបញ្ហានេះនោះទេ»។

ចំណែកឯ លោក Mike Waltz ដែលទំនងនឹងក្លាយជាទីប្រឹក្សាសន្តិសុខជាតិ របស់ប្រធានាធិបតី ដូណាល់ ត្រាំ ក៏បានបញ្ជាក់ ថា ICC មិនមានឥទ្ធិពលអ្វីទាំងអស់ដែរ។ លោកបានបង្ហាញជំហរ ការពារអ៊ីស្រាអែល និងសន្យាឆ្លើយតបយ៉ាងចាស់ដៃទៅនឹងអ្វី ដែលលោកហៅថា ជាបុរេវិនិច្ឆ័យលំអៀងប្រឆាំងនឹងជនជាតិអ៊ីស្រាអែល ដោយ ICC និង UN។

ជុំវិញរឿងនេះដែរ នាយករដ្ឋមន្ត្រី កាណាដាឯណោះវិញ បានបញ្ជាក់ថា កាណាដាគោរពនូវដីកាសម្រេចរបស់តុលាការព្រហ្មទណ្ឌអន្តរជាតិ ICC នេះ។ ថ្លែងតាមរយៈសន្និសីទសារព័ត៌មាន ឆ្លើយតបនឹងសំណួរពាក់ព័ន្ធនឹងបញ្ហាខាងលើ នាយករដ្ឋមន្ត្រីកាណាដា លោក Justin Trudeau បញ្ជាក់ថា វាគឺជារឿងសំខាន់ ដែលគ្រប់គ្នាត្រូវគោរពច្បាប់អន្តរជាតិ។

សូមជម្រាបជូនថា តុលាការព្រហ្មទណ្ឌអន្តរជាតិបានចេញដីកាចាប់ខ្លួនលោកនាយករដ្ឋមន្ត្រីអ៊ីស្រាអែល បេនយ៉ាមីន នេតាន់យ៉ាហ៊ូ និងអតីតរដ្ឋមន្ត្រីក្រសួងការពារជាតិអ៊ីស្រាអែល លោក Yoav Gallant ព្រមទាំងមេដឹកនាំហាម៉ាស់ Ibrahim Al-Masri ដោយរងការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ។ នេះបើយោងតាមការឱ្យដឹងរបស់តុលាការយុត្តិធម៌អន្តរជាតិ នៅថ្ងៃព្រហស្បតិ៍ម្សិលមិញ។

ចេញផ្សាយថ្ងៃទី២២ ខែវិច្ឆិកា ឆ្នាំ២០២៤
ប្រភព: DW (https://www.dw.com/en/netanyahu-rejec...)

Facebook:   / preah.khan.khmer  
Telegram: https://t.me/preah_khan
TikTok:   / preah_khan