Marlboroയുടെ Genius തന്ത്രം! Animated | machan animates

Описание: 1964 ജനുവരി 11. അന്നാണ് അമേരിക്കൻ ഗവൺമെന്റിന്റെ സർജൻ ജനറൽ, ലോകത്തെ മുഴുവൻ ഞെട്ടിച്ചുകൊണ്ട്, ചരിത്രപ്രസിദ്ധമായ ആ റിപ്പോർട്ട് പുറത്തുവിട്ടത്. ആ റിപ്പോർട്ടിലെ വരികൾ ഇതായിരുന്നു - "പുകവലി ശ്വാസകോശ ക്യാൻസറിന് കാരണമാകുന്നു".

ഇന്ന് 2024-ൽ ഇരിക്കുന്ന നമുക്ക് ഇതൊരു വലിയ കാര്യമായി തോന്നില്ല. കാരണം, ഓരോ സിഗരറ്റ് പാക്കറ്റിലും ഭയപ്പെടുത്തുന്ന ചിത്രങ്ങളും മുന്നറിയിപ്പുകളും നമ്മൾ കാണാറുണ്ട്. പക്ഷേ, 1964-ലേക്ക് ഒന്ന് തിരിച്ചുപോയി നോക്കൂ. അതൊരു ബോംബ് സ്ഫോടനത്തിന് തുല്യമായിരുന്നു. കാരണം, അന്നത്തെ കാലത്ത് സിഗരറ്റ് എന്നത് ഒരു ലഹരി മാത്രമായിരുന്നില്ല. അതൊരു 'ലൈഫ്സ്റ്റൈൽ' ആയിരുന്നു. ഡോക്ടർമാർ പോലും സിഗരറ്റ് വലിക്കുന്നത് ആരോഗ്യത്തിന് നല്ലതാണെന്ന് വിശ്വസിച്ചിരുന്ന, ഗർഭിണികൾക്ക് പോലും മാനസികാശ്വാസത്തിന് സിഗരറ്റ് നിർദ്ദേശിച്ചിരുന്ന ഒരു കാലഘട്ടമായിരുന്നു അത്.

എന്നാൽ, ഈ ഒരൊറ്റ റിപ്പോർട്ടോടുകൂടി എല്ലാം മാറിമറിഞ്ഞു. പുകയില വ്യവസായം അക്ഷരാർത്ഥത്തിൽ വിറച്ചുപോയി. ഏകദേശം 8 ബില്യൺ ഡോളർ ആസ്തിയുള്ള ആ വ്യവസായം ചീട്ടുകൊട്ടാരം പോലെ തകരാൻ തുടങ്ങി. ഈ വ്യവസായത്തെ നമ്പി ജീവിച്ചിരുന്ന കർഷകരും തൊഴിലാളികളുമടക്കം ഏഴര ലക്ഷത്തോളം കുടുംബങ്ങളുടെ വരുമാനം ഇല്ലാതാകുന്ന അവസ്ഥ. സിഗരറ്റ് കമ്പനികളുടെ ഓഹരികൾ കുത്തനെ ഇടിഞ്ഞു. ഭൂരിഭാഗം കമ്പനികളും പൂട്ടിക്കെട്ടാൻ തയ്യാറെടുത്തു. "ഇനിയാരും സിഗരറ്റ് വാങ്ങില്ല, ഈ ബിസിനസ്സ് തീർന്നു" എന്ന് ലോകം വിധിയെഴുതി.

പക്ഷേ... ഈ വൻ തകർച്ചയ്ക്കിടയിലും, അത്ഭുതകരമായ, അല്ലെങ്കിൽ അവിശ്വസനീയമായ ഒരു കാര്യം സംഭവിച്ചു. വമ്പൻ കമ്പനികൾ പോലും തകർന്നു വീഴുമ്പോൾ, വെറും 1% മാത്രം മാർക്കറ്റ് ഷെയർ ഉണ്ടായിരുന്ന ഒരു ചെറിയ, അധികമാരും അറിയപ്പെടാത്ത സിഗരറ്റ് കമ്പനി മാത്രം, ഈ വാർത്തയ്ക്ക് ശേഷം റോക്കറ്റ് പോലെ കുതിച്ചുയർന്നു! വെറും ഒരു വർഷം കൊണ്ട് അവർ ആരും തിരിഞ്ഞുനോക്കാത്ത ബ്രാൻഡിൽ നിന്നും ലോകത്തിലെ നാലാമത്തെ വലിയ സിഗരറ്റ് ബ്രാൻഡായി മാറി. അതുകൊണ്ടും തീർന്നില്ല, 1970-ൽ ടിവിയിൽ സിഗരറ്റ് പരസ്യങ്ങൾ നിരോധിച്ചപ്പോൾ, ബാക്കിയുള്ളവർ എന്ത് ചെയ്യണമെന്നറിയാതെ പകച്ചുനിന്നപ്പോൾ, ഈ കമ്പനി വീണ്ടും വളർന്നു. ഒടുവിൽ അവർ ലോകത്തിലെ ഏറ്റവും വലിയ സിഗരറ്റ് നിർമ്മാതാക്കളായി മാറി. ഇന്ന് അവരുടെ വലിപ്പം എത്രയാണെന്നോ? അവരുടെ തൊട്ടുതാഴെയുള്ള 10 എതിരാളികളെ ഒന്നിച്ചു ചേർത്താൽ പോലും ഈ ഒരൊറ്റ കമ്പനിയുടെ അടുത്തെത്തില്ല.

ഏതാണ് ആ ബ്രാൻഡ് എന്നല്ലേ? അതാണ് - മാർൽബോറോ!

ഇവിടെ ഒരു വലിയ ചോദ്യമുണ്ട്. സ്വന്തം ബിസിനസിനെ കൊല്ലാൻ വന്ന ഒരു റിപ്പോർട്ടിനെയും, ഗവൺമെന്റ് കൊണ്ടുവന്ന കടുത്ത നിരോധനങ്ങളെയും എങ്ങനെയാണ് ഇവർ തങ്ങൾക്ക് അനുകൂലമാക്കി മാറ്റിയത്? എങ്ങനെയാണ് ഈ ബ്രാൻഡ് 58 ബില്യൺ ഡോളറിന്റെ സാമ്രാജ്യമായി വളർന്നത്? ഇതിനൊരു ഉത്തരമേയുള്ളൂ. മനുഷ്യരാശി കണ്ടിട്ടുള്ളതിൽ വെച്ച് ഏറ്റവും ബുദ്ധിപരമായ, ഒരർത്ഥത്തിൽ പറഞ്ഞാൽ ഏറ്റവും ഭയപ്പെടുത്തുന്ന ഒരു മാർക്കറ്റിംഗ് തന്ത്രം. അതിനെ വിളിക്കുന്ന പേരാണ് - ലൈഫ്സ്റ്റൈൽ മാർക്കറ്റിംഗ്.

എന്താണ് ഈ ലൈഫ്സ്റ്റൈൽ മാർക്കറ്റിംഗ്? ഇത് വലിയൊരു ബിസിനസ് ടേം ഒന്നുമല്ല. ഇത് നമ്മുടെ നിത്യജീവിതത്തിൽ നടക്കുന്ന ഒരു കാര്യമാണ്. അത് മനസ്സിലാക്കാൻ നമുക്ക് അമേരിക്ക വരെ പോകേണ്ട കാര്യമില്ല. നമ്മുടെ തൊട്ടടുത്തുള്ള, നമ്മുടെ കുട്ടിക്കാലത്തെ ഒരു ഉദാഹരണമെടുക്കാം. നിങ്ങളൊരു 90s കിഡ് ആണെങ്കിൽ, അല്ലെങ്കിൽ സച്ചിൻ ടെണ്ടുൽക്കറുടെ കളി കണ്ട് വളർന്ന ആളാണെങ്കിൽ, ഉറപ്പായും ജീവിതത്തിൽ ഒരിക്കലെങ്കിലും ഒരു MRF ബാറ്റ് സ്വന്തമാക്കാൻ ആഗ്രഹിച്ചിട്ടുണ്ടാകും. അല്ലെങ്കിൽ നിങ്ങളുടെ ഫ്രണ്ട്‌സ് സർക്കിളിൽ ആരെങ്കിലും അത് വാങ്ങിയിട്ടുണ്ടാകും. സ്കൂൾ ഗ്രൗണ്ടിൽ ആ ബാറ്റ് കൊണ്ടുവരുന്നവൻ ആയിരുന്നു അന്ന് രാജാവ്.

ഒന്ന് ഓർത്തുനോക്കൂ... നിങ്ങൾ ആ ബാറ്റ് വാങ്ങാൻ സ്പോർട്സ് കടയിൽ പോയപ്പോൾ, നിങ്ങൾക്ക് 'ഇംഗ്ലീഷ് വില്ലോ' എന്താണെന്നോ 'കാശ്മീർ വില്ലോ' എന്താണെന്നോ വല്ല ധാരണയും ഉണ്ടായിരുന്നോ? ഇല്ല! ആ ബാറ്റ് ഏത് തടി കൊണ്ടാണ് ഉണ്ടാക്കിയതെന്ന് നിങ്ങൾ നോക്കിയോ? ഇല്ല! ബാറ്റിന്റെ ബാലൻസോ വെയ്റ്റോ നിങ്ങൾ നോക്കിയോ? അതുമില്ല!

നിങ്ങൾക്ക് ആകെ വേണ്ടത് ഒരു ബാറ്റ് ആയിരുന്നു. അവിടെ കടക്കാരൻ രണ്ട് ഓപ്ഷൻ വെക്കുന്നു: ഒന്ന്, സ്റ്റിക്കർ ഒന്നുമില്ലാത്ത, എന്നാൽ നല്ല ക്വാളിറ്റിയുള്ള സാധാ ബാറ്റ്. രണ്ട്, ചുവപ്പും കറുപ്പും നിറത്തിലുള്ള MRF സ്റ്റിക്കർ ഒട്ടിച്ച ബാറ്റ്. കണ്ണും പൂട്ടി നിങ്ങൾ MRF ബാറ്റ് തിരഞ്ഞെടുത്തു. അല്ലേ?

#malayalamanimation #MarketingStrategy #Business