Nis shtegtimi i tufave te dhenve, nga zonat e ngrohta drejt kullotave malore | ABC News Albania

Описание: Tani është stina që barinjtë e bariteve të imta lënë zonat e ngrohta dhe bashkë me tufat e tyre shtegtojnë drejt livadheve malore. ABC Neës ka përgatitur një reportazh ku barinjtë nga Dumreja shkojnë drejt maleve te Sopotit në Librazhd.  

 Lëne pas një një dimër të lodhshëm. Është koha kur bagëtitë shtegtojnë nga zonat e ngrohta drejt livadheve dhe kullotave malore.

Kjo tufë me rreth 1300  dele po  lëviz nga skaji më i largët i Dumresë ku kaloi muajt e ftohtë, drejt maleve të Sopotit në Librazhd.

Këmborët krijojnë një ansambël të veçantë kurse barinjtë kujdesen që gjithçka të shkojë mirë.

Ata lanë stanet e dimrit për tu rikthyer sërish në vjeshtë atje.

Vëllezërve Blloshmi u është dashur të sakrifikojnë për të ngritur një tufë të tillë.  Ai që po kujdeset për shtegtimin është Landi.

Land Blloshmi: “Nga viti në vit e kanë rritur vetë tufën duke investuar në shtimin e krerëve, në bazën ushqimore, në strehimin e bagëtisë po ashtu edhe në gjetjen e barinjve të zotë”.

Ka aplikuar për subvencione por shuma e përfituar është simbolike, 1000 lekë për cdo dele.  Por nuk ka për të hequr dorë dhe do të vazhdojë me këtë biznes.

Land Blloshmi: “Nga shërbimi veterinar kemi pasur mbështetje, ndërsa nga shteti kemi pasur probleme me subvencionet ku herë kemi marrë dhe herë nuk kemi marrë”.

Me riorganizimin e ri të Drejtorive Elbasani është kthyer në qendër Rajonale të Shërbimit veterinar dhe Mbrojtjes së Bimëve dhe përfshin edhe Korçën me Beratin.

Kohet e fundit duket se ka lajme te mira per blektoret. Ministria e Bujqësisë po negocion për gjetjen e tregjeve që fermerët ta kenë të sigurt shitjen e prodhimit.

E tillë është edhe një marrëveshje me vendet arabe ku pronarëve të fermave me mbi 100 krerë do tu blihen qengjat me një çmim dyfish më të lartë se sa çmimi aktual.

Menjëherë pas lidhjes së kontratës, 40% e shumës do të jepet në dorë e 60% kur fermeri të dorëzojë qengjat për therje.

Blegtoria mbetet një nga pikat e forta të ekonomisë shqiptare. Kjo  për shkak të kushteve të favorshme klimaterike, përqindjes së popullsisë që zë fshati, traditës që ekziston në mbarështimin e kafshëve.

FATOS SALLIU

GAZETARE I ABCNEËS, ELBASAN