အကျဉ်းထောင်ထဲကနေ အောင်လအန်ဆန်းဆီကို အားပေးစာ ရေးသားပေးပို့ခဲ့တဲ့ ဖိုးသော်

Описание: အကျဉ်းထောင်ထဲကနေ အောင်လအန်ဆန်းဆီကို အားပေးစာ ရေးသားပေးပို့ခဲ့တဲ့ ဖိုးသော်
------------------------------
အကျဉ်းထောင်ထဲမှာ ဖမ်းဆီးထိန်းသိမ်းခံထားရတဲ့ ONE Championship ဖိုက်တာ ဖိုးသော်က အောင်လအန်ဆန်းဆီကို အောင်လအန်ဆန်းရဲ့ ပရော်ဖက်ရှင်နယ်ကစားသမားဘဝနောက်ဆုံးပွဲ မထိုးခင်မှာ စာရေးသားပေးပို့ခဲ့ပါတယ်။ ဒီစာထဲမှာ ပါရှိတဲ့ စကားအသွားအလာတွေအရ ဖိုးသော်ဟာ ကျန်းမာရေးကောင်းမွန်နေတယ်၊ ပွဲပြန်ထိုးနိုင်လောက်တဲ့အထိ စိတ်ချရတဲ့ကြံခိုင်မှုတစ်ရပ် သူ့ဆီမှာ ရှိနေဆဲပဲလို့ ယူဆစရာရှိပါတယ်။ သူ့ရဲ့ကစားသမားဘဝဖြတ်သန်းမှုနောက်ဆုံးပွဲစဉ် မထိုးခင် ရက်အနည်းငယ်အလိုလောက်မှာ ဖိုးသော် ရေးသားပေးပို့လိုက်တဲ့စာကို သူ လက်ခံရရှိခဲ့တာဖြစ်တယ်လို့ အောင်လအန်ဆန်းက ပြောကြားထားပါတယ်။ ဖိုးသော် ဟာ အသက် ၃၀ အရွယ်ကိုရောက်မှ MMA စတင်ကစားခဲ့သူဖြစ်ပြီး အဲ့ဒီမတိုင်ခင်မှာ မြန်မာ့ရိုးရာလက်ဝှေ့ထိုးခဲ့သူဖြစ်ပါတယ်။ ဖိုးသော် ဟာ ONE Championship ရဲ့ဖယ်သာဝိတ်တန်းမှာ ပွဲထိုးခဲ့သူဖြစ်ပြီး ကျိုကူရှင်ကရာတေးပြိုင်ပွဲကချီးမြှင့်တဲ့ဆုကို ဆွတ်ခူးရရှိထားလို့ သူ့ရဲ့နာမည်ပြောင်ကို “ဘူရှီဒို”လို့ ပရိသတ်တွေက ပေးအပ်မှည့်ခေါ်ထားပါတယ်။ ဖိုးသော် ဟာ Team PT အဖွဲ့ကို ဖွဲ့စည်းပြီး မျိုးဆက်သစ်လူငယ်တွေကို MMA ပညာတွေ အခမဲ့ လေ့ကျင့်သင်ကြားပေးခဲ့သူဖြစ်သလို မေတ္တာလူငယ်အဖွဲ့ ကို ပူးတွဲတည်ထောင်ပြီး သွေးလှူဒါန်းမှု အပါအဝင် အရေးပေါ်ကယ်ဆယ်ရေး လုပ်ငန်းတွေမှာလည်း ဖိုးသော်က ပါဝင်ဆောင်ရွက်ခဲ့ပါတယ်။ ၂၀၂၁ ခုနှစ် မေလ ၅ ရက်နေ့မှာတော့ ပေါက်ကွဲမှုဖြစ်စဉ်တစ်ခုကြောင့် ဖိုးသော်ဟာ ဒဏ်ရာအပြင်းအထန်ရရှိပြီး ဆေးရုံမှာ ဆေးကုသမှု ခံယူစဉ်အခိုက် ဖမ်းဆီးထိန်းသိမ်းခံလိုက်ရပါတယ်။ ထုတ်ပြန်ချက်တွေမှာ ဖိုးသော် က လက်လုပ်ဗုံး ပြုလုပ်နေစဉ်အခိုက် ပေါက်ကွဲမှုဖြစ်ပွားခဲ့တာဖြစ်တယ်လို့ ဖော်ပြထားပေမယ့် အသေးစိတ်အခြေအနေကို သီးခြားအတည်ပြုတာတော့ အခုအချိန်ထိတိုင် ထွက်ပေါ်လာခြင်း မရှိသေးပါဘူး။ လက်ရှိမှာ ဖိုးသော်က ဖမ်းဆီးထိန်းသိမ်းခံထားရပြီး အဲ့ဒီလိုအခြေအနေတွေကြားကနေ အောင်လအန်ဆန်းဆီကို အောင်လအန်ဆန်းရဲ့ပရော်ဖက်ရှင်နယ်ကစားသမားဘဝနောက်ဆုံးပွဲမတိုင်ခင်မှာ ဖိုးသော်က အမှတ်တရစာတစ်စောင် ရေးသားပေးပို့လိုက်တာဖြစ်ပါတယ်။ ဖိုးသော် ပေးပို့လိုက်တဲ့စာလေးကို အောင်လအန်ဆန်းက သူတို့နှစ်ယောက် အတူတကွ သရက်သီးထိုင်စားနေတဲ့ ဓာတ်ပုံလေးနဲ့ လွှင့်တင်ဖော်ပြခဲ့ပြီး “ကျွန်တော့်ရဲ့ပွဲမတိုင်ခင် ရက်အနည်းငယ်အလိုမှာ ဖိုးသော်က ကျွန်တော့်ဆီကို အားပေးစာတစ်စောင် ရေးသားပေးပို့ခဲ့ပါတယ်။ ကျေးဇူးအများကြီးတင်ပါတယ်။ မင်းကိုလည်း သတိရတယ်။ တစ်နေ့နေ့မှာ ငါတို့ ပြန်ဆုံပြီး သရက်သီးတွေ အတူတူ စားကြရဦးမှာပါ”လို့လည်း Post ရေးသားထားပါတယ်။