Shaheen express Business Class | ایک مایوس کن تجربہ

Описание: Shaheen express Business Class | safar kr k Maza nahi Aya
Shaheen Express Business Class – Ek Mayoos Kun Tajurba

Aaj pehli baar Shaheen Express ki Business Class ka safar kiya, lekin dil se kehna parh rha hai ke safar ka bilkul bhi maza nahi aaya. Main ek content creator hoon, jo aksar inki buses ke baray mein positive videos banata raha hoon. Lekin is dafa jo tajurba hua, wo na sirf dil dukhanay wala tha balkay aik dhoka bhi laga.

Sabse pehle baat karun staff ke rawaiye ki to kehna parega ke bad ikhlaqi aur batameezi inka aam mamool lagta hai. Driver ka rawaiya intehai ghair pesha warana tha. Na salam ka jawab dena, na baat krne ka saleeqa jaisay sawari koi insaan nahi, bus aik load ho jo uthana majboori hai. Main khud inka regular passenger raha hoon aur inki buses ke positive points highlight karta raha hoon apne followers ke liye, lekin aaj jab maine video banany k Liye wind screen k pas gya to driver ne jis badtameezi se jawab diya, wo kisi bhi professional service ka hissa nahi ho sakta.

Ab baat karte hain facilities ki. bus ka AC waqai acha hai, aur LED screen bhi kaafi behtar hai, ye credit dena zaroori hai. Lekin agar aap 7000 rupees charge kar rahe hain Business Class ke liye, to kam az kam seats comfortable honi chahiyein. Yeh seats lambe safar mein back pain aur discomfort ka sabab banti hain. Reclinable feature hai magar iss tarah ka jaisay sirf naam ka ho. Ek business class passenger jisse comfort, relaxation aur service ka waada diya jata hai, uske sath yeh rawaiya aur environment kisi bhi tarah insaafi nahi hai.

Yeh baat samajh se bahar hai ke jab aap itni mehngi ticket de rahe hain to kya sirf AC aur LED screen dikhana hi kafi hai? Aam public se aisi badtameezi aur quality compromise karna ek tarah se unka mazaaq urana hai.

Mujhe afsos hai ke mujhe yeh likhna parh raha hai. Ummeed thi ke aik quality service milegi, lekin na staff ka ikhlaq mila, na comfort, sirf disappointment. Shaheen Express ko chahiye ke apne staff ki training kare, customer service ka matlab samjhay aur facilities ko waqai “Business Class” ka level dey.

shukria
#shaheenexpress
#peshawar
#kohat
#karachi
#foryou
#viral