නිම්තෙර 2023 | Faculty of Medicine - University of Kelaniya

Описание: කැලණිය විශ්ව විද්‍යාලයේ වෛද්‍ය පීඨය විසින් සංවිධානය කරනු ලැබූ "2023 සෞඛ්‍ය කඳවුර සහ වෛද්‍ය ප්‍රදර්ශනය" වෙනුවෙන් අරමුදල් රැස් කිරීම උදෙසා සහ වෛද්‍ය පීඨ සිසුන්ගේ කලා කුසලතා එළිදැක්වීමේ අරමුණින් පසුගියදා පැවැත්වුණු "සෞන්දර්යයේ නොනිම් තීර්ථ චාරිකාව - නිම්තෙර 2023 " ප්‍රවීණ කලාකරුවන්ගේ මෙන්ම අප වෛද්‍ය පීඨයේ ශිෂ්‍ය ශිෂ්‍යාවන්ගේ ගැයුම් වැයුම් නැටුම්වලින් වර්ණවත් වෙමින් අති උත්කර්ෂවත් අන්දමින් නිමාවට පත්විය.

වෛද්‍ය පීඨ වාද්‍ය වෘන්දයේ නාද රටා වලින් හැඩවුණු මේ සුන්දර ප්‍රාසාංගික අත්දැකීම උදෙසා ආරාධිත ගායන ශිල්පීන් සහ ශිල්පිනියන් ලෙස සමන් ලෙනින්, නිලක්ශි හැලපිටිය, ආශ්කා කුලතුංග සහ දර්ශන ප්‍රමෝද් යන කලාකරුවන් සහභාගී වූ අතර ඔවුන්ගේ ප්‍රවීණ හඬ මාධුර්‍යය සංගීතයේ ස්වර සප්තකයෙන් වර්ණවත් වූයේ උණුසුම් ප්‍රේක්ෂක ප්‍රතිචාර මධ්‍යයේය..

මෙම ප්‍රසංගය තුළදී වෛද්‍ය පීඨ ශිෂ්‍ය ශිෂ්‍යාවන්ගේ කලා හැකියාවන් මැනවින් ප්‍රදර්ශනය වූ අතර එකම වේදිකාවක් මත ගායන, වාදන, නර්තන සහ නිවේදන ආදී විවිධ කලා හැකියාවන්ගෙන් පිරිපුන් වෛද්‍ය ශිෂ්‍ය ශිෂ්‍යාවන් බොහෝ දෙනෙකු හට තම හැකියා ප්‍රදර්ශනය කිරීමට මහඟු තෝතැන්නක් විය.

දහස් සංඛ්‍යාත දුෂ්කර ග්‍රාමීය මිනිසුන්ගේ හදගැස්මට සවන්දෙමින් ඔවුන්ගේ නිරෝගිමත් හෙට දවස උදෙසා දියත් කළ සෞඛ්‍ය කඳවුර සහ වෛද්‍ය ප්‍රදර්ශනය වෙනුවෙන් මෙම ප්‍රසංගයේ මුදල් යෙදවුණු අතර අපේ ම ආදරණීය මිනිසුන් පිරිසකගේ නිරෝගිමත් හෙට දවස සුරක්ෂිත කරනු උදෙසා මෙකී ප්‍රසංගය වෙනුවෙන් ඔබ දැක්වූ සහයෝගය අපි ඉතා අගය කොට සලකන්නෙමු.

නිම්තෙර 2023

සෞන්දර්යයේ නොනිම් තීර්ථ චාරිකාව

#Nimthera2023
#UOK #UOK_FOM