Article 3 of Impeachment of Sara Duterte | LAGAYAN SA KAGAWARAN NG EDUKASYON: Bribery in DepEd

Описание: LAGAYAN SA KAGAWARAN NG EDUKASYON: Bribery in DepEd
.
“Allowance” daw? Eh bakit kailangan ng sobre kung walang tinatago? Isang matunog, masangsang, at nakakasukang pattern ang nabubunyag: sa ilalim ng panunungkulan ni Vice President Sara Duterte bilang kalihim ng Department of Education o DepEd, mga opisyal ng ahensya ay paulit-ulit na binibigyan ng cash envelopes na may halagang 12,000 hanggang 50,000 pesos bawat isa. Walang resibo. Walang liquidation. Walang papel. Pero may laman.
Hindi ito tsismis. Ito ay opisyal na isinampa sa mga pagdinig sa Kamara. Tatlong matataas na opisyal na ang umamin sa ilalim ng panunumpa: Si DepEd Chief Accountant Rhunna Catalan, tumanggap ng 25,000 pesos kada sobre, siyam na beses mula Pebrero hanggang Setyembre 2023. Si Undersecretary Gloria Mercado, tumanggap ng tig-50,000 pesos kada sobre sa parehong panahon. Si DepEd Bids and Awards Chairperson Resty Osias, 12,000 hanggang 15,000 pesos bawat sobre. Lahat ng ito ay ipinasa umano ni Assistant Secretary Sunshine Fajarda, na asawa ng Special Disbursing Officer ng DepEd na si Edward Fajarda, na siyang responsable sa pag-withdraw at pag-liquidate ng mga cash advances mula sa confidential and intelligence funds o CIF ng ahensya.
Petsa ng unang release ng confidential funds? Pebrero 2023. Petsa ng unang sobre? Pebrero 2023 rin. Legal na tanong: kung personal allowance nga ito ni VP Sara, bakit ipinapadaan sa isang assistant secretary at disbursing officer ng ahensya? Bakit hindi direkta, dokumentado, at may payroll trail kung “gratuity” lang ito?
At kahit totoo pang mula ito sa bulsa ni VP Sara, na hindi pa rin napatutunayan, ayon sa Anti-Graft and Corrupt Practices Act o RA 3019, Code of Conduct for Public Officials o RA 6713, at Presidential Decree 46, ipinagbabawal sa mga opisyal ng gobyerno ang tumanggap ng gift, present, o cash galing sa sinumang may official dealings, lalo kung ito ay walang record, at lalo kung ito ay galing sa mas mataas na opisyal. Sa mas simpleng wika, kahit “regalo” raw, basta government official ka at galing ito sa mas nakakataas sa iyo, bawal. Kahit gaano kaliit. Kahit gaano kadalas.
Sabi ni Catalan, “I honestly asked Asec. Shine, is it part of the confidential funds? She said no, it’s just an allowance from the VP. So, for me, I just accepted it.” Pero tanong ng Kongreso, nasaan ang liquidation kung ito’y totoong allowance? Bakit walang dokumento? Sagot ni Catalan, “I just trusted Fajarda’s word.” At noong pinirmahan niya ang liquidation report para sa 112.5 million pesos na CIF, inamin niyang wala siyang supporting documents. Bakit siya pumirma? “I was made to sign.”
Sa mundo ng accounting at auditing, ito ang textbook case ng red flag. Ang mismong auditor ng ahensya, nilagyan ng sobre, tapos pinapirma sa liquidation ng milyon-milyon na hindi niya naverify. At kung babalikan natin ang mismong intensyon ng confidential and intelligence funds, ito ay dapat ginagamit sa law enforcement at national security, hindi sa mga youth summit o pasabog na “pasasalamat” envelopes.
Subtle bribery. Patterned bribery. Abuse of public funds. Lahat iyan ay napapaloob sa depinisyong ginamit sa mga international corruption frameworks gaya ng UNCAC o United Nations Convention Against Corruption, na nilagdaan mismo ng Pilipinas.
Habang bumubulwak ang pera sa sobre, ang mga estudyanteng Pilipino, lalo na sa kanayunan, kulang sa upuan, kulang sa guro, kulang sa silid-aralan. Ang mga guro, paalis ng bansa, sapilitang naghahanap ng mas maayos na sahod. Samantalang ang edukasyon natin, sinasakal ng envelope politics at silent coercion.
Kung ito ay allowance, bakit hindi sa payroll dumaan? Kung ito ay personal na pera, bakit hindi personal na ibinigay? Kung ito ay malinis, bakit tila paspasan ang pagpapalaganap pero tahimik ang mga dokumento?
Ito ang edukasyong iniwan ni Sara Duterte. Hindi paghuhubog ng isip kundi pagbubulag sa katotohanan. Hindi pamumuno kundi panunuhol. Hindi serbisyo kundi sistemang sobre. At habang tulog ang iba, tayo ang gising. At hindi tayo magpapatahimik.