Қазақ тілін үйрететін ойынға бюджеттің 242 миллион теңгесі жұмсалған

Описание: Қазақ тілін үйретеміз деп, қазынадан 242 миллион теңге жұмсаған. Осылайша, Ғылым және жоғары білім министрлігі Steppe Rider деп аталатын ойынды іске қосты. Бірақ цифрлы платформа қолданушылар көңілінен шыға қоймады. Себебі әлеуметтік желіде жұрт жаппай сынап жатыр. Пайдаланушылардың айтуынша, бұл, тіл үйрететін заманауи платформа емес, олқылығы көп, ойыншыққа ұқсас өнім. Қоғам қызу талқылап жатқан 500 мың доллар тұратын Steppe Rider сапасын әріптесім Серік Дәрменұлы да тексеріп көрді.
Ғылым және жоғары білім министрлігі Steppe Rider деп аталатын ойынды әзірлеуге бюджеттен 242 миллион теңге бөлген. Жоба 2025 жылдың соңында Steam платформасына шыққан. Құжатта бұл сюжеті, кейіпкері бар, бірнеше сағатқа арналған білім беретін ойын деп көрсетілген.
СЕРІК ДӘРМЕНҰЛЫ, тілші:
Менде ұялы телефоныма бұл ойынды жүктеп алдым. Форматы қарапайым: кейіпкер тау барысына мініп, түрлі кедергіден өтіп, жүгіріп келеді. Ал біз жол жөнекей қазақша жазылған сөздің әріптерін жинаймыз. Сұрақ біреу ғана, мұндай ойын шынымен тіл үйрете ме, әлде бұл тек “есеп беруге ыңғайлы өнім” бе?»
Министрлік өкілдері бұл жобаны жай ойын емес, әдістемелік құрал деп түсіндірді. Айтуларынша, мұнда күнделікті өмірде қолданылатын 700 базалық сөз, ситуациялық тапсырмалар, дүкен, көше, достар ортасы сияқты шынайы өмір көріністері енгізілген. Сондай-ақ, бұл ойынды отыз мыңнан астам адам жүктеп үлгерген екен.
ЕРБОЛ ТІЛЕШОВ, ҚР Ғылым және жоғары білім министрлігі тіл саясаты комитетінің төрағасы :
Біздікі лексика-грамматикалық принципке жүйеленген. Бірінші жүйелілік, екінші сөздердің тіркесі керек. Сосын оның күнделікті қажеттілігі болуы тиіс. Сөздің анықтығы қажет. Онда синоним болмауы керек, архаизмдер, тарихи, этнографиялық сөздер емес, қарапайым лексика алынған. Бұл соған құрылған.Бұл ақысыз өнім.
Ойынды тек компьютерден емес, смартфон арқылы да ойнауға болады.



#Информбюро #31арна #БастыЖаңалықтар #Новости #31канал