សម្តេចមហាបវរធិបតី ហ៊ុន ម៉ាណែត៖ កម្ពុជា​កំពុងផ្លាស់ប្តូរ​ពីផលិតកម្មថ្លៃដើមទាប ទៅជាមជ្ឈមណ្ឌលផលិតកម្ម..

Описание: សម្តេចមហាបវរធិបតី ហ៊ុន ម៉ាណែត៖ កម្ពុជា​កំពុងផ្លាស់ប្តូរ​ពីផលិតកម្មថ្លៃដើមទាប ទៅជាមជ្ឈមណ្ឌលផលិតកម្មបៃតង​របស់អាស៊ាន (Video inside)

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃទី៤ ខែមីនា ឆ្នាំ២០២៦នេះ បានថ្លែងបញ្ជាក់ថា កម្ពុជា បាននិងកំពុងអភិវឌ្ឍ លើសពីផលិតកម្មដែលមានថ្លៃដើមទាប ឆ្ពោះទៅរកការប្រែក្លាយជា មជ្ឈមណ្ឌលផលិតកម្មបៃតងរបស់អាស៊ាន។

សម្តេចមហាបវរធិបតី ហ៊ុន ម៉ាណែត ថ្លែងបែបនេះ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់បើកកិច្ចប្រជុំកំពូលធុរកិច្ច​អាស៊ាន​កម្ពុជាឆ្នាំ២០២៦។ កិច្ចប្រជុំកំពូលនេះរៀបចំឡើងនៅសណ្ឋាគារសូហ្វីតែលភ្នំពេញ រយៈពេលពីរថ្ងៃក្រោម​ប្រធាន​បទ «បរិវត្តកម្មអាស៊ាន៖ នវានុវត្តន៍ សមាហរណកម្ម និងការវិវត្តន៍ឧស្សាហកម្ម»។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ដូច្នេះថា «កម្ពុជា បាននិងកំពុងអភិវឌ្ឍ លើសពីផលិតកម្មដែលមានថ្លៃដើមទាប ឆ្ពោះទៅរកការប្រែក្លាយជា មជ្ឈមណ្ឌលផលិតកម្មបៃតងរបស់អាស៊ាន។ សម្រាប់សាជីវកម្មពហុជាតិ (Multinational Corporation), សម្ពាធ ក្នុងការអនុលោម តាមយន្តការកែតម្រូវព្រំដែនកាបូន (Carbon Border Adjustment Mechanism) របស់សហភាពអឺរ៉ុប និងគោលដៅសកលផ្នែកបរិស្ថាន សង្គម និងអភិបាលកិច្ច (ESG) មិនមែនជាជម្រើសទៀតទេ, ប៉ុន្តែជាលក្ខខណ្ឌតម្រូវការនៃទីផ្សារ»។

បើតាមប្រសាសន៍របស់សម្តេចមហាបវរធិបតី ហ៊ុន ម៉ាណែត, បច្ចុប្បន្ន៦២% នៃល្បាយថាមពល (Power Mix) របស់យើង បានមកពីប្រភពថាមពលកកើតឡើងវិញ ដែលនឹងបន្តកើនឡើងរហូតទៅដល់ ៧០% នៅឆ្នាំ២០៣០។ តាមរយៈការធ្វើសមាហរណកម្មថាមពលស្អាត ចូលទៅក្នុងហេដ្ឋារចនាសម្ព័ន្ធតំបន់សេដ្ឋកិច្ចពិសេស, កម្ពុជាផ្ដល់ជូននូវប្រព័ន្ធអេកូឡូស៊ីដ៏ល្អ សម្រាប់ការប្រមូលផ្តុំឧស្សាហកម្មអេឡិចត្រូនិក និងយានយន្ត។

ក្នុងន័យនេះ​ សម្តេចមហាបវរធិបតី ហ៊ុន ម៉ាណែត បញ្ជាក់ថា ក្នុងឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគ ក្នុងទំហំប្រហែល ១០ពាន់លានដុល្លារអាម៉េរិក ដែលកើនឡើង ៤៥% បើប្រៀបធៀបនឹងឆ្នាំមុន។ ទុនវិនិយោគ បានផ្លាស់ប្តូរយ៉ាងឆាប់ ពីវិស័យកាត់ដេរ ទៅកាន់ផលិតកម្មកម្រិតខ្ពស់ (High-End Manufacturing), កសិ-ឧស្សាហកម្ម, និងហេដ្ឋារចនាសម្ព័ន្ធ។

សូមជម្រាបថា CBAM (Carbon Border Adjustment Mechanism) ជាគោលនយោបាយអឺរ៉ុប ដាក់ពន្ធលើផលិតផលដែលបញ្ចេញកាបូនខ្ពស់។ ESG (Environment, Social, Governance) ជាគោលការណ៍សកលសម្រាប់វិនិយោគ ដែលផ្ដោតលើបរិស្ថាន សង្គម និងអភិបាលកិច្ច។ ការអនុវត្តទាំងពីរនេះ ជួយលើកស្ទួយផលិតកម្មបៃតង និងការវិនិយោគកម្រិតខ្ពស់នៅកម្ពុជា៕