ថៃចង់បិទប្រេងមិនឱ្យនាំចូលមកខ្មែរ - Khmer Thai Border

Описание: សម្ដេចតេជោណែនាំរដ្ឋាភិបាលកម្ពុជាឱ្យពិចារណាផ្អាកការនាំចូលគ្រឿងកំប៉ុងគ្រប់ប្រភេទ ក៏ដូចជាត្រីខ និងសាច់កំប៉ុងពីប្រទេសថៃ ក្រោយគណបក្សមួយរបស់ថៃចង់ស្នើឱ្យរដ្ឋាភិបាលថៃឈប់ផ្គត់ផ្គង់ប្រេងមកកម្ពុជា
ថ្មីៗនេះមានព័ត៌មានមួយដែលផ្សាយថា មានគណបក្សប្រឆាំងរបស់ថៃមួយ បានជូនយោបល់ទៅរាជរដ្ឋាភិបាលថៃថាឱ្យឈប់លក់ប្រេងមកឱ្យខាងកម្ពុជា ដែលពួកគេចាត់ទុកថា ជាកូនសោរដែលនឹងធ្វើឱ្យកម្ពុជាចុះចាញ់ខាងភាគីថៃទាក់ទិននឹងជម្លោះព្រំដែន។ ជុំវិញបញ្ហានេះ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានបង្ហោះសារឆ្លើយតបទៅវិញតាមរយៈបណ្ដាញសង្គមហ្វេសប៊ុកផ្លូវការកាលពីយប់ថ្ងៃទី២០ ខែមិថុនា ឆ្នាំ២០២៥ថា៖ កម្ពុជាសូមបញ្ជាក់ទៅអ្នកវិញថា យើងមិនស្លាប់ដោយសារមិននាំប្រេងពីថៃមកនោះទេ ប៉ុន្តែអ្នកដែលស្លាប់គឺក្រុមហ៊ុន PTT របស់ថៃទៅវិញទេ។ តើអ្នកចង់ឲ្យក្រុមហ៊ុនថៃ PTT ស្លាប់មែនទេ? បើចង់ សូមឲ្យអ្នកធ្វើតាមបំណងចុះ។
តាមរយៈសំណេរបង្ហោះលើបណ្ដាញសង្គមហ្វេសប៊ុកដដែល សម្ដេចតេជោ បានអះអាងថា សម្រាប់កម្ពុជា បានត្រៀមខ្លួនរួចរាល់ដើម្បីដោះស្រាយស្ថានភាពដែលពួកអ្នកគំរាមរួចហើយ អ៊ីនធើណែត អគ្គិសនី ពលករ និងពេលនេះ ល្បែងប្រេងធ្វើជាអាវុធប្រឆាំងយើងទៀត។ បញ្ហាពលករពេលមុន ពួកអ្នកមើលងាយ និងរើសអើងពលករខ្មែរ និងយកពលករធ្វើជាចំណាប់ខ្មាំងផង និងគំរាមយើងផង តែពេលដែលយើងប្រកាសទទួលយកពលករពេលនេះពួកអ្នកបែរជាចេះយកចិត្ត និងលួងលោមពលករ ព្រោះបើពលករខ្មែរចាកចេញរោងចក្រ កសិដ្ឋាន ក្រុមហ៊ុន ការដ្ឋានសំណង់មួយចំនួន អាចត្រូវបិទទ្វារ ព្រោះខ្វះកម្លាំងពលកម្ម។
សម្ដេចតេជោថា៖ បើពួកអ្នកក្លាហាន សូមពួកអ្នកបណ្តេញពលករខ្មែរសាកល្បងមើល តើវាប៉ះពាល់សេដ្ឋកិច្ចថៃខ្លះទេ?។ ប្រេងក៏ដូចគ្នាសូមសាកល្បងមើលចុះ តែគួរសួរក្រុមហ៊ុនថៃ PTT ជាមុនសិន ព្រោះក្រែងវាងាប់ក្រុមហ៊ុនថៃ ដែល កំពុងមានស្ថានីយលក់ប្រេងនៅកម្ពុជា ឬក៏ត្រូវឲ្យក្រុមហ៊ុនប្រេងរបស់ថៃ ទៅទិញប្រេងពីប្រទេសផ្សេងមកលក់នៅកម្ពុជា។
បន្ថែមពីនេះ សម្ដេចតេជោ ហ៊ុន សែន បានគូសបញ្ជាក់បន្ថែមថា ក្នុងនាមជាប្រធានគណបក្សប្រជាជនកម្ពុជា ដែលជាគណបក្សដឹកនាំប្រទេស សម្ដេចសូមផ្តល់យោបល់ជូនរាជរដ្ឋាភិបាលពិចារណា និងម្ចាស់ការជាមុន ដោយបង្វែរការទិញទំនិញពីប្រទេសថៃ ដើម្បីកុំឲ្យគេមានហេតុផលគំរាមយើងតទៅទៀត និងចំពោះមុខប្រសិនច្រកទ្វារព្រំដែនមិនទាន់កែសម្រួលឲ្យដូចដើមវិញ កម្ពុជាគួរផ្អាកការនាំចូលគ្រឿងកំប៉ុងគ្រប់ប្រភេទ តាំងពីគ្រឿងស្រវឹង ភេសជៈប៉ូវកម្លាំងគ្រប់ប្រភេទរហូតដល់ត្រីខកំប៉ុង ឬសាច់កំប៉ុងគ្រប់ប្រភេទ ជំនួសដោយប្រើផលិតផលក្នុងស្រុក ឬផលិតផលនាំចូលពីប្រទេសផ្សេងៗក្រៅពីប្រទេសថៃ។ ប្រជាជនកម្ពុជាយើងគួរសម្លឹងមើលឲ្យឆ្ងាយ លើសពីព្រំដែនកម្ពុជា និងលើសពីឆ្នាំ២០៣០។
គួរឱ្យដឹងថា ភាពរកាំរកូសរវាងកម្ពុជា និងថៃ នៅតែបន្តអូសបន្លាយ ដោយសារតែបញ្ហាព្រំដែនរវាងគ្នាមិនត្រូវបានដោះស្រាយចប់នៅឡើយ។ ជាក់ស្ដែង នាពេលថ្មីៗកន្លងទៅនេះ កម្ពុជាទើបតែបានដាក់ពាក្យបណ្ដឹងប្ដឹងទៅតុលាការយុត្តិធម៌អន្តរជាតិពិភពលោក (ICJ) ពាក់ព័ន្ធនឹងតំបន់ចំនួនបួនដែលមានជម្លោះជាមួយនឹងថៃ ក្នុងនោះរួមមាន៖ តំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ក្នុងខេត្តព្រះវិហារ។ ភាគីថៃបានព្យាយាមប្រើវិធីសាស្រ្ត និងសង្រ្គាមចិត្តសាស្រ្តមកលើកម្ពុជា តាមរយៈប្រព័ន្ធផ្សព្វផ្សាយរបស់ខ្លួនដោយបានផ្សាយបំផ្លើស និងមួលបង្កាច់មកលើកម្ពុជា។ យ៉ាងណាក៏ដោយ កម្ពុជារក្សាជំហរដោះស្រាយវិវាទដោយសន្តិវិធី តែក្នុងនោះ កម្ពុជា និងថៃ បានសម្រេចបិទច្រកព្រំដែនអន្តរជាតិរវាងគ្នាៗនឹងគ្នារួចហើយផងដែរ៕