ရွာငံတိုက်ပွဲမှာ စစ်တပ်အရာရှိအပါအဝင် ၁၀ဦးထက်မနည်းသေဆုံး | People's Spring

Описание: ရွာငံတိုက်ပွဲမှာ စစ်တပ်အရာရှိအပါအဝင် ၁၀ဦးထက်မနည်းသေဆုံး
 
ဖေဖော်ဝါရီ -၂၇၊ ၂၀၂၆။ People’s Spring
 
ရှမ်းပြည်နယ်တောင်ပိုင်း၊ ရွာငံမြို့နယ်တိုက်ပွဲတွေမှာ စစ်တပ်က အရာရှိအဆင့်အပါအဝင် ၁၀ဦး ထက်မနည်းသေဆုံးပြီး လက်နက် ၇ လက် သိမ်းရတယ်လို့ ဓနုဒေသအခြေစိုက် ပြည်သူ့ကာကွယ်ရေးတပ်မတော် (၁၀၀၃) တပ်ရင်းက ဒီကနေ့ ထုတ်ပြန်ပါတယ်။
 
အခု ဖေဖော်ဝါရီဒုတိယပတ်ကစတဲ့ တိုက်ပွဲတွေမှာ မျှားကလေးကျေးရွာဘက်ကို စစ်ကြောင်းထိုးလာတဲ့ စစ်တပ်ကို ကြားဖြတ်မိုင်းဆွဲတာနဲ့ တိုက်ခိုက်မှုတွေ အတွင်းမှာ လက်နက် ၂လက် သိမ်းဆည်းနိုင်ခဲ့တယ်လို့ ဆိုပါတယ်။
 
စစ်ကောင်စီတပ်ဘက်က ထိခိုက်သေဆုံးမှုကိုတော့  မသိရပေမယ့် နာရေးကူညီမှု ကားတွေနဲ့ သယ်ဆောင်သွားခဲ့တာရှိတယ်လို့လည်း တပ်ရင်း(၁၀၀၃)က အသိပေးပါတယ်။
 
ဖေဖော်ဝါရီ ၁၈ ရက်ကလည်း ကျောက်ငှက်-အုတ်တွင်းလမ်းပိုင်းမှာ ကင်းလှည့်နေတဲ့ စစ်တပ်ကို ကြားဖြတ်တိုက်ခိုက်ခဲ့ပြီး စစ်ဗိုလ်တစ်ဦးအပါအဝင် ၁၀ ဦးခန့် သေဆုံးတယ်လို့ ဖော်ပြပါတယ်။
 
အဲဒီတိုက်ခိုက်မှုမှာ လက်နက် ၅လက်၊ ကျည်အတောင့် (၆၀၀)၊အီနာဂါတစ်လုံး၊ ဆက်သွယ်ရေးစက်ကြီး တစ်လုံးနဲ့ ကျည်ဘောက်(၁၁)ခုသိမ်းဆည်းရရှိတယ်လို့ ဆိုပါတယ်။
 
ပြီးခဲ့တဲ့နှစ်ဝက်ကတည်းက  စစ်ကောင်စီဟာ ရွာငံ အနောက်တောင်ခြမ်းနဲ့ ရွာငံအရှေ့မြောက်ခြမ်းမှာ စစ်ကြောင်းထိုးတာ၊ ကျေးရွာတွေမှာ တပ်စွဲတာတွေ လုပ်ခဲ့တယ်လို့ နယ်မြေခံစစ်ရေးသတင်းရင်းမြစ်က အသိပေးပါတယ်။
 
အဲဒီစစ်ကြောင်းတွေမှာ အရှေ့ပိုင်းတိုင်း စစ်ဌာနချုပ်လက်အောက်ခံ တပ်မ ၅၅ လက်အောက်ခံတပ်တွေ ပါသလို ပျူတွေလည်းပါတယ်လို့ သူက ဆက်ပြောပါတယ်။
 
အခု ဖေဖော်ဝါရီ ၁၇ရက်ကလည်း ရွာငံမြို့နယ်တွင်း တိုက်ပွဲဖြစ်ပွားခဲ့ပြီး စစ်ဇုန်ထဲကို အရပ်သားကားတစ်စီး ဝင်လာတာကြောင့် တော်လှန်ရေးတပ်တွေဘက်က ပစ်ခတ်မှုရပ်တန့်လိုက်ပြီး စစ်ကောင်စီတပ်သားတွေ ထွက်ပြေးလွတ်မြောက်သွားတယ်လို့ သိရပါတယ်။
 
ဒါကြောင့် ပြည်သူတွေအနေနဲ့ တိုက်ပွဲဖြစ်ပေါ်နေတဲ့အခြေအနေမှာ တိုက်ပွဲဇုန်တွေကို ရှောင်ကြဥ်သွားလာပြီး ဘေးလွှတ်ရာကိုပုန်းရှောင်တာနဲ့ စစ်တပ်နဲ့ ဝေးရာမှာနေဖို့ ဓနုဒေသအခြေစိုက်ပြည်သူ့ကာကွယ်ရေးတပ်မတော် (၁၀၀၃) တပ်ရင်းက တိုက်တွန်းပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA