قصيدة دروب الوفا مع الكلمات للشاعر غالب الحلبي

Описание: قصيدة دروب الوفا للشاعر غالب الحلبي
.
ما بعدنا يوم أو عشنا بجفا ........ عشنا أيام المحبة بالصفا
انطقي يا روح روحي تكلمي ........ علمي كل الصبايا ع الوفا
مستعجلة مريت بدي اقشعك ........ مستعجلة ما فيي لحظة اسمعك
زفوني لابن العم بالسيف الردي ........ والحين جاية يا حبيبي ودعك
يا ويل قلبي من الخبر ناح وبكي ........ وهاج الدمع لمين بدو يشتكي
وتناثرو الدمعات ع ثيابي ومشو ........ وتاهو حروفي من الألم ضاع الحكي
لديت صوبا راكعة ع ركابها ........ متل اليتيمة مفارقة أحبابها
قمت بعجل ضميتها وأني حزين ........ وصار الحزن يعفر ألم ع ثيابها
من زود آلامي الي ضميتها ........ وبدموع عيني يا أسى عبيتها
ومن خوفي إنا تغرق بدمع العيون ........ برموش عيني ع الكتف غطيتها
قالت حبيبي هالحمل ما أثقلو ........ يا فراقنا وشلون فيي اتحملو
قلبي الك من يوم ما بدينا الهوى ........ وان كان عندك شك شيلو واسألو
قالت حبيبي وصوتها يرجف خجل ........ أرجوك لا تعتب على عود الفشل
ما قدرت صارح بيي قلو عاشقة ........ وحسيت خنتك آه يا خيب الأمل
وتنهدت تنهيدا عبا مقعدي ........ صاحلا القلب أرجوك لا تتنهدي
وشلون فيي فارقك يا منيتي ........ وانت عيوني وانت ديني ومعبدي
راحت وقافت آخ ما عدلي بقا ........ حسيت شعرا يشدني حتى الحقا
ناديت متل الذيب فارق للعويل ........ وهميت متل الريم لني سابقا
ضميتها وضمتني ومشينا سوا ........ متل اليتامى مشردين بهالهوى
ومشينا حتى لاحت عيون الصباح ........ مهدود حيلا وأني مهدود القوى
من كثر ما مشينا وقعنا نايمين ........ بأرض الخلا ويا مين يعرفنا يا مين
غطينا ساعة بعدا فتحنا العيون ........ لنا بأهلا بالسلاح مطوقين
قالولي عمرك راح بنا نقطعو ........ ونرمي بلحمك للذياب تمزعو
همت على اقدام بيا تدخلت ........ قالت اذا بتريد قطعني معو
مدو البارودة عليي يا امي احزني ........ أول رصاصة عبت بكتفي أني
مدو البارودة عليها قلتلو بالله ........ فرغ رصاصك كلو بقلبي العني
قلتلو يا سفاح روحي بايعا ........ اقتلني الي وخليها دنيا واسعة
ومن قبل ما خلص رجائي والكلام ........ وجه إليها رصاصة لنا واقعة
رغم الجرح هميت لوصل إلا ........ مدت بإيدا ايدي مسكت أولا
وعطتني قوة قمت أنا لضمدا ........ لكن رصاص وفاع متل المنحلة
روحا بكل الصوت صاحت تنطق ........ وتقلو يا بيي يا منا شو بقي
لأشكرك من جوا قلبي المبتلي ........ فرقتنا بكرا سوا رح نلتقي
ريحتنا وبالآخرة رح نلتقي
كللونا بثوب إكليل الخطايا ........ قدمو رصاصن تهاني بالبداية
هدمو كوخ لنا بدار المودة ........ قدمو قصر لنا بدار المنايا
هلت الضحكات منن والفرح ........ هلت الدمعات وخلصت هالحكاية