සෞඛ්‍ය අමාත්‍ය නලින්ද ජයතිස්ස මහතාගෙන් අස්ගිරි මහ නා හිමියන්ට හිස තෙල් ගැල්වීමේ රාජ්‍ය උත

Описание: හිස තෙල් ගැල්වීමේ රාජ්‍ය මහෝත්සවය අප්‍රේල් මස 15 වන දින පෙරවරු 06.54ට මහනුවර ඓතිහාසික නාථ දේවාල භූමි පරිශ්‍රයේදී සිදුකෙරේ.

සියම් මහ නිකායේ මල්වතු සහ අස්ගිරි පාර්ශවයේ අනුනායක හිමි ප්‍රධාන මහා සංඝරත්නයේ ප්‍රධානත්වයෙන් එම උත්සවය සුබ මෙහොතින් පැවැත්වීමට කටයුතු සංවිධාන කර ඇත.

සෑම වර්ෂයකම සිංහල හින්දු අලුත් අවුරුදු නැකත් චාරිත්‍රවල හිස තෙල් ගැල්වීමේ චාරිත්‍රය පුරාතනයේ සිට මහනුවර නාථ දේවාල භූමියේදී සිදු කොට තිබේ.

මෙවරත් එම සම්ප්‍රදායික චාරිත්‍රය මහනුවර දී පැවැත්වෙන අතර ඒ සම්බන්ධයෙන් මල්වතු සහ අස්ගිරි පාර්ශවයේ මහා නායක හිමියන් සහ අනුනායක හිමිවරුන් දැනුවත් කොට උන්වහන්සේලාට ආරාධනා කිරීම සෞඛ්‍ය හා ජන මාධ්‍ය අමාත්‍යවරයාගේ මැදිහත්වීම මත ඉකුත්දා සිදු කෙරිණි.

මල්වතු මහා විහාරයට පැමිණි අමාත්‍යවරයා එහිදී එම පාර්ශවයේ මහා නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල හිමියන් බැදැ දැක ආශිර්වාද ලබා උන්වහන්සේට ආරාධනා කළ අතර අනතුරුව එම පාර්ශවයේ අනුනායක හිමිවරුන් වන පූජ්‍ය දිඹුල්කුඹුරේ විමලධම්ම හිමි සහ පූජ්‍ය නියංගොඩ විජිතසිරි හිමියන් බැහැ දැක ආරාධනා කරන ලදි.

අස්ගිරි මහ විහාරයට පැමිණි අමාත්‍යවරයා මහා නායක අතිපූජ්‍ය වරකාගොඩ ඤාණරතන හිමියන් බැහැ දැක ආශිර්වාද ලබා රාජ්‍ය මහෝත්සවය සඳහා උන් වහන්සේට ආරාධනා කරන ලදි. එම පාර්ශවයේ අනුනායක පූජ්‍ය නරන්පනාවේ ආනන්ද හිමියන් අස්ගිරි මහ පිරිවෙනේදී බැහැ දුටු අමාත්‍යවරයා පසුව ඓතිහාසික ආදාහන මළු විහාරයේදී අනුනායක පූජ්‍ය වේඩරුවේ උපාලි හිමියන් බැහැ දැක ආශිර්වාද ලබා හිස තෙල් ගැල්වීමේ චාරිත්‍රය සඳහා ආරාධනා කරන ලදි.

සෞඛ්‍ය අමාත්‍යංශය සහ එම අමාත්‍යංශයේ දේශීය වෛද්‍ය අංශය, ආයුර්වේද දෙපාර්තමේන්තුව සහ මධ්‍යම පළාත් ආයුර්වේද දෙපාර්තමේන්තුවේ මෙහෙයවීම මත හිස තෙල් ගැල්වීමේ රාජ්‍ය මහෝත්සවය පැවැත්වෙන අතර නාථ දේවාල විහාරයේ සිට නාථ දේවාලයේ බෝධිය දක්වා මහා සංඝරත්නය මහ පෙරහැරින් වැඩම කිරීම එහිද සිදුවේ.

උත්සව සභාව ආරම්භය සහ සුභ මූර්තියට හිස තෙල් ගැල්වීම මහා සංඝරත්නයේ ප්‍රධානත්වයෙන් සිදුවන අතර පැරණි සම්ප්‍රදාය අනුව අලි ඇතුන් සඳහා හිස තෙල් ගැල්වීම ද මෙහිදී සිදුවේ.

මහ නායක හිමියන් බැහැ දැකීමෙන් අනතුරුව හිස තෙල් ගැල්වීමේ රාජ්‍ය මහෝත්සවය සම්බන්ධයෙන් මූලික සාකච්ඡාවක් අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් මහනුවර දිස්ත්‍රික් ලේකම් කාර්යාලයේදී පැවැති අතර එම අවස්ථාව සඳහා දිස්ත්‍රික් ලේකම් ඉන්දික උඩවත්ත, සෞඛ්‍ය හා ජනමාධ්‍ය අමාත්‍යංශයේ අතිරේක ලේකම්වරුන් වන යූ.එස්.කේ.දෙනාවත්ත සහ සමන්තී රණසිංහ, ආයුර්වේද කොමසාරිස් ජනරාල් දීප්ති සුමනසේන යන මහත්ම මහත්මීන් ඇතුලු පිරිසක් සහභාගීවූහ.

#SriLanka #SinhalaAvurudu #kandynews #culturalevent