ЖИ рутинаны азайтады: менің педагогикалық кейсім

Описание: Сәлеметсіздер ме! Батыс Қазақстан облысы, Орал қаласы №5 жалпы орта білім беретін мектебінің информатика пәнінің мұғалімі, педагог-зерттеуші Сарсенгалиева Умсынганым Болатовна. Мен сіздерге тапсырмалар дайындау барысында жасанды интеллектті қолдану тәжірибеммен бөліскім келеді.
Қазіргі сабақта мұғалім әр оқушының жас ерекшелігі мен деңгейіне сай тапсырмалар дайындауы керек. Әсіресе, сараланған және өмірмен байланысты жағдаяттық тапсырмалар – ең уақытты талап ететін рутиналық жұмыстардың бірі. Бұрын мұны қолмен дайындау 1,5–2 сағатқа созылатын, тапсырмалар бірсарынды болып, кейде оқушылардың деңгейіне сәйкес келмеуі мүмкін еді.
Бұл мәселені ChatGPT көмегімен шештік. Жасанды интеллект:
• Тапсырмаларды жылдам генерациялайды;
• Оқушы деңгейіне қарай саралайды;
• Жағдаяттық тапсырмаларды өмірмен байланыстырады;
• Бірнеше нұсқасын шығара алады.
Дайын материалдарды Canva арқылы визуалды етіп рәсімдеп, сабақ тартымдылығы артты.
Жұмыс келесі кезеңдер арқылы жүзеге асырылды:
1. Сабақ мақсаты мен күтілетін нәтижесін нақтыладық;
2. ChatGPT-ке нақты промттар енгіздік:
o Мысалы: «5 сыныпқа ‘Біздің айналамыздағы ақпарат’ тақырыбында 3 деңгейлі тапсырма құрастыр»;
o «6 сыныпқа ‘Авторлық құқық, плагиат’ тақырыбында жағдаяттық тапсырма жаса, өмірмен байланыстыра отырып»;
3. Алынған тапсырмаларды редакциялап, Canva арқылы рәсімдедік;
4. Сабақта қолдандық, нәтижесін бақыладық.
Жасанды интеллект құралдарын қолдану келесі нәтижелерге қол жеткізді:
• Тапсырма дайындау уақыты 1,5–2 сағаттан 20–30 минутқа дейін қысқарды;
• Тапсырмалар оқушылар деңгейіне сай және қайталанбайтын болды;
• Жағдаяттық тапсырмалар өмірмен байланыстырылды, оқушылардың қызығушылығы артты;
• Мұғалім уақыты үнемделді, шығармашылыққа көбірек көңіл бөлінді.

Қорытындылай келе, бұл тәжірибе жасанды интеллекттің мұғалім жұмысын жеңілдететін тиімді құрал екенін көрсетті. ЖИ мұғалімді алмастырмайды, керісінше рутиналық процестерді автоматтандырады, педагогтың негізгі миссиясына – оқушының танымдық қабілетін дамытуға, сапалы білім беруге және жеке тұлға ретінде қалыптастыруға бағытталуына жағдай жасайды.