វិបត្តិប្រេងឡើងថ្លៃទូទាំងពិភពលោក

Описание: នៅក្នុងសង្គ្រាមសម័យទំនើប អាវុធដែលគ្រោះថ្នាក់បំផុត មិនមែនសុទ្ធតែជាមីស៊ីល ឬ ដ្រូននោះទេ។ ពេលខ្លះអាវុធដែលអាចប៉ះពាល់ដល់ពិភពលោកទាំងមូល គឺតម្លៃប្រេង។ បន្ទាប់ពីការស្លាប់របស់មេដឹកនាំកំពូលអ៊ីរ៉ង់ Ali Khamenei និងការតែងតាំងមេដឹកនាំថ្មីក្នុងចេតនាបន្ដរសង្គ្រាម ដោយដាក់កូនប្រុសរបស់គាត់ឈ្មោះលោក Mojtaba Khamenei ជាមេដឹកនាំថ្មី, ទីផ្សារប្រេងពិភពលោកបានឆ្លើយតបភ្លាមៗ។ ប្រតិកម្មនោះ មិនមែនមានតែសមរភូមិយោធានៅមជ្ឈិមបូព៌ាប៉ុណ្ណោះទេ ប៉ុន្តែបានបន្តរលកទៅដល់ទីផ្សារថាមពល និងសេដ្ឋកិច្ចពិភពលោក តាមរយៈតម្លៃប្រេង។

ដោយសារតែប្រេង ជាថាមពលស្នូលសម្រាប់សេដ្ឋកិច្ចសម័យទំនើប ការកើនឡើងនៃតម្លៃប្រេងអាចប៉ះពាល់ដល់គ្រប់វិស័យ ចាប់ពីការដឹកជញ្ជូនរហូតដល់ឧស្សាហកម្មផលិត និងការផ្គត់ផ្គង់ម្ហូបអាហារ។ ក្នុងប្រវត្តិសាស្ត្រ សោកនាដកម្មប្រេងជាច្រើនដូចជា វិបត្តិប្រេងនៅទសវត្សរ៍១៩៧០ បានបង្ហាញថា ការកើនឡើងខ្លាំងនៃតម្លៃប្រេង អាចជំរុញឱ្យមានអតិផរណាខ្ពស់ និងនាំទៅរកការធ្លាក់ចុះនៃសេដ្ឋកិច្ចពិភពលោក។

គិតត្រឹមពេលនេះ តម្លៃប្រេងបានឡើងលើស១០០ដុល្លារក្នុងមួយបារ៉ែល បង្កការព្រួយបារម្ភយ៉ាងខ្លាំងនៅទីផ្សារហិរញ្ញវត្ថុ ចាប់ពីអាស៊ី រហូតដល់អឺរ៉ុប។ សម្រាប់រដ្ឋាភិបាល អាជីវកម្ម និងប្រជាពលរដ្ឋនៅជុំវិញពិភពលោក សំណួរដ៏សំខាន់បំផុតនៅពេលនេះគឺថា តើការឡើងថ្លៃប្រេង គ្រាន់តែជាប្រតិកម្មបណ្តោះអាសន្ននៃសង្គ្រាម ឬក៏វាកំពុងបង្ហាញពីការប្រែប្រួលធំមួយក្នុងទីផ្សារថាមពលពិភពលោកក្នុងរយៈពេលយូរអង្វែង?

ជាដំបូងយើងត្រូវដឹងថា មូលហេតុចម្បងដែលធ្វើឱ្យតម្លៃប្រេងសកលលោកហក់ឡើងខ្ពស់ខ្លាំងគឺដោយសារតែ វិបត្តិសង្គ្រាមនៅតំបន់មជ្ឈិមបូព៌ា ជាពិសេសជម្លោះរវាង សហរដ្ឋអាមេរិក អ៊ីស្រាអែល និងអ៊ីរ៉ង់។ ប្រទេសនៅក្នុងតំបន់មជ្ឈឹមបូព៌ា គឺជាប្រទេសផលិតប្រេង ហើយHormuz ជាច្រកសំខាន់ក្នុងការនាំប្រេងទៅកាន់ទីផ្សារពិភពលោក។ ច្រកសមុទ្រ Hormuz ជាច្រកផ្លូវដឹកជញ្ជូនប្រេងដ៏សំខាន់បំផុត ដែលផ្ទុកប្រេងជាង ២០% ទៅ ៣០% នៃតម្រូវការសកល។ ការបិទច្រកនេះ ឬការវាយប្រហារលើនាវាដឹកប្រេង បានធ្វើឱ្យចរាចរណ៍នាវាធ្លាក់ចុះរហូតដល់ ៨០-៩០%។ ដូច្នេះប្រសិនបើមានការគំរាមកំហែង ឬការរំខានដល់សុវត្ថិភាពនៃផ្លូវដឹកជញ្ជូននេះ ទីផ្សារប្រេងពិភពលោកនឹងឆ្លើយតបភ្លាមៗ ដោយការឡើងថ្លៃ។
Hormuz វាជាច្រកតូចមួយស្ថិតនៅចន្លោះប្រទេស អូម៉ង់ និង អ៊ីរ៉ង់ ដែលតភ្ជាប់ឈូងសមុទ្រពែរ្ស (Persian Gulf) ជាមួយឈូងសមុទ្រអូម៉ង់ និងសមុទ្រអារ៉ាប់។ ទោះបីជាមន្ត្រីការទូតអ៊ីរ៉ង់ខ្លះអះអាងថាច្រកនេះមិនទាន់បិទទាំងស្រុងតាមផ្លូវច្បាប់ក៏ដោយ ប៉ុន្តែក្នុងលក្ខណៈបច្ចេកទេស និងសុវត្ថិភាព ច្រកសមុទ្រ Hormuz ត្រូវបានចាត់ទុកថា "បិទជាស្ថាពរ" សម្រាប់ចរាចរណ៍ពាណិជ្ជកម្មសកលនាពេលនេះ។

***កំណត់សម្គាល់: រាល់ការបញ្ចេញមតិទៅលើខ្លឹមសារនៃវីដេអូនេះ គឺជាទំនួសខុសត្រូវរបស់អ្នកបញ្ចេញមតិផ្ទាល់។ ដូច្នេះ សូមមិត្តអ្នកគាំទ្រគ្រប់ផ្នែក ធ្វើការបញ្ចេញមតិប្រកបដោយសីលធម៌ ក្នុងន័យស្ថាបនា។ ការបញ្ចេញមតិបែបជេរប្រមាថ អុជអាល នាំដល់ការយល់ច្រឡំ ឬ ការរើសអើងជាតិសាសន៍ សាសនា ឬក៏បុគ្គលណាមួយ នាំឱ្យបាត់បង់ភាពថ្លៃថ្នូរជាមនុស្ស មិនមែនជាគោលបំណងរបស់ខ្ញុំបាទឡើយ។ ខ្លឹមសារអប់រំនៃវីដេអូនេះ ជាគោលបំណងរបស់យើងខ្ញុំ! សូមអរគុណ!

អត្ថបទពិគ្រោះៈ សារពត៌មាន Fresh News

#វិបត្តិប្រេងឡើងថ្លៃ #តម្លៃប្រេងសកល #សង្រ្គាមអ៊ីរ៉ង់