TAZAMA HAMAS ILIVYOWAACHIA MATEKA WA ISRAEL, WAPALESTINA 110 NAO KUACHIWA

Описание: Khan Younis. Wapiganaji wa kundi la Hamas wameanza kuwaachia mateka wa Israel waliokuwa wanashikiliwa eneo la Gaza. Mateka wa kwanza ameshakabidhiwa kwa maofisa wa Msalaba Mwekundu kwa ajili ya kupelekwa nchini Israel.

Katika mabadilishano ya leo Alhamisi Januari 30,2025, Hamas imeanza kwa kumwachia, Agam Berger, (20) ambaye ni miongoni mwa mwanajeshi watano wa Jeshi la Israel (IDF) waliotekwa wakati wa uvamizi wa Hamas nchini Israel Oktoba 7,2023. Wenzake wanne waliachiwa kwenye mabadilishano yaliyofanyika Jumamosi iliyopita.

Mateka wengine raia wa Israel wanaotarajiwa kuachiliwa kutoka mikononi mwa Hamas leo ni Arbel Yehoud, (29) na Gadi Moses (80). Pia Hamas itawaachia raia watano wa Thailand waliotekwa kwenye mashamba ya matunda nchini Israel.

Wakati wa kuachiliwa kwa Berger, wapiganaji wa Hamas waliojihami kwa silaha na kufunika sura zao kwa vitambaa vyeusi wameonekana wakipanga mistari huku raia wa Gaza wakishangilia kumuona mwanajeshi huyo anaachiwa.

Huko Israel, mamia ya raia wamekusanyika katikati ya Mji Mkuu wa Tel Aviv huku wengine wakishangilia baada ya kuona Berger anapunga mkono kupitia Televisheni kubwa inayoonyesha mabadilishano hayo mubashara kutoka Khan Younis, Gaza.

“Agam (Berger) tunakusubiria nyumbani leo,” amesema umati wakisema.

Tofauti na mabadilishano ya Jumamosi, mabadilishano ya leo yatafanyikia maeneo tofauti tofauti kutokana na mateka hao kushikiliwa na vikundi tofauti vilivyoko chini ya Hamas.

Wengine wataachiwa na kukabidhiwa lilipo jengo ambalo IDF ilitekeleza mauaji ya kiongozi wa Hamas, Yahya Sinwar mjini Khan Younis Gaza nchini Palestina. Mateka hao ni waliokuwa chini ya uangalizi wa wapiganaji wa kundi la Islamic Jihad lililoko chini ya Hamas.

Israel inadai raia nane ndiyo wanaoshikiliwa mateka na Hamas, wawili kati yao wakihofiwa kuwa wameshauawa na watano wataachiwa leo.

Malipo ya Israel kwa Hamas kuwaachia mateka hao ni kuachiwa kwa wapalestina 110 wakiwemo watoto 30 waliokuwa wakitumikia adhabu mbalimbali ikiwemo kusubiria adhabu ya kifo ama kufungo cha maisha kwenye magereza mbalimbali nchini Israel.

Mbali na watoto hao, Israel inatarajiwa kumwachia huru, Zakaria Zubeidi ambaye ni kiongozi wa zamani wa kundi la Hamas ambaye aliwahi kutoroka gerezani Israel mwaka 2021, kisha kukamatwa tena na kurudishwa.