Әке тағылымы – ұлт тәрбиесінің тірегі

Описание: #qyzylordatv
Аймақта «Әкелер одағы» облыстық филиалының үшінші отырысы өтті. Тәрбиелік мәні зор жиында қоғам мен отбасындағы әкенің рөлі кеңінен сөз болып, ой-пікірлер айтылды.

Қазақта «Бір әкенің тәрбиесін жүз мектеп те бере алмайды» деген қағида қашаннан қалыптасқан. Бұл шынында әке тәрбиесінің тағылымы терең екенін аңғартады. Әкенің орны әркез бір саты жоғары тұратыны да сондықтан. Осы ретте, әке мен бала арасындағы байланысты нығайтып, үлгілі әке моделін қалыптастыруда аталған іс-шараның маңызы зор. Жиында алдымен «Әкелер одағы» облыстық филиалының төрағасы Ержан Ескендір форумның мақсат-міндеттерін атап өтсе, мұнан кейін облыс әкімінің орынбасары Мейрамбек Зинабдинұлы отбасы құндылығы мен киелі шаңырақ қасиетін жас ұрпақтың санасына сіңіру, рухани-адамгершілік тәрбиені дәріптеу мәселесіне тоқталды.

МЕЙРАМБЕК ШЕРМАҒАНБЕТ – ОБЛЫС ӘКІМІНІҢ ОРЫНБАСАРЫ // Мемлекет басшысы «Берекелі әрі бақытты отбасы қуатты елдің тірегі, отбасындағы тәрбие елдің ертеңге деген сенімді қадамы» деген болатын. Президентіміздің бұл тұжырымдары бүгінгі форумның маңызымен үйлесіп, отбасының беріктігі мен ұрпақ тәрбиесінің сапасы мемлекеттің кемел келешегін айқындайтын шешуші фактор екенін айқын аңғартады.//

Форум аясында Сыр өңірінің мақтанышы, бокстан Әлем чемпионатының қола жүлдегері Құлахмет Тұрсынбайдың әкесі Молдахмет Байменов, «Сыр медиа» ЖШС директоры Марат Аралбаев және теолог-ғалым Бақтияр Оспанов өз өміріндегі әкенің орнын, тәрбиесін айтып, тәжірибесімен бөлісті. Мұнан соң, іс-шараға қатысушылар «Ер адамның бейнесін қалыптастырудағы әкенің рөлі: жауапкершілік, батылдық, құрмет», «Отбасы және қауіпсіздік», «Саналы түрде ата-ана болу», «Ерлер үшін спорт пен денсаулықтың маңызы» деген тақырыптарға жан-жақты тоқталды.

БЕРІК САЙМАҒАНБЕТОВ – ҚР МӘДЕНИЕТ ҚАЙРАТКЕРІ //Бала тәрбиесі баршаның ісі деп айтады. Сондықтан ұрпақтың тәрбиесіне келгенде ол ана демей, әке демей, көрші-қолаң демей барлығы бірігіп кірісу керек. Себебі, ұрпақтың дұрыс болып өсуі мықты мемлекеттің негізі.//

Сондай-ақ, тәрбие мен түздің жұмысын теңдей ұстап, ұлағатты ұрпақ өсірген азаматтар алғыс хатпен марапатталды.

Алқалы жиында әке беделін арттыру, отбасы құндылықтарын құнтау жайы кеңінен талқыланды. Айта кетейік, «Әкелер одағы» облыстық филиалының отырысы алдағы уақытта да дәстүрлі түрде ұйымдастырылатын болады.

Сайт - https://qyzylordatv.kz/ru/live
Facebook -   / qyzylordatv  
Instagram -   / qyzylordatv  
Telegram - https://t.me/qyzylorda_tv
Tiktok -  / qyzylorda_tv