ရွာငံမြို့ NLD လွှတ်တော်ကိုယ်စားလှယ် ဖမ်းခံရပြီးလပိုင်းအတွင်း စစ်ကြောရေးမှာ ကျဆုံး | People's Spring

Описание: ရွာငံမြို့ NLD လွှတ်တော်ကိုယ်စားလှယ် ဖမ်းခံရပြီးလပိုင်းအတွင်း စစ်ကြောရေးမှာ ကျဆုံး

ဇွန် - ၅ ။၂၀၂၅ /People's Spring

ရွေးကောက်ပွဲအနိုင်ရ အမျိုးသားဒီမိုကရေစီအဖွဲ့ချုပ် (NLD) ပါတီရဲ့ ရွာငံမြို့နယ် ပြည်သူလွှတ်တော်ကိုယ် ဦးအောင်စိုးမင်းဖမ်းဆီးခံရပြီး လပိုင်းအကြာမှာပဲ စစ်ကောင်စီ တပ်ရဲ့ စစ်ကြောရေးမှာ ဆုံးပါးသွားခဲ့ရတယ်လို့ ပြည်ထောင်စုလွှတ်တော်ကိုယ်စားပြု ကော်မတီ (CRPH) က ဇွန်လ ၄ ရက်မှာ သတင်းထုတ်ပြန်ပါတယ်။

ရှမ်းပြည်နယ်တောင်ပိုင်း ၊ ရွာငံမြို့နယ် ပြည်သူ့လွှတ်တော်ကိုယ်စားလှယ် ဦးအောင်စိုးမင်းဟာ ပြီးခဲ့တဲ့ နှစ် ဒီဇင်ဘာလအတွင်း ပြင်ဦးလွင်မြို့မှာ ဖမ်းခံရတာဖြစ်ပြီး လွန်ခဲ့တဲ့ လအနည်းငယ်လောက်မှာတော့ စစ်ကြောရေးစခန်းမှာ ကွယ်လွန်သွားခဲ့တာလို့ CRPH က အသိပေးပါတယ်။

ဖမ်းဆီးခံရပြီး ငါးလကျော်ကြာမှာလွှတ်တော်ကိုယ်စားလှယ်ဦးအောင်စိုးမင်း ရဲ့ သတင်းကို သိရတာဖြစ်ပြီး သူ့ကို စစ်ကောင်စီက တရားစွဲဆိုတာ ၊ ထောင်ပို ပို့တာမလုပ်ဘဲ " စစ်ကြောရေးမှာပဲ ရိုက်နှက်ပြီး သတ်ဖြတ်လိုက်ပြီ" ဆိုတာကို သတင်းအတိအကျ ရခဲ့တယ်လို့ CRPH အတွင်းရေးမှူး ဦးထွန်းမြင့်က People’s Spring ကို ပြောပါတယ်။

စစ်ကောင်စီရဲ့ စစ်ကြောရေးမှာ ကျဆုံးသွားသူ ဦးအောင်စိုးမင်းဟာ ၂၀၁၅ နဲ့ ၂၀၂၀ အထွေထွေ ရွေးကောက်ပွဲ နှစ်ရပ်လုံးမှာ NLD ပါတီ ကိုယ်စားပြု လွှတ်တော်ကိုယ်စားလှယ်အဖြစ် ရွေးကောက် တင်မြှောက်ခံရသူပါ။

မိခင်ဖြစ်သူရဲ့ နာရေးကိုသွားရောက်ရင်း ပြင်ဦးလွင်မြို့မှာ စစ်ကောင်စီခန့် အုပ်ချုပ်ရေးမှုးတစ်ဦးရဲ့ သတင်းပေးမှုကြောင့် ဖမ်းဆီးတာ ခံလိုက်ရတာလို့ နီးစပ်သူတစ်ဦးက ဆိုပါတယ်။

အခုလို ပြည်သူ့လွှတ်တော်ကိုယ်စားလှယ် ဦးအောင်စိုးမင်း စစ်ကြောရေးစခန်းမှာ ကျဆုံးသွားတဲ့အပေါ် အပေါ် များစွာ စိတ်မကောင်းဖြစ်ရပြီး သေဆုံးမှုနဲ့ပတ်သက်လို့ စစ်ကောင်စီမှာ အပြည့်အဝတာဝန်ရှိသလို ပြင်းပြင်းထန်ထန်ရှုတ်ချတယ်လို့ CRPH က သဘောထားကြေညာထားပါတယ်။

တဆက်တည်းမှာပဲ စစ်ကောင်စီရဲ့လက်ထဲမှာ ဖမ်းဆီးထိန်းသိမ်းခံရတဲ့ နိုင်ငံတော်သမ္မတ ဦးဝင်းမြင့်၊ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် ရွေးကောက်ခံလွှတ်တော်ကိုယ်စားလှယ် တွေ အတွက်လည်း များစွာ စိုးရိမ်ပူပန်နေတယ်လို့ ဖော်ပြပါတယ်။


CRPHရဲ့ လွှတ်တော်ကိုယ်စားလှယ်စိစစ်ရေးကော်မတီက ကောက်ယူထားတဲ့ အချက်အလက်တွေအရ လက်ရှိအချိန်အထိ အာဏာသိမ်းစစ်ကောင်စီဟာ လွှတ်တော်ကိုယ်စားလှယ် ၅၉ဦးကို ဖမ်းဆီးထိန်းသိမ်းထားဆဲဖြစ်တယ်လို့ သိရပါတယ်။

ဖမ်ဆီးခံခဲ့ရတဲ့ လွှတ်တော်ကိုယ်စားလှယ်တွေ အနက် ၃ ဦး ဟာ စစ်ကောင်စီ ရဲ့ စစ်ကြောရေးမှာ လူမဆန်စွာ ညှင်းပန်းနှိပ်စက်တာ ၊ လုံလောက်တဲ့ ဆေးကုသခွင့်မရတာတို့ကြောင့် ထောင်တွင်းမှာ ကျဆုံးခဲ့ရပါတယ်။

ပြီးခဲ့တဲ့ ၂၀၂၂ ခုနှစ် ၊ဇွန်လမှာဆိုရင် မွန်ပြည်နယ်လွှတ်တော်ကိုယ်စားလှယ် ဦးကျော်မျိုးမင်းကို စစ်ကောင်စီတပ်ဖွဲ့ဝင်တွေက ဖမ်းဆီးသွားပြီးနောက် လမ်းဘေးတစ်နေရာမှာ ရက်ရက်စက်စက် သတ်ဖြတ်ခဲ့တယ်လို့ CRPH က အသိပေးပါတယ်။

ဒါအပြင် စစ်တပ်အာဏာသိမ်းပြီးနောက် နေရပ်စွန့်ခွာ တိမ်းရှောင်ရတဲ့ လွှတ်တော်ကိုယ်စားလှယ် ၂၄ ဦး လုံလောက်တဲ့ ဆေးကုသမှုမရလို့ သေဆုံးခဲ့ရတယ်လို့ လည်း CRPH ရဲ့ အချက်အလက်အရသိရပါတယ်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring