ئەوەی تائێستا لەبارەی هێزە تایبەتەکانەوە نەتزانیوە | وەرزی دووەم – ئەڵقەی سێیەم |

Описание: ناوەڕۆکی ئەم ئەڵقەیە:
لەم ئەڵقەیەدا دەچینە نێو قوڵایی جیهانێکەوە کە پڕە لە نهێنی و مەترسی؛ جیهانی "هێزە تایبەتەکان". ئەوانەی جیاوازن لە سوپای تەقلیدی و راهێنانەکانیان ئەوەندە قورسە کە "مردن" تێیدا ئەگەرێکی کراوەیە و تەنیا کەسانی راهێنراو دەتوانن بەرگەی بگرن.

لەگەڵ عەقید سەلام وەڵامی کۆمەڵێک پرسیاری سەیر و سەرنجڕاکێش دەدەینەوە: تائێستا زانیوتە "چەکی مەزەڵی" چییە؟ بۆچی هێزە تایبەتەکان بەمەبەست ژێر چاویان رەش دەکەن؟ یان نهێنی ئەو مەرجە سەیرە چییە کە "پێڵاوی ژمارە 42" لە هێزی تایبەت وەرناگیرێت؟

ئەم ئەڵقەیە پڕە لە چیرۆک؛ لە باسی "قوە خاسە" و ئەو هێزە دڕندە کوردکوژەی عێراق کە بە تاکتیکێکی سەیر "خۆیان رووت دەکردەوە و بەسەر شاخدا سەردەکەوتن"، تا دەگاتە باسی سیفەتێکی بەرزی پێشمەرگە دێرینەکان کە "هەرگیز یەکتری جێناهێڵن".

هەروەها شرۆڤەی ورد بۆ ساتی هەڵکوتانە سەر باڵەخانەکان و ئۆپەراسیۆنە گەورەکان دەکەین، وەک رووداوەکەی هۆڵەکەی مۆسکۆ و کوشتنی بن لادن. باس لە هێزی "دەلتا" دەکەین کە دەوترێت کاریگەرییان بەقەد بۆمبێکی ئەتۆمییە، و هێزە "بۆقە مرۆییەکان"ـی ئیسرائیل.

بینەری بن بۆ ئەوەی تێبگەن بۆچی هێزی تایبەت بەبێ قەناس ناجوڵێتەوە و چۆن تەنیا "یەک ئۆپەراسیۆن" دەکرێ ئەنجامی تەواوی شەڕێک بگۆڕێت.

دەربارەی پڕۆگرام:
سەعاتی سفر، تاکە بەرنامە و بەهێزترین پڕۆگرامی شرۆڤەی سەربازییە لە میدیای کوردیدا کە لە دەزگای میدیایی 964 بەرهەم دەهێندرێت و بڵاو دەکرێتەوە. ئەم پڕۆگرامە لەلایەن هەریەک لە "توانا نەقی" و "عەقید سەلام"ـەوە پێشکەش دەکرێت. تێیدا بە وردی و قوڵی باس لە تاکتیک، ستراتیژ، جۆرەکانی چەک و رووداوە سەربازییە جیهانی و ناوچەییەکان دەکرێت و نهێنییەکانی پشت هەواڵە سەربازییەکان و جوڵەی سوپاکان بۆ بینەر ئاشکرا دەکرێن.