សង្ខេបព័ត៌មានអន្តរជាតិសំខាន់ៗ ប្រចាំថ្ងៃទី២៨ ខែវិច្ឆិកា ឆ្នាំ២០២៥

Описание: ---
១. ក្រុមហ៊ុនថៃ PTT(OR) បានឱ្យដឹងថាការលក់របស់ខ្លួន នៅក្នុងទីផ្សារនៃប្រទេសកម្ពុជា បានធ្លាក់ចុះពី ៥០% ទៅ៦០% ខណៈដែលចំនួនស្ថានីយ៍ប្រេងឥន្ធនៈ បានថយចុះមកត្រឹមតែ១៥០ ក្រោយពីមានជម្លោះព្រំដែនកម្ពុជា-ថៃ កាលពីចុងខែកក្កដាកន្លងទៅ។ នេះបើតាមការចុះផ្សាយរបស់កាសែតថៃ The Nation ដោយស្រង់សម្តីនាយកប្រតិបត្តិរបស់ក្រុមហ៊ុន នៅថ្ងៃទី២៨ ខែវិច្ឆិកានេះ។ ទីផ្សារកម្ពុជាត្រូវបានក្រុមហ៊ុននេះ ដាក់បញ្ចូលទៅក្នុង «តំបន់ដែលមានហានិភ័យខ្ពស់» ខណៈប្រសិនបើស្ថានការណ៍កាន់តែរីកធំជាងពេលបច្ចុប្បន្ន ក្លាយជាជម្លោះហិង្សា ដែលទាមទារឱ្យមានការដកស្ថានទូតចេញ នោះក្រុមហ៊ុនអាចប្រឈមនឹងលទ្ធភាពមួយ ក្នុងការបិទប្រតិបត្តិការទាំងស្រុង៕
ប្រភព៖ The Nation (https://www.nationthailand.com/busine...)

២. សាកសពជាង ១០០នាក់ ត្រូវបានរកឃើញក្នុងគ្រោះទឹកជំនន់នៅ Hat Yai ដោយមានជាង ២០ករណី អាជ្ញាធរកំពុងធ្វើការផ្ទៀងផ្ទាត់អត្តសញ្ញាណ។ នេះបើតាមសេចក្តីប្រកាសរបស់នគរបាលជាតិថៃ និងត្រូវបានចុះផ្សាយដោយកាសែត The Nation នាព្រឹកថ្ងៃទី២៨ ខែវិច្ឆិកានេះ។ ចំណែកឯមន្ទីរពេទ្យ Songkhla Nakarin បានចេញសេចក្តីថ្លែងការណ៍ជាសាធារណៈបន្ទាន់មួយ បន្ទាប់ពីទទួលបានសាកសពក្នុងចំនួនដ៏ច្រើន ដោយសារតែទឹកជំនន់ទ្រង់ទ្រាយធំនៅហាតយ៉ៃ ខេត្ត Songkhla។ មន្ទីរពេទ្យក៏បានឱ្យដឹងដែរថា ដោយសារតែចំនួនសាកសពដែលបានទទួលមានចំនួនច្រើន មន្ទីរពេទ្យចាំបាច់ត្រូវអនុវត្តតាមនីតិវិធីផ្លូវច្បាប់យ៉ាងតឹងរ៉ឹងក្នុងការកំណត់អត្តសញ្ញាណ៕
ប្រភព៖ The Nation (https://www.nationthailand.com/news/g...)

៣. ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានថ្លែងថា លោកត្រៀមខ្លួនជាស្រេចក្នុងការធានាជាលាយលក្ខណ៍អក្សរថា ប្រទេសរុស្ស៊ីនឹងមិនវាយប្រហារប្រទេសអឺរ៉ុបណាមួយទៀតឡើយ។ ការលើកឡើងនេះ ស្របពេលដែលលោកច្រានចោលការអះអាង ដែលថាក្រុងម៉ូស្គូមានបំណងឈ្លានពានប្រទេសមួយផ្សេងទៀត។ លោក ពូទីន បានហៅការអះអាងដែលថាក្រុងម៉ូស្គូកំពុងរៀបចំផែនការវាយប្រហារអឺរ៉ុបថាជា «រឿងគួរឱ្យអស់សំណើច»។ នេះគឺជាការថ្លែងរបស់មេដឹកនាំរុស្ស៊ី កាលពីថ្ងៃព្រហស្បតិ៍ ទី២៧ ខែវិច្ឆិកា នៅរដ្ឋធានី Bishkek នៃប្រទេសកៀហ្ស៊ីស៊ីស្ថាន ជាទីដែលលោកបានចូលរួមកិច្ចប្រជុំកំពូលនៃអង្គការសន្ធិសញ្ញាសន្តិសុខរួម(CSTO) ដែលជាសម្ព័ន្ធភាពយោធាដឹកនាំដោយរុស្ស៊ី ហើយរួមបញ្ចូលសាធារណរដ្ឋអតីតសូវៀតមួយចំនួនផង។ ដោយឡែក ឆ្លើយតបនឹងសំណួរអំពីកិច្ចខិតខំប្រឹងប្រែង ដើម្បីបញ្ចប់សង្រ្គាមនៅអ៊ុយក្រែន, លោក ពូទីន បានសម្តែងសុទិដ្ឋិនិយមចំពោះសេចក្តីព្រាងផែនការសន្តិភាពរបស់សហរដ្ឋអាមេរិក ដោយលោកលើកឡើងថាវាអាចបម្រើជា «មូលដ្ឋានសម្រាប់កិច្ចព្រមព្រៀងនាពេលអនាគត»៕
ប្រភព៖ Al Jazeera (https://www.aljazeera.com/news/2025/1...)

៤. ក្រសួងការពារជាតិចិន កាលពីថ្ងៃព្រហស្បតិ៍ ទី២៧ ខែវិច្ឆិកា បានព្រមានប្រទេសជប៉ុនថា ប្រសិនបើជប៉ុនឆ្លងកាត់បន្ទាត់ក្រហមលើបញ្ហាកោះតៃវ៉ាន់ ហើយបង្កបញ្ហា នោះជប៉ុននឹងទទួលផលលំបាកធ្ងន់ធ្ងរជាក់ជាមិនខាន។ នេះបើតាមការចុះផ្សាយរបស់សារព័ត៌មានចិន CGTN។ កងទ័ពរំដោះប្រជាជនចិន មានសមត្ថភាពខ្លាំងក្លា និងមធ្យោបាយ ដែលអាចទុកចិត្តបាន ដើម្បីកម្ចាត់រាល់អ្នកឈ្លានពានណាមួយ។ នេះជាការលើកឡើងរបស់លោក Jiang Bin អ្នកនាំពាក្យក្រសួងការពារជាតិចិន ក្នុងពេល ឆ្លើយសំណួរអំពីផែនការរបស់ជប៉ុនក្នុងការដាក់ពង្រាយមីស៊ីលបាញ់ពីដីទៅអាកាសរយៈចម្ងាយមធ្យម នៅលើកោះ Yonaguni ដែលមានចម្ងាយប្រហែល ១១០គីឡូម៉ែត្រ ភាគខាងកើតនៃកោះតៃវ៉ាន់។ ដោយឡែកនៅថ្ងៃព្រហស្បតិ៍ដដែលនោះ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova ក៏បានថ្កោលទោសផែនការរបស់ជប៉ុន ដោយបញ្ជាក់ថា ការដាក់ពង្រាយអាវុធបែបវាយប្រហារនៅលើកោះជុំវិញប្រទេសជប៉ុន នឹងបង្កគ្រោះថ្នាក់ដល់សន្តិសុខ និងស្ថិរភាពក្នុងតំបន់ ព្រមទាំងបង្កជាការគំរាមកំហែងយ៉ាងធ្ងន់ធ្ងរដល់ប្រទេសជិតខាង៕
ប្រភព៖ CGTN (https://news.cgtn.com/news/2025-11-28...)

Facebook:   / preah.khan.khmer  
Telegram: https://t.me/preah_khan
TikTok:   / preah_khan