Şükür Allahın məsləhətinə

Описание: Düz 40 il bundan əvvəl atamın ailəsində xoş bir hadisə olmuşdu. Övladı dünyaya gəlmişdi. Atasının adını qoyduğu oğlu.
O vaxtdan düz 40 il keçib. Atam öz ailəsində yoxdur. Öz adını daşıyan nəvəsi var artıq həmin ailədə.
Bu gün məzarı üstünə 40 il bundan əvvəl ağlamağı təzəcə öyrənən oğlu gəlib. Gəlişi ilə yenə də onun sevinməsinə ümid bəsləyərək.
Atamın ölümündən sonrakı illəri və mənim hərbi xidmət dövrümü çıxsaq, düz 35 il atamın çörəyini yemişəm.
Hətta, ölümündən sonra da onun çörəyindən yeyirəm.
Genindən genimə, rəftarından gözlərimə və oradan da qəlbimə keçən xüsusiyyətləri ilə bəhrələnərək bugünkü Məhəmməd olmuşam. Odur ki, yedirdiyi çörək və ötürdüyü tərbiyəsi ilə borcluyam qarşısında. Zəhmətinin çoxluğundan məs`uliyyətim də böyükdür.
Bir gün Allah qarşısında ona necə bəndə olduğum barədə sorğu-sual olunacağıma inandığım kimi atamala da görüşəcəyimə və ona bir oğul kimi cavab verməli olacağıma inanıram.
Hər dəfə məzarı üzərində günahlarının bağışlanmasını diləməklə yanaşı Allahdan ona xatir də bizim günühlarımızı bağışlamasını istəyirəm. Allahı sevən bəndə olduğu kimi, Allahın da sevimli bəndələrindən olduğuna əminəm. Elə ona görə də axirətdə də köməyinin dəyəcəyinə ümid edirəm seyyidimin. İnanmıram ki, bizsiz cənnətə daxil ola. Çünki, özü həmişə deyirdi: divin canı şüşədə olduğu kimi, mənim də canım evimdədir, balalarımdadır.
Artıq yolumun 40 ilini keçmişəm. Sənsiz keçən günlərim səni unutmağa yox, səni daha da yaxşı anlamağıma səbəb olur.
Bəli, bu gün 40 yaşım tamam olur. Bundan sonra daha nə qədər yaşayacağımı yalnız nəfsim əlində olan bilir. Uca Yaradan. Bəlkə də mənim üçün ayırdığı mələkləri də xəbərdardır. Bu ömür hər nə qədərdirsə, şükür Allahın məsləhətinə. Lütfü sayəsindədir ki, bu qədər yaşamışam. Heç nədən də narazı deyiləm. Şükür Allaha ki, yaratdıqları içərisində mən də varam.


#40Yaş #Ömür #Şükür #SeyyidMəhəmməd