ප්‍රදීපාගාරය I Episode 15 I නිකොලායි ගොගොල් I Николай Гоголь

Описание: ඉතින් අද අපි කතා කරන්නේ රුසියානු සාහිත්‍යයේ අති ගුප්ත සාහිත්‍යධරයෙක් ගැනය කීවොත් ඒක අතිශයෝක්තයක් නොවෙයි. ඔහු ගේ ජීවිතේ පිළිබඳ - තවමත් ප්‍රහේලිකාවක් වෙලා තියෙන දේවල් එමටයි. ඔහුගේ ජීවිතයේ ගුප්ත අභූත තැන් ගැන තවමත් හොයනවා. විමර්ශණය කරනවා.
නිකොලායි ගොගොල් ගැන නිතර අහන්න ලැබෙන කාරනා කීපයක් මම ඔබට කියන්නද? ජනප්‍රවාද කියනවා - ගොගොල්ට දිගම දිග නහයක් තිබුනාය කියල. ඒ වගේම - ඒ කාලෙ සාන්ත පීතරබුර්ගයේ නුවර හිටපු ජේත්තුවටම හැඩ වැඩ වෙලා හිටපු- ෆැෂන් කාරයත් ගොගොල්ය කියල කියනවා. ඒ කාලෙ පීතරබුර්ග් නුවර හිටපු තරුණයො - ඔහු අඳින පලඳින හැටි, ඔහුගේ -කොණ්ඩා මෝස්තරය කොපි කලාය කියනවා. ගොගොල් තමයි මුලින් ම චායාරූපයක - දකින්න ලබෙන රුසියානු ලේඛකයා. මීට කලින් සිටි හැමෝම අපි දකින්නේ සිත්තම් වල නෙ.
තව දෙයක් - ඔහු ජීවිතේ අවසාන කාලෙ - ඇඳක ඇල වෙලා නිදිය ගත්තේ නැහැ කියනවා. හැම වෙලාවෙම නිදාගෙන තියෙන්නේ වාඩි වෙලා. හේතුව තමයි - තමාව දවසක පණ පිටින් වලලාවි කියන භීතියකින් තමයි ඔහු ජීවත් වෙලා තියෙන්නෙ. 1931 - නිකොලායි ගොගොල් මිය ගිහින් අවුරුදු 100 විතර පස්සේ ඔහුගේ මිනී වල නැවත හාරනවා - වෙනත් සුසාන භූමියක වලලන්න. වාර්තාවල සඳහන් වෙනවා - ගොගොල්ගේ සිරුර පෙට්ටිය ඇතුලේ අනික් පැත්තට හැරිල තිබුනා කියල. ඒ කියන්නේ ඔහු පෙට්ටිය ඇතුලේ දඟලලා තියෙනවා කියන එක.
ඔය මං කිව්වේ - ගෝගොල් ගැන කතා වෙන - ගුප්ත - අද්භූත දේවල් වලින් බොහොම ස්වල්පයක් පමණයි.
ඉතින් - නිකොලායි ගොගොල් ගේ ජීවිතේ අපැහැදිලි දේවල් බොහොමයි. නමුත් - එක දෙයක් නම් ඉතාම පැහැදිලියි. ඔහු රුසියානු සාහිත්‍යයේ පතාක යෝධයෙක්. ජීවත්ව සිටි කාලයේදීම අද්විතීය සාහිත්‍යධරයන් අතර නම රැඳුනු චරිතයක්. ෆියෝදර් දොස්තොයෙව්ස්කි - වරක් කියනවා ‘රුසියානු සාහිත්‍යකරුවන් වන අපි හැමෝම එලියට ආවේ ගෝගොල් ගේ හිම කබායෙන්’කියල. Все мы вышли из гоголевской шинели - ඒකෙන් කියවෙන්නේ ගොගොල් ගෙන් රුසියානු සාහිත්‍යට වූ බලපෑම මොන තරම්ද කියන එකයි.