PS- IMBERAKURI NGO YABA YARIBARUTSE UNDI AUNG SAN SUU KYI.

Описание: Ni Madamu UWIZEYE IMAKULATA KANSIIME, bamwe batangiye kubonamo Aung San Suu Kyi uje ku mwanya wa gatatu nyuma ya Ingabire Umuhoza na Aung San Suu Kyi nyirizina wo muri Birmania.

Uwizeye Imakulata, Umunyamabanga mukuru w'Ishyaka PS Imberakuri rya Maître Bernard Ntaganda, abamwumvise n'abamubonye mu kiganiro yongeye kugirana n'abanyarwanda baba mu bihugu by'i Burayi kuya 09 gashyantare 2013, bamwe baragize bati ni Ingabire wa kabiri uvukiye muri PS Imberakuri, abandi bati ni Mushayidi neza neza.

Madamu Uwizeye Imakulata yagaragaje ibibazo byugarije u Rwanda birimo inzara, ubusumbane, ati mu Rwanda harimo ibice bibiri gusa: Agace gato k'abakize cyane, n'igice kinini gikennye, gishonje, kirwaye amavunja, kitivuza, kitiga, ..

Naho ku byiza yashima, Uwizeye aragira ati: N'ayo mazu y'imituriwa ari i Kigali n'indabo ku umuhanda, iyo ugannye inyuma gato ho intambwe nke cyane, wibona mu yindi si y'abazahajwe n'ubutindi n'ubwoba.

Muri iki gihe mu Rwanda bitegura kwibuka ku nshuro ya 19 icyo bise génocide yakorewe abatutsi, Mme Uwizeye Imakulata agaya cyane ingoma ya Kagame ikomeje kwirengagiza ko abahutu ndetse n'abatwa nabo bapfushije, nabo bagomba kwibuka ababo.

Mme Uwizeye Imakulata urangije urugendo yagiriraga mu bihugu by'i Burayi, bamwe bamufitiye impungenge ko yaba ari nka ka kanyoni karitse ku nzira. Ariko we avuga ko n'iyo yapfa none, ibyo avuga n'ibyo akora mu kubohoza u Rwanda byo bitazasubira inyuma. Ati ariko mu gihe nkiriho, dufatanye kurwanira u Rwanda rw'abanyarwanda bose.

Mme Uwizeye Imakulata yabwiye abanyarwanda bari mu mahanga ko ingufu zabo nizihura n'iz'abari mu Rwanda, urukuta rubari hagati rubatandukanya rutazatinda kurindimuka.