Зұлқарнайын қиссасы.

Описание: Зұлқарнайын қиссасы
Александр Македонский қазақша Ескендір Зұлқарнайын белгілі қолбасшы.
Ал құранда Ескендір Зұлқарнайынатты әулие бар дейді сол екеуі туралы айтсаңыз.

Жауап: Адам табиғат (жаратылыс) туралы ғылымдарды, Аллаһ (жаратушы) туралы ілімдерді және өзі туралы (адамтану) ағартушылық ізденуді ешуақытта тоқтатқан емес. Осы үш басты сұраққа жауап іздеудің нәтижесінде бүгінге дейін жүздеген ғылыми тұжырымдар (пәндер) мен заңдар пайда болды. Үнемі сұқбаттар мен талас-тартыстар тудыратын сұрақ адам мен жаратушысы арасындағы қатынас мәселесі. Бұл мәселеде Жаратушы өз хабаршыларына (пайғамбарлары) жіберген кітаптарда мән-жайдың хабарын берсе де адам ешқашан өзінің күдік пен күмәнға толы сұрақтарын толастатқан емес. Сондай сұрақтың бірі, Құран Кәрімнің «Кеһф» сүресінің 83-97-аяттарындағы «Зұлқарнайын» қиссасындағы Зұлқарнайын мен біздің заманымызға дейінгі 356-323 жылдары өмір сүрген Македония патшасы Александр Македонский бір адам ба, әлде екеуі басқа адамдар ма? деген тақырыпқа байланысты болып отыр.
Құран кәрімде қиссалар көп. Мысалы айтсақ, Хұд, Лұт, Иса, Мұса әнбиелер туралы және Піл оқиғасы, Зұлқарнайын қиссасы т.б. Зұлқарнайын қиссасы мұсылман халықтарының фольклорына «Ескендір Зұлқарайын» деген атпен енген. Ол жөніндегі аңыздарды екі түрге бөліп қарастырған жөн секілді. Біріншісі, Александр Македонскийдің лақап аты болып кеткен Ескендір Зұлқарнайын болса, екіншісі, «Зұлқарнайынға» байланысты хадис пен риуаяттар. Алғашқысы, Македония патшасы Александр Македонскийге қатысты болса, кейінгісі «әділеттілік орнатқан, патша Зұлқарнайын» туралы.

Құранды қазақшаға алғашқы аударушылардың бірі Халифа Алтай «Зұлқарнайын- сөзінің мағынасы «екі мүйізді», оның екі тұлымы немесе тәжінде екі мүйізі болғандықтан атанған, аты Ескендір, пайғамбар емес. Батыс, шығысты кезген» дейді. Бұл жерде Х.Алтай «Зұлқарнайынға» Ескендір деген есімді қосып отыр. Неліктен?- деген сауал туады. Себебі, тәпсіртанушылар (құранды зерттеушілер) «Ескендір» деген ат Құранда жоқ дейді.
2005 жылы жарық көрген Оңтүстік Қазақстан энциклопедиясының 199-200 бетінде Ескендір Зұлқарнайын– әлемге аты мәшһүр қолбасшының бірі Александр Македонский деген Қ.Тұрсынқұлұлының мәліметі берілген. Құрандағы «Зулқарнайын» А.Македонский ме жоқ әлде, екеуі басқа адамдар ма дәйектелмеген.



‪@aslanm3845‬