અમદાવાદ હની ટ્રેપ કાંડમાં વલસાડનો અસ્ફાક શેખ ઝડપાયો,વૃદ્ધ વેપારીને ફસાવી 20 લાખ પડાવવાનુ હતુ કાવતરું

Описание: અમદાવાદ હની ટ્રેપ કાંડમાં વલસાડનો યુવક અસ્ફાક ઈમ્તીયાઝ શેખ ઝડપાયો, વૃદ્ધ વેપારીને ફસાવી ૨૦ લાખ પડાવવાનું હતું કાવતરું

અમદાવાદમાં હની ટ્રેપનો એક મોટો પર્દાફાશ થયો છે, પરંતુ આ ગુનાના તાર વલસાડ સુધી જોડાયેલા હોવાનું સામે આવ્યું છે..રામોલ પોલીસે નકલી પોલીસ બનીને લોકોને ફસાવતી એક ગેંગના ત્રણ સાગરીતોની ધરપકડ કરી છે. આ ગેંગમાં વલસાડના બે શખ્સોની સંડોવણી ખુલી છે, જેમાં વલસાડની એક મહિલા પણ સામેલ છે જે હાલ ફરાર છે..

અમદાવાદની રામોલ પોલીસે એક એવી ગેંગનો પર્દાફાશ કર્યો છે, જેઓ મહિલાઓને આગળ કરી લોકોને હની ટ્રેપમાં ફસાવતા હતા. આ ગેંગની મોડસ ઓપરેન્ડી એવી હતી કે, મહિલા આરોપીઓ શિકારને ફોન કરી રામોલના કર્ણાવતી એન્કલેવ ખાતે રૂબરૂ બોલાવતી હતી. ત્યાં અગાઉથી ગોઠવાયેલા અન્ય આરોપીઓ નકલી પોલીસ બનીને ત્રાટકતા હતા અને ખોટા કેસમાં ફસાવી દેવાની ધમકી આપી, મારઝૂડ કરી 20 લાખ રૂપિયાની મોટી રકમ માંગતા હતા.

આ કેસમાં રામોલ પોલીસે બાતમીના આધારે સત્વરે કાર્યવાહી કરી 3 ઈસમોને 19.40 લાખના મુદ્દામાલ સાથે ઝડપી પાડ્યા છે. પકડાયેલા આરોપીઓમાં વલસાડના ભાગડાવાડા ગામના કરીમનગરના ગુલિસ્તાન બી એપાર્ટમેન્ટમાં રહેતો 32 વર્ષીય અસ્ફાક ઈમ્તીયાઝભાઈ શેખ પણ સામેલ છે. આ ઉપરાંત સુરતના ઉપેશ ઉર્ફે કાનો અને હીતેન ઉર્ફે બબુ ચૌહાણની પણ ધરપકડ કરવામાં આવી છે. પોલીસે આરોપીઓ પાસેથી રોકડા રૂપિયા 20 હજાર, 3 ફોરવ્હિલર ગાડીઓ અને 5 મોબાઈલ જપ્ત કર્યા છે.


પોલીસ ચોપડે હજુ 4 આરોપીઓ વોન્ટેડ છે, જેમાં ત્રણ મહિલાઓ છે..આ વોન્ટેડ લિસ્ટમાં વલસાડના ધોબી તળાવ પાસે લક્ષ્મીનગરમાં રહેતી નાઝ ઉર્ફે કીંજલ પટેલ ખાન નામની મહિલાનો પણ સમાવેશ થાય છે. વલસાડના યુવક અને મહિલાનું નામ આ હની ટ્રેપ કાંડમાં ખુલતા ચકચાર મચી જવા પામી છે. હાલ તમામ આરોપીઓ વિરુદ્ધ રામોલ પોલીસ સ્ટેશનમાં બીએનએસ (BNS) ની વિવિધ કલમો હેઠળ ગુનો નોંધી વધુ તપાસ હાથ ધરવામાં આવી છે.