Pillachilik — Forishda barqaror rivojlanayotgan soha

Описание: Pillachilik — Forishda barqaror rivojlanayotgan soha

So‘nggi yillarda hukumatimiz tomonidan pillachilik va ipakchilik sohasini yangi bosqichga olib chiqish, tizimga innovatsion yondashuvlar va sarmoyalarni jalb qilish, shuningdek, sohaga oid moddiy manfaatdorlikni oshirish borasida qator farmon va qarorlar qabul qilindi.

Xususan, 2024-yil 3 may kuni O‘zbekiston Respublikasi Prezidentining “Pilla yetishtirish va ipakchilik sohasida bozor mexanizmlarini joriy qilishni jadallashtirish bo‘yicha qo‘shimcha chora-tadbirlar to‘g‘risida”gi Farmoni qabul qilindi.

Mazkur hujjatda pilla yetishtirish va ipakchilikni yangi bosqichga olib chiqish bo‘yicha ustuvor yo‘nalishlar belgilandi. Jumladan, investitsiya muhitini yaxshilash, xomashyo bazasini kengaytirish, ipak qurti urug‘i hajmini ko‘paytirish, pillakorlarni qo‘llab-quvvatlash, yangi ishlab chiqarish quvvatlarini ishga tushirish orqali bandlik darajasini ikki baravarga oshirish va bozor mexanizmlarini jadallashtirish vazifalari ilgari surildi.

O‘tgan yili pillani qayta ishlash korxonalari tomonidan ishlab chiqarilgan mahsulotlar Hindiston, Vetnam, Ozarboyjon va Tojikiston kabi davlatlarga eksport qilindi. Joriy yilda esa Forish tumanidagi pillakorlar 933 quti ipak qurti urug‘idan pilla tayyorlashni rejalashtirgan.

Fermer xo‘jaliklari va 680 nafar kasanachilar bilan shartnomalar tuzilib, ishlab chiqarish jarayoni yo‘lga qo‘yildi.

Bir qutida 19,5 gramm ipak qurti mavjud bo‘lib, undan sanoat uchun 50–55 kilogramm pilla olinadi. Agar bir kilogramm pilla uchun kasanachiga 40 000 so‘m to‘lov amalga oshirilishini hisobga olsak, bir quti ipak qurtini parvarishlagan pillakor bir oyda ikki million so‘mdan ortiq daromad olish imkoniyatiga ega.

Respublikamizda pillachilik sohasini jadal rivojlantirishga oid qator qarorlar hayotga izchil tatbiq etilmoqda. Ayniqsa, pilla xom ashyosini chuqur qayta ishlash hamda sohaga to‘g‘ridan-to‘g‘ri xorijiy investitsiyalarni jalb qilish masalalariga alohida e’tibor qaratilmoqda.

Forish tumanida ipak qurtining asosiy ozuqa manbai bo‘lgan tutchilikni rivojlantirish, yangi tutzorlar barpo etish borasida ham izchil ishlar amalga oshirilmoqda.

Jumladan, Forish tuman ekologiya va atrof-muhitni muhofaza qilish bo‘limi, “Uchma” mahallasi va “Forish agropilla” MCHJ rahbariyati hamkorligida “SILK EXPERT PROCESSING” MCHJ tomonidan “Uchma” va “O‘xum” mahallalaridagi O‘xum, Abdukarim, Deriston, Bolomon, Birlashgan hamda Uchma qishloqlari aholisi tomorqalaridan samarali foydalanish maqsadida 27 500 tup tut ko‘chati tarqatildi.

2025-yil bahor mavsumida tumanda 80 mingdan ortiq tut ko‘chatlari yakka qatorlarga va qayta o‘zlashtirilgan tutzor maydonlariga ekildi.

Ipak qurti uchun oziqa zaxirasini yaratish maqsadida 197,1 gektar maydonda mahalliylashtirilgan tut ko‘chati navlari parvarishlanmoqda.

Ayni paytda tumanda mahalliy hamda Xitoy ipak qurti urug‘lari asosida fermer xo‘jaliklari va kasanachilar tomonidan qurti parvarishi ishlari qizg‘in davom etmoqda.