ကျွန်းတွေကို လေယာဉ်တင် သင်္ဘောတွေလို အသုံးချနိုင်ဖို့ အင်ဒိုနီးရှား ကြံစည် | People's Spring

Описание: ကျွန်းတွေကို လေယာဉ်တင် သင်္ဘောတွေလို အသုံးချနိုင်ဖို့ အင်ဒိုနီးရှား ကြံစည်

နိုင်ငံရဲ့ ပထဝီဝင် အနေအထားကို သဘာဝ လေယာဉ်တင် သင်္ဘောတွေအဖြစ် ပြောင်းလဲ အသုံးချနိုင်ဖို့ အင်ဒိုနီးရှားက စီစဉ်နေကြောင်း သိရပါတယ်။

လေယာဉ်တင် သင်္ဘောတစ်စီးဟာ တည်ဆောက်မှု၊ ပြုပြင်ထိန်းသိမ်းမှုနဲ့ စစ်ဆင်ရေး လှုပ်ရှားမှုတွေအတွက် ဒေါ်လာ ဘီလီယံတွေ အများကြီး လိုအပ်ပေမယ့် အင်ဒိုနီးရှား လေတပ် အကြီးအကဲ တွန်နီ ဟာဂျိုနိုကတော့ အင်ဒိုနီးရှားရဲ့ အစိတ်စိတ် အမြွှာမြွှာ ပြန့်ကြဲနေတဲ့ ကျွန်းစုတွေဟာ နိုင်ငံအတွက် သဘာဝတရားက ပေးထားတဲ့ လေယာဉ်တင် သင်္ဘောကြီးတွေအဖြစ် အသုံးတော် ခံနိုင်လိမ့်မယ်လို့ ပြောကြားခဲ့ပါတယ်။

သူက နိုင်ငံရဲ့ ပြည်နယ် ၃၈ ခုမှာ အကြီးစား လေတပ်စခန်းတွေ မဟုတ်ဘဲ တိုက်လေယာဉ်တွေ အတက်အဆင်း လုပ်နိုင်မယ့် လေယာဉ်ပြေးလမ်း အနည်းဆုံး တစ်ခုစီ တည်ဆောက်သွားမယ်လို့ ပြောပါတယ်။ ပြီးတော့ ပြေးလမ်းတွေကို အသစ်တည်ဆောက်တာမျိုးထက် ရှိရင်းစွဲ ကားလမ်းတွေ၊ အဝေးပြေးလမ်းတွေကို သင့်တော်အောင် ချဲ့ထွင် ပြောင်းလဲတာမျိုးနည်းကို အဓိက ရွေးချယ်သွားမယ်လို့လည်း ဆိုပါတယ်။ အဲဒီထဲမှာ ကျွန်းစုတွေပေါ် အခြေစိုက်ထားမယ့် ပြေးလမ်းတွေလည်း ပါဝင်လာမှာ ဖြစ်ပါတယ်။

ရည်ရွယ်ချက်ကတော့ လေယာဉ်တင် သင်္ဘောတွေလိုပဲ ပင်လယ်ထဲကနေ တိုက်လေယာဉ်တွေ ပျံတက်တာ၊ အခြေစိုက် ရပ်နားတာ၊ လက်နက်ခဲယမ်းတွေ ပြန်ဖြည့်တင်းတာတွေကို လုပ်ဆောင်နိုင်ဖို့ပါ။ အခုစိတ်ကူးက လက်တွေ့ ဖြစ်နိုင်ကြောင်း သရုပ်ပြတဲ့ အနေနဲ့ အင်ဒိုနီးရှား လေတပ်ရဲ့ F-16 တိုက်လေယာဉ် တစ်စီးနဲ့ Super Tucano ပန်ကာတပ် တိုက်လေယာဉ် တစ်စီးတို့ဟာ ဖေဖော်ဝါရီ ၁၁ ရက်နေ့တုန်းက ဆူမားတြားကျွန်းရဲ့ တောင်ဖက်စွန်း လမ်ပွန်ပြည်နယ်ထဲက အဝေးပြေးလမ်း တစ်နေရာမှာ အောင်အောင်မြင်မြင် အတက်အဆင်း လုပ်ပြခဲ့ပါတယ်။

အင်ဒိုနီးရှား လေတပ်ကတော့ အချိန်ကာလ အတိအကျ သတ်မှတ်မထားပေမယ့် အနာဂတ်မှာ ကုန်းမကြီးနဲ့ ဝေးတဲ့ ကျွန်းငယ်တွေမှာပါ အလားတူ ပြေးလမ်းတွေ ဖန်တီးနိုင်ဖို့ မျှော်လင့်ထားပါတယ်။ ဒါဟာ လေယာဉ်တင် သင်္ဘောတွေရဲ့ စျေးပေါတဲ့ မူကွဲဖြစ်လာမယ်လို့လည်း ဟာဂျိုနိုက ပြောပါတယ်။

အဝေးပြေးလမ်းတွေကို တိုက်လေယာဉ်တွေ အတက်အဆင်း လုပ်နိုင်မယ့် ပြေးလမ်းတွေအဖြစ် ပြောင်းလဲ အသုံးပြုတဲ့ စိတ်ကူးဟာ အသစ်အဆန်းတော့ မဟုတ်ပါဘူး။ အမေရိကန်၊ ဖင်လန်နဲ့ ဆွီဒင်တို့လို နိုင်ငံတွေဟာ အဲဒီလို စစ်ရေး အစီအမံမျိုး အသုံးပြုနိုင်ကြောင်း လက်တွေ့ ပြသထားကြပါတယ်။ အင်ဒိုနီးရှားမှာလည်း ဒီနည်းလမ်းကို ထိထိရောက်ရောက် အသုံးပြုနိုင်မယ်ဆိုရင် နိုင်ငံရဲ့ ဘက်ပေါင်းစုံ ကာကွယ်ရေး စွမ်းရည်ကို ထိထိရောက်ရောက် မြင့်တက်လာစေလိမ့်မယ်လို့ ဒုတိယ ကာကွယ်ရေးဝန်ကြီး ဒွန်နီ အာမာဝမ် တော်ဖန်တိုက ပြောပါတယ်။

အင်ဒိုနီးရှားဟာ တောင်တရုတ်ပင်လယ် ရေပိုင်နက်ကိစ္စ တရုတ်နဲ့ အငြင်းပွားမှုတွေ ရှိနေပါတယ်။ ဒါပေမဲ့ ကျွန်းစုတွေမှာ လေယာဉ်ပြေးလမ်းတွေ တည်ဆောက်မယ့် ကိစ္စက နိုင်ငံတစ်ခုခုကို တိုက်ရိုက် ရည်ရွယ်ထားတာမျိုး မရှိဘူးလို့ တော်ဖန်တိုက ဆိုပါတယ်။

ကျွန်းငယ်တွေပေါ်က အဝေးပြေး လမ်းတွေကို လေယာဉ် ပြေးလမ်းတွေအဖြစ် ပြောင်းလဲ အသုံးပြုမယ့် စိတ်ကူးဟာ နိုင်ငံအနေနဲ့ ကြုံလာနိုင်တဲ့ ခြိမ်းခြောက်မှု ပုံစံ အမျိုးမျိုးကို ပိုပြီး ထိထိရောက်ရောက် ဟန့်တားနိုင်အောင်၊ သမားရိုးကျ အရပ်ဖက် အခြေခံ အဆောက်အအုံတွေကို လိုအပ်လာရင် စစ်ရေးမှာပါ ပြောင်းလဲ အသုံးပြုနိုင်အောင် ရည်ရွယ်ထားတာ ဖြစ်တယ်လို့ လေတပ်က ကြေညာပါတယ်။

အင်ဒိုနီးရှားဟာ ကမ္ဘာပေါ်မှာ အကြီးဆုံး ကျွန်းစုလည်း ဖြစ်ပါတယ်။ အင်ဒိုနီးရှားဟာ အရှေ့နဲ့အနောက် မိုင်ပေါင်း ၃၁၀၀ လောက် ကျယ်ပြန့်တဲ့ ဧရိယာမှာ ပျံ့နှံ့နေတဲ့ ကျွန်းစုပေါင်း ၆၀၀၀ ကျော်မှာ လူသားတွေ အခြေချ နေထိုင်နေကြပါတယ်။ လူမနေတဲ့ ကျွန်းတွေကိုပါ ထည့်တွက်ရင်တော့ စုစုပေါင်း ကျွန်းအရေအတွက်က ၁၇၅၀၀ ကျော်ထိ များပြားကြောင်း သိရပါတယ်။

ကိုးကား: CNN

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA