Рөлде келе жатып жолды картадан қарап отырған жүргізушілерге де айыппұл салынбақ

Описание: Бұдан былай рөлде келе жатып жолды картадан қарап отырған жүргізушілерге де айыппұл салынуы мүмкін. Бүгіннен бастап көшедегі камералар көлік қозғалысын ғана емес, машина ішіндегі адамдардың да әрекетін түсіреді. Егер жүргізуші жолға қарамай, телефонға телмірсе оған бірден шара қолданылмақ. Бақылау құрылғылары одан бөлек қауіпсіздік белдігін тақпағандарды да анықтайды. Тақырыпты әріптесім Оразай Нұртайұлы жалғастырсын.
ОРАЗАЙ НҰРТАЙҰЛЫ, тілші:
Енді камералар қауіпсіздік белдігін тақпаған жүргізушіні де бақылайды. Яғни, бұдан былай көшеде полиция көргенде ғана емес автоматты түрде айыппұл арқалағыңыз келмесе белдікті ұдайы тағу қажет болады. Және бұл тәртіп жолаушыларға да қатысты. Олар да қауіпсіздік белдігін тағуы тиіс, әйтпесе жүргізушінің өзі жауапқа тартылады.
Негізі рөлде отырып телефонға телміргендерге, белдік тақпағандарға бұрыннан айыппұл салынады. Бірақ тиісті шара заңбұзушылықты полиция инспекторы байқаса ғана қолданылып жүрген еді. Ал бүгіннен бастап тізгінде келе жатып телефон ұстағандарды, мейлі ол карта қарасын немесе маңызды әңгіме айта ма, камера түсіріп алып, бірден айыппұл салады.
САЛТАНАТ ӘЗІРБЕК, Алматы қаласы полиция департаментінің ресми өкілі:
Қауіпті көлік құралын тізгіндейді. Сол үшін оның зейіні ешқашан бөлінбеуі тиіс. Ол рөлде отырғанда тек қана жолға қарауы, назарын салуы керек.
Ал еліміз бойынша телефон ұстаған жүргізушілерге салынатын айыппұл 21 мың теңгеден асады. Камера тіркесе хаттама автоматты түрде көлік иесіне жолданады екен. Яғни, смс, банк қосымшасы арқылы келеді. Жаңашылдыққа қатысты жүргізушілердің өзі әртүрлі пікірде.
Камералар іске қосылғалы қанша азаматқа белдік тақпағаны, телефон қарағаны үшін шара қолданылғаны әзірге белгісіз. Полиция департаментінің хабарлауынша, бүгінде бір Алматының өзінде 180 мыңнан астам бейнебақылау құрылғысы бар. Техниканың бәрі жаңа тәртіппен жұмыс істеуге дайын дейді. Айта кетсек, тиісті шара қозғалыс барысында келе жатып телефонға телміргендерге қолданылады. Яғни, көлік ішінде мүлдем смартфон қарауға болмайды дегенді білдірмейді.



#Информбюро #31арна #БастыЖаңалықтар #Новости #31канал