“Është babai i fëmijëve” / Kaloi detin me skaf për burrin që e dhunonte: U ndava dhe e fala!

Описание: Kur Liljana nis rrëfimin e saj në “Ka Një Mesazh Për Ty”, ditët e fëmijërisë i kujton me një psherëtimë. Një familje e madhe në Akërni të Vlorës, me 9 fëmijë që rriteshin në varfëri. Liljana tregon për rubrikën e së “Dielës Shqiptare” në Tv Klan se dëshironte të vazhdonte shkollën, por babai i tha se nevojiteshin para dhe nisi punë që në moshën 15-vjeçare.

Kur mbushi 18 vjeçe, e fejuan me mblesëri dhe brenda 6 muajve, u martua në Varibobë të Fierit. Nga kjo martesë, Liljana ka tre fëmijë. Ajo tregon se gjithçka shkonte mirë në fillim, por kur ishte shtatzënë për herë të tretë me vajzën, bashkëshorti ndodhej në emigrim në Greqi dhe nuk e besonte se ishte e tij. Kur u kthye, nuk e trajtonte mirë të shoqen deri në momentin që vajza erdhi në jetë dhe e besoi për shkak të ngjashmërisë që kishin të dy.

Megjithatë, gjërat nuk u përmirësuan as më vonë. Pasi i shoqi emigroi sërish, këtë herë drejt Italisë, Liljana vendosi të sakrifikonte edhe ajo për t’iu bashkuar që t’u siguronte një të ardhme fëmijëve. Por as në Itali situata mes tyre nuk ndryshoi sepse ajo vijoi të përballej me dhunën e bashkëshortit.

Liljana: Në ’97, ai iku në Itali. Në ’98 unë kam ikur me skaf me gjithë fëmijët. Isha unë me fëmijët, vëllai që kam në Itali me dy fëmijët, motra tjetër, kishte tre fëmijë dhe ajo, ne kemi ikur të gjithë me një skaf. Ai skafi ishte shumë i vogël, kishte vetëm një dhomë të vogël përpara, ne u futëm të gjithë aty. Nuk e di si kemi shpëtuar atë natë, kishte shumë peshë skafi, shumë njerëz.

Ardit Gjebrea: Kam një pyetje, Liljana.

Liljana: Po!

Ardit Gjebrea: Nuk di nëse mund ta them, por unë e di historinë tënde që bashkëshorti nuk të trajtonte mirë, të dhunonte fizikisht, ti shpesh ke fjetur në çimento. Por pse duhet të shkoje drejt Italisë, gjithë këtë sakrificë, te një njeri që ty të ka dhunuar në atë farë feje?

Liljana: Gjithmonë mendon hë se do të ndryshojë, është babai i fëmijëve dhe... më fal... kur kam ikur me skaf, kam menduar unë do të shkoj atje, ai do, nuk do, unë do të shkoj sepse ai rrinte atje me ca shokë të vetët dhe veç për fëmijët e mi, për të ardhmen e tyre se doja t’i fusja në shkollë se këtu nuk kishte më njeri, ngelën vetëm pleqtë dhe kur shkova atje ai nuk ishte i kënaqur, madje më tha pse i ke prurë, i thashë unë kam ardhur, kam bërë sakrificë dhe fëmijët do t’i fus në shkollë.

Ardit Gjebrea: Në momentin që një baba të thotë pse m’i ke sjellë fëmijët, çfarë mendon një nënë?

Liljana: Një nënë mendon për të mirën e fëmijëve dhe këtë gjë e mendova shumë mirë. Morëm një shtëpi dhe thashë nëse ndryshon, ai do të jetojë me mua dhe me fëmijët, në qoftë se nuk ndryshon, unë do të jetoj vetëm me fëmijët.

Pavarësisht përpjekjeve të Liljanës për ta ndihmuar me trajtime, i shoqi nuk bëri përparime. Ajo tregon se u nda dhe u rikthye sërish me të, por rezultati qe i njëjti.

Ardit Gjebrea: Mendove ndonjëherë të ndaheshe prej tij?

Liljana: U ndava para se të fejohej vajza e madhe, u ndava, pastaj thashë ta provoj edhe njëherë, ndoshta ndryshon.

Ardit Gjebrea: Ti u ndave, u fejua vajza dhe the ta provoj prapë?

Liljana:  E prura prapë te shtëpia se thashë është babai i fëmijëve, njeriu edhe fal.

Ardit Gjebrea: Çfarë ndodhi?

Liljana: U bë më keq.

E Diela Shqiptare, programi më popullor në të gjitha familjet shqiptare, vjen çdo të diel. Një program i cili përfshin një fashë orari maratonë, prej 6 orësh transmetim live. Struktura e programit: “Ka një mesazh për ty”, “Quiz me 5 Yje”, “Të panjohurit”, “Kujdes shëndetin”, “Telebingo shqiptare”, “Shihemi në gjyq”, “Power Kidz”, etj. Ndërsa që prej vitit 2003, bashkëprodhon me Klan festivalin më prestigjioz të muzikës moderne shqiptare, “Kënga Magjike”, live nga Pallati i Kongreseve.

#EDielaShqiptare #ArditGjebrea #TVKlan

#liljana #frederik #majlinda #dhune #alkool #mirenjohje #femije #bashkeshort #divorc #itali #vlore #dashuri