បុណ្យសង្ឃទានប្រគេនបច្ច័យ៤ព្រះសង្ឃការពារព្រៃឈើសត្វព្រៃក្នុងព្រៃសង្ឃសហគមន៍រុក្ខាវ័ន

Описание: ព្រះសង្ឃសកម្មក្នុងការងារសង្គម ព្រះតេជគុណ លួន សុវ៉ាត បាននិមន្តរួមដំណើរជិះគោយន្តល្បាតព្រៃមើលទឹកដីព្រៃព្រឹក្សាសត្វព្រៃជាមួយព្រះសង្ឃសកម្មក្នុងកិច្ចការពារសម្បត្តិធនធានធម្មជាតិនានា មានព្រៃឈើសត្វព្រៃជាដើមក្នុងព្រៃសង្ឃសហគមន៍រុក្ខាវ័ន ដែលមានផ្ទៃដី៣០២៥៤ហិចតា ជាប់ស្រុកទាំង៣មាន ស្រុកសំរោង ស្រុកអន្លង់វែង ស្រុកចុងកាល់នៃខេត្តឧត្តរមានជ័យ ដែលព្រះសង្ឃរួមនិងប្រជាសហគមន៍បានរួមគ្នាថែរក្សាការពារព្រៃឈើឲ្យបានគង់វង្សទុកជាសម្បត្តិជាតិសាសនាទឹកដីព្រៃព្រឹក្សាមនុស្សសត្វក្តីណា គ្រាន់បានអាស្រ័យ ។ ព្រះតេជគុណ ប៊ុន សាលូត ដែលជាព្រះបីតាសង្ឃខេត្តឧត្តរមានជ័យនិងជាព្រះប្រធាន #ព្រៃសង្ឃសហគមន៍រុក្ខាវ័ន ហើយក៏ជាម្ចាស់ពានរង្វាន់ Equators Prize ពីអង្គការ UNDP នៅទីក្រុងញូយ៉ក សហរដ្ឋអាមេរីកកាលពីឆ្នាំ២០១០ផងនោះ ព្រះអង្គបានមានព្រះបន្ទួលថា ហេតុផលដែលនាំឲ្យព្រះអង្គលះបង់ពេលវេលាចំណេះដឹងកំលាំងកាយវាចាចិត្តនិងថវិកាធនធានដឹកនាំព្រះសង្ឃប្រជាសហគមន៍ការពារព្រៃឈើសត្វព្រៃនៅទីនេះអស់រយៈកាល១៨ឆ្នាំកន្លងទៅនេះគឺដោយសារតែព្រះអង្គបានបួសរៀននិងសិក្សាពុទ្ធប្រវត្តិឃើញថា ព្រះពុទ្ធគឺជាអ្នកការពារព្រៃឈើសត្វព្រៃមុនគេ ដោយសារតែដំណើរជីវិតរបស់ព្រះពុទ្ធគឺប្រសូតិ ត្រាស់ដឹង បរិព្វាន គឺសុទ្ធតែក្នុងព្រៃ ទើបធ្វើឲ្យព្រះអង្គមានព្រះទ័យស្រលាញ់សត្វព្រៃនិងព្រៃឈើហើយក៏បានរួមគ្នាធ្វើការអភិរក្សព្រៃសង្ឃសហគមន៍រុក្ខាវ័ននេះឡើងរហូតមកដល់ពេលនេះដើម្បីទុកឲ្យកូនចៅជំនាន់ក្រោយបានឃើញបានស្គាល់ព្រៃឈើនិងសត្វព្រៃរាប់រយពាន់ឆ្នាំតរៀងទៅ ។ ព្រះតេជគុណ ប៊ុន សាលូត បានមានថេរដីកាបន្ថែមថា ព្រះអង្គមានបំណងចង់បង្កើតឲ្យមានអេកូទេសចរណ៍ធម្មជាតិជិះទូក ជិះកង់ ជិះគោយន្តកំសាន្តមើលទេសភាពដើមឈើគ្រប់ប្រភេទនិងសត្វព្រៃ ក្នុងតំបន់ព្រៃសង្ឃសហគមន៍រុក្ខាវ័នក្នុងថ្ងៃអនាគតផងដែរ ប៉ុន្តែ បច្ចុប្បន្នគឺមានការលំបាកខ្វះខាត ទាំងសម្ភារៈប្រើប្រាស់ដើម្បីការពារព្រៃផង ខ្វះខាតចង្ហាន់ព្រះសង្ឃផង ហើយថែមទាំងប្រឈមនឹងគ្រោះថ្នាក់ចំពោះជនល្មើសលួចកាប់ឈើ ដាក់អន្ទាក់សត្វផង ម៉្យាងទៀតជនល្មើសលួចដុតភ្លើងឆេះព្រៃគ្មានអ្វីនឹងពន្លត់ភ្លើងផង ទើបព្រះអង្គមានបំណងឲ្យជនរួមជាតិខ្មែរទាំងក្នុងប្រទេសក្រៅប្រទេសជួយគាំទ្រចូលរួមថែរក្សាការពារទាំងអស់គ្នា ។ ព្រះតេជគុណ លួន សុវ៉ាត ក៏បានប្រគេនម៉ាស៊ីនទាក់ទង អាយកូម៥គ្រឿងនិងប្រគេនចង្ហាន់សង្ឃទានដល់ព្រះសង្ឃក្នុងព្រៃហើយក៏បានប្រគេនបច្ច័យ៤ចំនួន៣០០ដុល្លាផងដែរ ដែលជាសទ្ធាជ្រះថ្លារបស់ពុទ្ធបរិស័ទជនរួមជាតិខ្មែរនៅសហរដ្ឋអាមេរីកមាន ឧបាសក ឡូ ប៊ុនឡេង ឧបាសិកា អៀប ឆៃគីម ព្រមទាំងកូនចៅ Santa Ana.California.USA ដែលមិនភ្លេចអំពីការធ្វើបុណ្យក្នុងសង្គមជាតិសាសនាតែងតែផ្ញើរថវិកាមកកាន់ប្រទេសកម្ពុជាដើម្បីធ្វើបុណ្យធ្វើទាន ដើម្បីជាប្រយោជន៍ ដើម្បីសេចក្តីសុខចម្រើនតរៀងទៅ ។ #ខ្មែរជួយខ្មែរ ២៥កុម្ភៈ២០១៩