Living with Wild Animals | Homestay in Jim Corbett Where Tiger Comes Regularly - Tanhau Series 4K

Описание: Cricket ka naam sunte hi sabse pehle dimaag mein kaun aata hai – Sachin Tendulkar, Bollywood ki jab baat hoti hai, toh kaun yaad aata hai – Amitabh Bachhan. Isi tarah Duniya mein kahin bhi agar Wildlife ki baat ho, aur iss shaks ka zikr na ho, aisa mumkin hi nahi hai.
Inhone 1907 se 1938 tak 19 tigers aur 14 leopards ka shikaar kiya. Shikaar karne ke bavjood, inka Vanya Jeevan se prem badhta raha. Aur itna badha ki Nainital mein bana inka ghar aaj ek museum hai. Ji haan, hum baat kar rahe hain Jim Corbett ki, jinka 1957 mein bharat ke pehle tiger reserve ki sthapna mein bohot bada haath tha.
Aur apne Jeevan kaal mein Jim Corbett kayi saari remote jagah pe ruk ke baaghon ka shikaar karte the. Wo Baagh ke behaviour ko padh insaan ki tarah nahi, balki baagh ki tarah sochte the. Aur aisi hi ek remote location pe hum aa gaye, jahan ruk ke Jim Corbett ne Mohan ke man-eating tigers ko track kiya tha.
Umaid ji ke saath walk karte karte hum yahan aa gaye aur aaj se lagbhag 100 saal purane kisse kahaniya sunne lage. Aur Jim Corbett ke ghar ke theek peeche humari mulaqat hui Mahesh Ji se, jo ki van vibhag ke ek karmi hain. Mahesh ji ki poori kahaani 4 episodes mein humne apne channel pe daali hai. Dekhne ke liye neeche link pe click karen.
Lagbhag 5 baje ke aas paas hum wapas aa gaye. Aur raaste bhar bass ek hi baat sochte rahe. Yahan pe toh duur duur tak insaan nahi dikhta. Bass pahaad aur natural beauty. Toh aise mein apni human life ko balance karke chalna kaafi mushqil hai. Aur yahi sawaal humne Sunando se bhi puch liya.
Kaise muskura ke Sunando ne jawaab de diya. Lekin fir bhi humare mann mein ek aur sawaal aaya. Aaj ke zamane mein insaan ki sabse badi problem ban gayi hai FOMO – yaani ki Fear of Missing Out. Iska matlab ki wo ek kaam karta hai, toh darta hai ki dusra na chuut jaye. Aur dusra karta hai, toh lagta hai ki teesra na chuut jaye. Agar IPhone lete hain, toh Samsung ka fold hone wala phone dikhta hai, aur Tata Harrier lete hain, toh smart wali Hector dikhne lagti hai. Toh yahan pahaad pe baith ke kya Sunando ko bhi FOMO hota hoga? Aisa kabhi lagta hoga ki sheher mein kuch aisa hai, jo miss ho raha hai?
Sunando se baatein chalti hi rahengi par ab aage ka plan tha ki jab Sunando apne din bhar ke office ke kaam se free honge, toh hum ek choti si night drive pe jaenge. Iss night drive ka maqsad janwar dekhna nahi tha, balki ye mehsoos karna tha, ki inn pahadon pe sunset hota kaisa hai.
Tanhau ke aas paas waise hi bohot saari wildlife hai. Aur raat ko toh jaanwar aur bhi zyada active ho jaate hain. Iss night drive mein hum main road tak gaye, jahan se Ramnagar cham chama raha tha. Aisa lag raha tha ki Jim Corbett ke ekdum core area mein, human population se duur aa chuke hain.