₾1 მილიარდის პრობლემური პროექტები - ინფრასტრუქტურული კრიზისი

Описание: ინფრასტრუქტურული პროექტები და მათი შესრულების ხარისხი, რომელიც გაირკვა, რომ 214-დან 161 შემთხვევაში პრობლემური იყო. საუბარია პროექტებზე, რომელთა ღირებულებაც 1 მლრდ ლარს აღემატებოდა.

"ოცნების" მთავრობაში ინფრასტრუქტურის მინისტრმა რევაზ სოხაძემ გუშინ პარლამენტში ინტერპელაციით მოსმენის ფარგლებში, მუნიციპალური განვითარების ფონდში არსებულ გამოწვევებზე გაამახვილა ყურადღება და განაცხადა, რომ პრობლემებში იგულისხმება როგორც შესრულების დაბალი ტემპი, ასევე შეჩერებული და ვადაგადაცილებული პროექტები და რაც მთავარია მათი ხარისხი.

რევაზ სოხაძის თქმით, მუნიციპალური განვითარების ფონდში პროექტების განხორციელებისას ავანსები დიდი მოცულობით ყველანაირი გარანტიის გარეშე გაიცემოდა, შესრულების ვადები არ დგინდებოდა, რაც პროექტების გაჭიანურებას იწვევდა.

"ოცნების" ინფრასტრუქტურის მინისტრის განცხადებით, უწყებაში რეორგანიზაციისა და სისტემის მოდერნიზების პროცესი უკვე დაწყებულია. სოხაძე ირწმუნება, რომ ორიენტირი აღებულია ხარისხზე ორიენტირებული მმართველობისკენ, რაც მოიაზრებს პროექტების დეტალურ შესწავლას და პრიორიტეტების სწორად განსაზღვრას.

მისივე თქმით ქვეყანა მომავალი წლის ბოლოსთვის სრულად გადავა ევროპულ სამშენებლო სტანდარტებზე, რაც სამშენებლო სექტორში ხარისხის და ეფექტიანობის ამაღლებას შეუწყობს ხელს.

პარლამენტში სიტყვით გამოსვლისას რევაზ სოხაძემ იმ ცვლილებებზეც ისაუბრა, რომელიც სახელმწიფო შესყიდვებისას განხორციელდება. როგორც BMG-ის მაყურებლებისთვის და მკითხველებისთვის ცნობილია, კომპანიებს 2026 წლიდან სახელმწიფო კონტრაქტის ავანსის 60%-ის საბანკო გარანტიის წარდგენა მოუწევთ. ცვლილება გათვალისწინებულია სახელმწიფო შესყიდვების სააგენტოს თავმჯდომარის მიერ მიღებულ ახალ რეგულაციაში, რომელიც „თეთრი სიის წარმოების წესისა და პირობების“ განახლებას ითვალისწინებს. დოკუმენტის მიხედვით, ცვლილება ეტაპობრივად ამოქმედდება. 2026 წელს ავანსის გარანტიის მოცულობა განისაზღვრება 60%-ით; 2027 წელს — 70%-ით; 2028 წელს — 80%-ით; 2029 წლიდან კი ამოქმედდება ახალი მოდელი, რომელიც „თეთრი სიის“ კრიტერიუმებსა და პრეფერენციებს განსაზღვრავს. რევაზ სოხაძის თქმით, ავანსების სისტემა არაერთ შემთხვევაში თანხების არამართლზომიერად განკარგვის რისკებს ქმნიდა.

სტუმრები: ირაკლი გიორგობიანი - ინფრასტრუქტურის მშენებელთა ასოციაციის აღმასრულებელი დირექტორი;
ირაკლი აბესაძე - "სამოქალაქო მონაწილეობის ცენტრის ხელმძღვანელი;
ტიტე ჯიშიაშვილი - სამშენებლო ლაბორატორია Caucasian Infrastructure Technology-ის დირექტორი;
სანდრო ქევხიშვილი - საერთაშორისო გამჭვირვალობა-საქართველოს ანტიკორუფციული პროგრამის ხელმძღვანელი