ချင်းချောင်းနန်းတော် ဗိသုကာပညာရှင်ရဲ့လက်ရာ ၂ ထပ် ဘုန်းကြီးကျောင်းဆောင်ကြီး

Описание: ရန်ကုန်မြို့ ဗဟန်းမြို့နယ်မှာရှိတဲ့ မဟာသကျအတုလမာရ်အောင်ဘွဲ့တော်ရ ငါးထပ်ကြီးဘုရားကို ရောက်ဖူးသူ အများအပြားရှိကြပေမယ့် ငါးထပ်ကြီးဘုရာဝန်းကျင်မှာရှိတဲ့ လေ့လာစရာ သမိုင်းဝင် ဘုန်းကြီးကျောင်းဆောင်တွေရှိနေတာကို သိပ်မသိရှိကြပါဘူး။

အမှန်တကယ်အားဖြင့် အဲဒီမှာရှိတဲ့ ကျောင်းတိုက်တချို့ဟာ ငါးထပ်ကြီးဘုရားထက်တောင် ရှေးကျပါတယ်။ ဘုန်းကြီးကျောင်းတိုက်တွေက အရင်ရှိနေပြီးမှ ဘုရားကြီးကို တည်ထားကိုးကွယ်ခဲ့တာဖြစ်ပါတယ်။

ဥပမာ - ငါးထပ်ကြီးဘုရား သာသနာ့နယ်မြေထဲမှာရှိတဲ့ “အတုလရတနာ မဟာမင်္ဂလာဘုံကျောင်း”ဟာ ခရစ်နှစ် ၁၈၈၇ ခုနှစ်မှာ တည်ဆောက်ခဲ့တာဖြစ်ပြီး သက်တမ်းအားဖြင့် ၁၃၅ နှစ်ရှိပြီဖြစ်ပါတယ်။ ငါးထပ်ကြီးဘုရားကိုတော့ ခရစ်နှစ် ၁၉၀၀ ပြည့်နှစ်မှာ တည်ထားကိုးကွယ်ခဲ့တာဖြစ်တာကြောင့် သက်တမ်းအားဖြင့် “အတုလရတနာ မဟာမင်္ဂလာဘုံကျောင်း”ထက် ၃ နှစ် နောက်ကျပါတယ်။

အခု ဒီဗီဒီယိုမှာမြင်တွေ့ရမှာကတော့ “အတုလရတနာ မဟာမင်္ဂလာဘုံကျောင်း”နဲ့ မျက်နှာချင်းဆိုင်မှာတည်ရှိတဲ့ တရုတ်လက်ရာ သမိုင်းဝင် ၂ ထပ်ကျောင်းဆောင်ကြီးဖြစ်ပါတယ်။ ဒီကျောင်းဆောင်ကြီးရဲ့ ဗိသုကာဟာ ရန်ကုန်မြို့ရဲ့ နာမည်ကျော် သမိုင်းဝင်အဆောက်အဦတခုဖြစ်တဲ့ ချင်းချောင်းနန်းတော်ကြီးကိုတည်ဆောင်တဲ့ ဗိသုကာပညာရှင်ပဲဖြစ်ပါတယ်။

အသေးစိတ် အနုလက်ရာ ပုံဖော်မှုများကို တွေ့မြင်နိုင်ပြီး ဆောက်လုပ်ခဲ့တဲ့ ပန်းရံနဲ့ လက်သမားတွေဟာလည်း တရုတ်လူမျိုးတွေဖြစ်တယ်လို့ ဆိုပါတယ်။ ကျောင်းဆောင်ကြီးဟာလည်း သက်တမ်းအားဖြင့် နှစ် ၁၁၂ နှစ်ခန့်ရှိပြီဖြစ်ပါတယ်။

လက်ရှိ ဒီကျောင်းတိုက်မှာ သက်တော် ၈၀ ကျော်ပြီဖြစ်တဲ့ ဆရာတော် ဦးနေမိန္ဒနဲ့ သံဃာအချို့ သီတင်းသုံးနေထိုင်လျက်ရှိပါတယ်။


ကျောင်းဆောင်ကြီးဟာ ရှေးဟောင်း ပုဂံဘုရားများနည်းတူ တိုင်ပျောက်ပုံစံ တည်ဆောက်ထားတာဖြစ်ပြီး အဲဒီခေတ်က တန်ဘိုးငွေ ကျပ် ၁ သောင်းကျော် အကုန်အကျခံ ဆောက်လုပ်ခဲ့တာလို့ ဆရာတော် ဦးနေမိန္နက မိန့်ကြားပါတယ်။