ရခိုင်က မြို့နှစ်မြို့ ဗုံးကြဲခံရလို့ ကလေးတစ်ယောက်သေဆုံးပြီး အရပ်သား နှစ်ယောက်ဒဏ်ရာရ

Описание: ရခိုင်က မြို့နှစ်မြို့ ဗုံးကြဲခံရလို့ ကလေးတစ်ယောက်သေဆုံးပြီး အရပ်သား နှစ်ယောက်ဒဏ်ရာရ (ရုပ်/သံ)

(နွားနှစ်ကောင်သေဆုံးပြီး နောက်ထပ်နှစ်ကောင်လည်း ဒဏ်ရာရ)

နိရဉ္စရာ၊ နိုဝင်ဘာ ၂၁/၂ဝ၂၅

ရခိုင်က မြို့နှစ်မြို့ကို အကြမ်းဖက်လေတပ်ကဗုံးကြဲလို့ ကလေးတစ်ယောက်သေဆုံးပြီး အရပ်သား နှစ်ယောက်ဒဏ်ရာရသွားခဲ့ပါတယ်။ ဒါ့အပြင် နွားနှစ်ကောင်သေဆုံးပြီး နောက်ထပ်နွားနှစ်ကောင်လည်း ဒဏ်ရာရသွားခဲ့တယ်လို့ သိရပါတယ်။

ဗုံးကြဲခံလိုက်ရတဲ့မြို့နှစ်မြို့ကတော့ ဂွမြို့နယ်၊ ကျိန္တလီမြို့နဲ့ မြောက်ဦးမြို့တို့ဖြစ်ကြပါတယ်။

ကျိန္တလီမြို့၊ အမှတ် (၁)ရပ်ကွက်ကို ဒီကနေ့ နိုဝင်ဘာလ ၂၁ ရက်၊ နေ့လယ် ၁ နာရီကျော်က အကြမ်းဖက်လေတပ်က ဂျက်ဖိုက်တာနဲ့ လာရောက်ဗုံးကြဲခဲ့တာပါ။ အဲလို ဗုံးကြဲခဲ့တဲ့အတွက် အဲဒီရပ်ကွက်က အသက် (၇)နှစ်အရွယ် မောင်ချမ်းဘုန်းသက်သေဆုံးသွားခဲ့ပါတယ်။ အသက် ၃ဝ အရွယ် ကိုမြတ်သူရစိုးနဲ့ အသက် ၄ဝ အရွယ် ဦးငြိမ်းချမ်းကျော်တို့လည်း ဒဏ်ရာရသွားခဲ့ပါတယ်။

ဦးငြိမ်းချမ်းကျော်ရဲ့နေအိမ်အတွင်း ဗုံးသီးကျရောက်ပေါက်ကွဲခဲ့တဲ့အတွက် အခုလို ထိခိုက်မှုရှိခဲ့တာလို့လည်း ဂွဒေသခံတစ်ယောက်က နိရဉ္စရာကို ပြောပါတယ်။

မနေ့က နိုဝင်ဘာ ၂၀ ရက်နေ့ ညနေ ၄ နာရီခွဲကလည်း မြောက်ဦးမြို့ပြင်က ဘောင်းဒွတ်ရွာအနီးအနားဝန်းကျင်ကို အကြမ်းဖက်လေတပ်က ဂျက်ဖိုက်တာနဲ့ ဗုံးနှစ်လုံးကြဲချခဲ့တယ်လို့ ဒေသခံတွေက ပြောပါတယ်။ အဲလိုကြဲချခဲ့တဲ့အတွက် နွားနှစ်ကောင်သေဆုံးပြီး နောက်ထပ်နွားနှစ်ကောင်လည်း ဒဏ်ရာရရှိသွားခဲ့ပါတယ်။

စစ်ကော်မရှင်လေတပ်ဟာ သူတို့ရဲ့တစ်ခုတည်းသော အားကိုးအားထားပြုနေရတဲ့လေတပ်ကို အသုံးပြုပြီး ရခိုင်ပြည်အနှံ့အပြားက ပြည်သူတွေနေထိုင်ရာ လူနေရပ်ကွက်နဲ့ ကျေးရွာတွေကို နေ့စဉ်ရက်ဆက် ဗုံးကြဲနေတယ်လို့ ဒေသခံတွေက ပြောပါတယ်။

အဲလိုဗုံးကြဲနေတဲ့အတွက် အပြစ်မဲ့ ကလေးငယ်တွေ၊ အမျိုးသမီးတွေအပါအဝင် ပြည်သူတွေသေဆုံးမှုဟာလည်း တစ်နေ့ထက် တစ်နေ့ တိုးလာနေတယ်လို့ သိရပါတယ်။