Uchchimuni to Kalpitiya | උච්චිමුනෙයි පාසල සහ ධීවර වාඩි අතරින් වැලි මාවත දිගේ කල්පිටියට

Описание: කල්පිටිය සිට "රස්සාවේ" යන ධීවර බෝට්ටු වලින් කොටසක් උච්චිමුනෙයි තුඩුවට පැමිණෙන්නේ දැල් ආම්පන්න සදහා අවශ්‍ය වැලි උර වැලි වලින් පුරවා ගැනීමටයි. මෙම ධීවරයන් "රස්සාවේ යනවා" නැතිනම් "රස්සාවට යනවා" යනුවෙන් ගරු කොට පවසන්නේ ධීවර රැකියාව සදහා බෝට්ටුවෙන් මුහුදු යෑමයි. "කල්පිටියෙ ඉදන් ද එන්නේ....?" මා එක් ධීවරයෙකුගෙන් විමසූවේ තොරතුරු ටිකක් දැන ගැනීමටයි. "ඔව් ඔව්... හැමදාම දැලට ඕන වැලි උර ගහගන්නේ මෙතනින්.. අපරාදෙනේ කල්පිටියෙ ඉදන් බර පටවගෙන එන්නේ.." ඔහුගේ පිළිතුර විනි. "උදේ ගිහින් රෑද එන්නේ..?" මාගේ ප්‍රශ්න නම් අවසාන නොවේ. "වෙලාවක් නෑ මහත්තයෝ.. වාසියක් උනේ නැත්තම් රෑ වෙනකම් හරි ඉදලා එන්නේ.." එසේ කියා සුසුමක් හෙළමින් බලාපොරොත්තු සහිතව වැලි උරය ගැට ගැසුවේ අපට පිටත් වීමට කාලය එළබ ඇති බැව් අතින් සංඣා කරමිනි. "සුභ ගමන්.." කියමින් අප ඔවුනට සමු දුන්නේ අප පමණක් ඉතිරි වූ නිදහස් වැලි තුඩුවට වී,සොබාදහමේ සුන්දරත්වය සමග කාලය ගත කිරීමටයි.

තේ පානයෙන් අනතුරුව එහා මෙහා පෙනෙන නොගැඹුරු මුහුදට පැන සිත් සේ නාකියා ගත්තේ ඒ මේ අත පිහිනා යමිනි. කෙසේ වෙතත් දූපතක තනි වූවාක් මෙන් නිදහස් හැගීමක් උච්චිමුනෙයි තුඩුවට වී කාලය ගත කල අපට හැගෙන්නට විය. දිය නා අවසාන වූ පසු කූඩාරම් සියල්ල නැවතත් හකුලා ගමන් මලු සමග මෝටර් සයිකල් වලට තබා ගැට ගසා ගත්තේ අප කංඩායම නැවතත් කිලෝමීටර් පහළොවකට වැඩි දුරක් කල්පිටිය දක්වා දුශ්කර මගක් ඔස්සේ පැමිණිය යුතු නිසාවෙනි.

උදෑසන දහය පමණ වන විට අප කණ්ඩායම උච්චිමුනෙයි වැලි තුඩුවට සමු දී ආපසු ගමන් ඇරඹූ අතර,අප ඒ එන අතරවාරයේ මුලින්ම ගොඩ වැදුනේ වැලි තුඩුවේ සිට කිලෝමීටර් දෙකක පමණ දුරින් පිහිටා ඇති උච්චිමුනෙයි පාසල වෙතයි. අප යන විටත් කුඩා දරු දැරියන් අසූවකට ආසන්න සංඛයාවක් ගුරුවරුන් සමග ක්‍රීඩා කටයුතු කරමින් පසු වූ අතර ඒ සියලුම දෙනා පාසලේ මායිම ලෙස පිහිටා ඇති දැල් වැට වෙත දිව ආවේ අප ගමන් ගත් යතුරු පැදි දෙස පුදුමයෙන් මෙන් බලමින් මින් පෙර නොදුටු විරූ පුදුම සහගත දෙයක් බලන්නට එන්නාක් මෙනි.

කෙසේ වෙතත් වැට මායිමේ නතර වූ අප එක් දරුවකුගෙන් විමසා සිටියේ "කෝ පුතේ ටීචර් පුතාලගේ..?" යනුවෙනි. දරුවා පිළිතුරු දීමටත් මත්තෙන් එක් ගුරු බවතෙක් වැට මායිම ආසන්නයට පැමිණි අතර එතුමාට අප කල්පිටියෙන් ‍රැගෙන පැමිණි පෑන්,පැන්සල්,ඉරේසර් සහ කටර් වැනි පාසල් උපකරණ කිහිපයක් ලබා දුන්නේ "බයික් වලින් ගේන්න පුලුවන් විදිහට අරං ආවා සර් අපි.." කියමිනි. "අපිත් ගොඩක් දුර ඉදන් එන්නේ මේ ළමයි වෙනුවෙන්.. අර බෝල දාන්නේ මේ ඉස්කෝලේ ප්‍රින්සිපල් සර්.. අද තමා අපි ලෝක ලමා දිනේ වෙනුවෙන් ළමයින්ට සෙල්ලම් කරන්න දුන්නේ.." යනුවෙන්,ගුරුතුමා අප සමග පවසා සිටියේ ඈත දුශ්කර පාසලක අදටත් කාරුණික හදවත් ඇති ගුරුවරුන් සිටිනා බවට සාක්ෂි සාධක සපයමිනුයි.

පාසලට සමු දී පැමිණෙන විට මද්‍යහනය ලං වී තිබූ අතර හිරුගේ රශ්මියත්, රත් වූ වැලි නිසාත් ගමනේ දුශ්කර බව තවත් වැඩි විනි. කෙසේ වෙතත් අප කෙමෙන් කෙමෙන් කිලෝමීටර් ගණනාවක් ගෙවා දමමින් කුඩා ධීවර වාඩි කිහිපයක් සමීපයට ලගා වූයේ කුඩා විවේකයක් ලබා ගැනීමටයි. තැනින් තැන නතර කරණ ලද යතුරු පැදි ලගම වාඩි වී සිටි අපගේ නෙත ගැටුනේ කුරුම්බා වලු වලින් ඵල බර වී ඇති පොල් ගස් කිහිපයකි. "සල්ලි දීලා කඩාගමුද?.." මාගේ අදහස විනි. "ගියොත් වචනයක් ආවොත් කුරුම්බා" කියමින් කෝලිත මල්ලී ධීවර වාඩියක් වෙත ඇවිද ගියේ අව් කූටේ පැමිණි අපට කුරුම්බා ගෙඩියක් බීම සැබැවින්ම දිව්‍ය ඔෂධයක් හා සමාන වන නිසාවෙනි.

"මේ අපිට කුරුම්බා කඩන්න එපා කිව්වා.. එයාලා කඩලා දෙන්නම් කිව්වා.. ඒක නෙමෙයි වැඩේ පාන් කන්න පරිප්පුවත් ඒ නැන්දාම හදලා දෙන්නම් කිව්වා.." යැයි කියමින් නැවතත් කෝලිත මල්ලි අප වෙත පැමිණියේ කණ්ඩායමේ සියලුම දෙනාට සැනසුම් සුසුමක් හෙලීමට අවස්ථාව සළසා දෙමිනුයි.

මේ සොදුරු සංචාරය රූප රචනාවෙන්ම නරඹමු

ආයුබෝවන් මම දිනේෂ්.

The second episode of one of the most adventurous motorcycle rides I have ever done. This video begins from the second morning we spent at the uchchamunai. It was a glorious sunrise on that day. We had our morning tea there, and while that was, we met a few fishermen who came to Uchchamunai to make sandbags for their fishing purposes. After that, since we had to leave this beautiful place, we cleared our campsite. While on our way, we stopped at the only school in this area and handed over a few school supplies which we brought. After that, we were fortunate to have a beautiful hospitality from one of the village families. This was a memorable experience—my gratitude to Ceylon Adventure Tours.

Greetings
I am Dinesh

➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖
Instagram -   / dinesh_a_pathum  
➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖

“Copyright @ [Dinesh A Pathum 2023]. Any illegal reproduction of this content will result in immediate legal action.‼️“