រយៈពេល១៩ឆ្នាំ សមាគមជីវិត និងក្ដីសង្ឃឹម បានបណ្ដុះបណ្ដាលជំនាញកាត់ដេរដល់សិស្ស ៣៤៦នាក់

Описание: រយៈពេល១៩ឆ្នាំ សមាគមជីវិត និងក្ដីសង្ឃឹម បានបណ្ដុះបណ្ដាលជំនាញកាត់ដេរដល់សិស្ស ៣៤៦នាក់ ក្នុងនោះ ៨៥ភាគរយ បានបន្តប្រើប្រាស់ជំនាញនេះ

នាយកប្រតិបត្តិសមាគមជីវិត និងក្ដីសង្ឃឹម បានបង្ហាញថា សាលាបណ្ដុះបណ្ដាលវិជ្ជាជីវៈកាត់ដេរ ផាកហៃយ៉ាត់សៀមរាប LHA របស់សមាគមជីវិត និងក្ដីសង្ឃឹម បានដំណើរការតាំងឆ្នាំ២០០៦មក ដោយបានបញ្ចប់វគ្គបណ្ដុះបណ្ដាលបានចំនួន១៨វគ្គ សរុបមានសិស្សចំនួន៣៤៦នាក់ បានទទួលការបណ្ដុះបណ្ដាល ហើយក្នុងនោះសិស្ស ៨៥ភាគរយ បានបន្តប្រើប្រាស់ជំនាញក្រោយពីបានបញ្ចប់ទៅ ៥ភាគរយ ក្លាយជាគ្រូបង្រៀនជំនាញកាត់ដេរ ៥ភាគរយ បានបើកហាងកាត់ដេរផ្ទាល់ខ្លួន និងសិស្សដទៃទៀតបានផ្លាស់ប្ដូរការងារទៅវិស័យផ្សេង។

ក្នុងពិធីបិទវគ្គបណ្ដុះបណ្ដាលជំនាញកាត់ដេរជំនាន់ទី១៨ នៃសាលាបណ្ដុះបណ្ដាលវិជ្ជាជីវៈកាត់ដេរ ផាកហៃយ៉ាត់សៀមរាប នៅថ្ងៃទី២១ ខែវិច្ឆិកា ឆ្នាំ២០២៥ ព្រះតេជគុណ ឡម លឿម នាយកប្រតិបត្តិសមាគមជីវិត និងក្ដីសង្ឃឹម មានសង្ឃដីកាថា សាលាបង្រៀនកាត់ដេរនេះ ទទួលបានការឧបត្ថម្ភថវិកាទាំងស្រុងពីសណ្ឋាគារផាកហៃយ៉ាត់សៀមរាប។ ព្រះអង្គ ក៏បានថ្លែងអំណរគុណដល់សណ្ឋាគារ បុគ្គលិកក្រុមការងារ ព្រះសង្ឃ និងអ្នកស្ម័គ្រចិត្តដែលបានសហការគាំទ្រ និងចូលរួម ញ៉ាំងឱ្យការបណ្ដុះបណ្ដាលប្រព្រឹត្តិទៅរលូន និងបានជាប្រយោជន៍ដល់ស្រ្តី និងយុវតីជាច្រើន។

លោក សេង ផល្លា ជាអ្នកគ្រប់គ្រងធនធានមនុស្សនៃសណ្ឋាគារ ផាកហៃយ៉ាត់សៀមរាប បានសំដែងការអបអរសាទរចំពោះការសម្រេចនៃការបណ្ដុះបណ្ដាលជំនាញកាត់ដេរនេះ និង បានប្តេជ្ញចិត្តបន្តគាំទ្រឱ្យសមាគមបន្តសកម្មភាពដ៏ល្អនេះតទៅទៀត ដើម្បីជួយដល់សហគមឱ្យបានកាន់តែច្រើន ។

ព្រះធម្មានុរ័ក្ខញាណ ស៊ុម ពិសិទ្ធិ ព្រះសមុហ៍គណខេត្តសៀមរាប បានផ្ទាំងផ្ញើឱ្យសិស្សគ្រប់រូបបន្តប្រើប្រាស់ និងអភិវឌ្ឍជំនាញរបស់ខ្លួនឱ្យកាន់តែរីកចម្រើន ដើម្បីបានជំនាញនេះប្រចាំជីវិត។ លើសពីនេះទៅទៀតព្រះអង្គ ក៏បានថ្លែងអំណរគុណដល់ម្ចាស់ជំនួយគឺសណ្ឋាគារ ផាកហៃយ៉ាត់សៀមរាប ដែលតែងតែជួយគាំទ្ររហូតមក ក៏ដូចជាអរគុណសមាគមជីវិត និងក្ដីសង្ឃឹម ព្រមទាំងព្រះចៅអធិការវត្តដំណាក់ដែលមានចិត្តសប្បុរសអនុញ្ញាតឱ្យសមាគមអាចដំណើរការវគ្គបណ្ដុះបណ្ដាលនេះបានយ៉ាងល្អ។

សូមជម្រាបថា ក្នុងពិធីបិទវគ្គនេះដែរ សាលាក៏បានផ្ដល់ជូននូវវិញ្ញាបនបត្របញ្ជាក់ការបណ្ដុះបណ្ដាល១សន្លឹក ម៉ាស៊ីនដេរ១គ្រឿង និង គ្រឿងបន្លាស់១ប្រអប់ ព្រមទាំងសម្លៀកបំពាក់មួយចំនួនដែលជាស្នារបស់ពួកគាត់ផ្ទាល់បានផលិតក្នុងពេលបណ្ដុះបណ្ដាលផងដែរ៕

អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ