Jizzax shahrida ko‘p qavatli uylar zamonaviy qiyofa kasb etmoqda!

Описание: O‘zbekiston Respublikasi Prezidentining 2024 yil 31 dekabrdagi “Jizzax viloyatini ijtimoiy-iqtisodiy rivojlantirishni jadallashtirish bo‘yicha qo‘shimcha chora-tadbirlar to‘g‘risida”gi PK-468-sonli qaroriga muvofiq, Jizzax shahridagi ko‘p qavatli uylarni ta’mirlash, ularning tashqi qiyofasini yaxshilash va muhandislik infratuzilmasini yangilash ishlari bosqichma-bosqich amalga oshirilmoqda. Loyihalar Jizzax viloyat hokimligi huzuridagi “Yagona buyurtmachi xizmati” Injiniring kompaniyasi DUK buyurtmachiligida olib borilmoqda.

Hozirgacha Jizzax shahrining bir qator mahallalaridagi ko‘p qavatli uylarda fasad qismlarini bazalt qoplamasi bilan qoplash, tom qismlarini shifer yoki profnastil bilan yangilash, yerto‘la qismlaridagi muhandislik kommunikatsiya quvurlarini almashtirish, ichki issiqlik tizimlarini tiklash va ta’mirtalab uylarni to‘liq ta’mirlash ishlari amalga oshirilmoqda. Jumladan, “Sayiljoyi” mahallasida 8 ta uyning fasadi va tom qismi, yerto‘la kommunikatsiyalari yangilanmoqda. “Toshloq” mahallasining 1 ta uyi, “Yoshlik” mahallasining 37 ta uyi, “Zargarlik” mahallasining 50 ta uyi, “Zilol” mahallasining 2 ta uyi, “Ittifoq” mahallasining 31 ta uyi hamda “Qassoblik” mahallasining 6 ta uyida ham shunday qurilish va ta’mirlash ishlari olib borilmoqda.

Ushbu ishlar natijasida shahar aholisi uchun yanada qulay va xavfsiz turarjoy shart-sharoitlari yaratiladi, uylarning tashqi qiyofasi zamonaviylashtiriladi, muhandislik infratuzilmalari esa talab darajasida ishlashi ta’minlanadi. Umumiy hisobda, loyihalar bo‘yicha shartnomalarning umumiy qiymati 69 milliard 375 million 500 ming so‘mdan ortiqni tashkil etmoqda.

Bu ishlar Jizzax shahridagi uy-joy fondlarining zamonaviylashuviga, aholining hayot sifati yaxshilanishiga va shahar infratuzilmasining barqaror rivojlanishiga xizmat qilmoqda.